ކައުންސިލްތަކަށް ދިނުމަށް، ޤާނޫނުން ބަޔާންކޮށްފައިވާ ބަޖެޓްގެ 5 ޕަސެންޓް، އަންނަ އަހަރުގެ ބަޖެޓްގައި ހިމަނުއްވާނެ ކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދެއްވައިފިއެވެ. ރައީސުލްޖުމްހޫރިއްޔާ ވަނީ، އެމަނިކުފާނުގެ ސަރުކާރުން ކައުންސިލްތައް ބާރުވެރިކުރުމަށް ކުރައްވާނެ މަސައްކަތްތައްވެސް ތަފްޞީލުކޮށް ދެއްވާފައެވެ.
އެގޮތުން ކައުންސިލްތައް ބާރުވެރިކުރުމަށް އަޅުއްވާ ފިޔަވަޅުތަކުގެ ތެރޭގައި ރައީސް ވިދާޅުވީ، މިއަދާ ހަމައަށް ޤާނޫނުގައި ބަޔާން ކުރިއަސް ކައުންސިލާ މަތިނުކުރާ ގިނަ ކަންތައްތަކެއް ހުރިކަމަށާއި އެކަންކަން ކައުންސިލްތަކާ ޙަވާލު ކުރައްވާނެ ކަމަށެވެ.
ރައީސް ވިދާޅުވީ، ކައުންސިލްތަކަށް އާމްދަނީ ހޯދުމަށް ފަޅުރަށްތައް ދޫކުރަމުން ގެންދާކަމަށާއި އަދި އޭގެ އިތުރުން، ކައުންސިލްތަކަށް ލޯކަލް ޓޫރިޒަމުން ޕަސެންޓެއް ކަނޑައެޅުމަކީވެސް އެމަނިކުފާނު ކުރައްވާނެ ކަމެއް ކަމަށެވެ. އަދި އެކަމަށް ބޭނުންވާ ޤާނޫނު އިޞްލާޙު ކުރުމުގެ މަސައްކަތްވެސް ކުރިއަށް ގެންދަވާނެ ކަމުގައި ރައީސް ވިދާޅުވިއެވެ.
“ބްލޮކް ގްރާންޓުގެ ފަސް ޕަސެންޓް އެއީ ގާނޫނުގައި އޮތް ގޮތް، އެ ގާނޫނުގައި އޮތް ގޮތަށް ހުރިހާ ކައުންސިލަކަށް މި ފަހަރުގެ ބަޖެޓް ފާސްވާއިރު ބްލޮކް ގްރާންޓް ފަސް ޕަސެންޓް ލިބޭނެ. އޭގެ އިތުރަށް ލޯކަލް ޓޫރިޒަމްގެ ތެރެއިން ވަކި އިންސައްތައެއް ޙަވާލުކުރަން އަޅުގަނޑުމެން ގާނޫނު އިސްލާހުކުރަން ފޮނުވާނަން،” ރައީސް ވިދާޅުވިއެވެ.
ރައީސް ވިދާޅުވީ ކައުންސިލްތަކަށް ކޮށްދެއްވަންވީ ކަންތައްތައް އެމަނިކުފާނަށް ސާފުވެ ވަޑައިގަންނަވާ ކަމަށެވެ. އެގޮތުން އެމަނިކުފާނުގެ ސަރުކާރަކީ، ލާމަރުކަޒީ ނިޒާމުގެ ތެރެއިން ކަންކަން ކުރުމަށް އިސްކަންދޭނެ ސަރުކާރެއް ކަމުގައި ވިދާޅުވިއެވެ.
“ކައުންސިލްތައް މެދުވެރިކޮށް ކަންތައްތައް ކުރުމުގައި އަޅުގަނޑުމެން މި ގެންދަނީ އަމަލާއި ބަހާއި ދިމާކުރަމުން. އެކަމުގެ ނަތީޖާ މި ފެންނަނީ،” މިއަދު ޕެޓް ކެއަރ ފެސިލިޓީ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވި އެވެ.
ރައީސް ވިދާޅުވީ، އެ މަނިކުފާނު އަތޮޅު ތެރެއަށް ކުރެއްވި ދަތުރުފުޅުތަކުގައި 160 ކައުންސިލަކާ ބައްދަލުކުރައްވާފައިވާ ކަމަށާއި ކައުންސިލްތަކުގެ ކަންބޮޑުވުންތައް އެމަނިކުފާނާ ޙިއްސާކޮށްފައިވާ ކަމަށާއި އެކަންކަން އެމަނިކުފާނަށް ސާފުކޮށް އެނގިވަޑައިގަންނަވާ ކަމަށެވެ.
ރައީސް ވިދާޅުވީ މިސަރުކާރުން ކަންކަން ކުރާނީ، ރައްޔިތުންގެ ފަޅީގައި ތިބެގެންނެވެ. އަދި ރައްޔިތުންގެ އިހުސާސްތައް ދެނެގަނެ، ރައްޔިތުން ބޭނުންވާ ގޮތަށް އެމަނިކުފާނުގެ ސަރުކާރުން ކަންކަން ކުރަމުން ގެންދާނެ ކަމުގެ ޔަޤީންކަންވެސް ރައީސް ދެއްވިއެވެ.
ރައީސް ޑރ. މުޢިއްޒުގެ ސަރުކާރުން ކައުންސިލްތަކާ އަޅާލާނެ ކަމުގެ ޔަޤީންކަން ދެއްވަމުން ރައީސް ވިދާޅުވީ، ކުރިން ކައުންސިލްތަކާ އަޅާނުލެވިފައިވާ ކަމަށެވެ. އެމޭރުމުން ވާހަކަފުޅު ދައްކަވަމުން ރައީސް ވިދާޅުވީ، ބައެއް ކައުންސިލްތައް ހިންގާ އިމާރާތްތަކަކީ، 40 އަހަރަށްވުރެން ގިނަ ދުވަސްވެފައިވާ ޢިމާރާތްތައް ކަމަށާއި އެތަންތަން މީގެ ކުރިން އަޅާނުލައި ދޫކޮށްލާފައިވާ ކަމަށެވެ.
އަދި މިއަހަރުގެ ތެރޭގައި، 50 ރަށެއްގެ ކައުންސިލަށް އައު އިމާރާތްތައް އަޅައިދިނުމާއި ދައުރުގެ ބާކީ އޮތް ދުވަސްތަކުގައި އިތުރު، 120 އިދާރާ ކައުންސިލަށް އަޅާނެ ކަމަށްވެސް ރައީސް ވިދާޅުވި އެވެ.
