ވެލާނާ އިންޓަރނޭޝަނަލް އެއާޕޯޓްގެ އައު ފިއުލް ފާމްގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިފްތިތާޙު ކޮށްދެއްވައިފިއެވެ. ވެލާނާ އެއާރޕޯޓުގައި ކުރިން ބޭނުންކުރި ފިއުލް ފާމަކީ 13 މިލިއަން ލީޓަރުގެ ތެޔޮ ރައްކާކުރެވޭ ފާމެކެވެ. ނަމަވެސް އަލަށް ބޭނުންކުރަން ފެށި ފިއުލް ފާމުގައި 45 މިލިއަން ލީޓަރުގެ ޖެޓް ފިއުލް ރައްކާކުރެވޭނެ އެވެ. އޭގެ އިތުރުން 1 މިލިއަން ލީޓަރުގެ ޑީސަލާއި، 1 ލައްކަ ލީޓަރުގެ ޕެޓްރޯލްވެސް ރައްކާކުރެވޭނެއެވެ.
އައި ފިއުލްފާމް އިފްތިތާޙު ކުރުމަށް ވެލާނާ އިންޓަރނޭޝަނަލް އެއަރޕޯޓްގައި އޮތް ރައްމިއްޔާތުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އާއި އެމަނިކުފާނުގެ ނައިބު އަލްއުސްތާޛު ޙުސައިން މުޙައްމަދު ލަތީފާއި، ސަރުކާރުގެ ވެރިންނާއި އެމްއޭސީއެލްގެ އިސްވެރިން ބޭފުޅުންނާއި އެއާލައިންތަކުގެ މަންދޫބުން ބައިވެރިވެވަޑައިގަތެވެ.
މިރަސްމިއްޔާތުގައި ވާހަކަދައްކަވަމުން އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރ އިބްރާޙިމް ޝަރީފް ވިދާޅުވީ އަލަށް އިފްތިތާޙު ކުރި ފިއުލް ފާމްގެ ފިއުލް ހައިޑްރަންޓް ނެޓްވޯކާއެކު، އެއްފަހަރާ 7 ބޯޓަށް ތެޔޮ އެޅުމުގެ ޚިދުމަތް ދެވޭނެކަމަށެވެ. އަދި ކުރިން ބޭނުން ކުރި 60 ހާސް ލީޓަރުގެ 2 ބައުޒަރުގެ ބަދަލުގައި މި ނިޒާމު ބޭނުން ކުރުމުން، 45 މިނެޓްގެ ތެރޭގައި ބޯޓަށް ތެއޮ އަޅައި ނިންމާލެވޭނެ އެވެ.
