އިންޑިއާ އާއި ޔޫރަޕިއަން ފްރީ ޓްރޭޑް އެސޯސިއޭޝަން (އީއެފްޓީއޭ) އާ ދެމެދު ވެފައިވާ ޓްރޭޑް އެންޑް އިކޮނޮމިކް ޕާޓްނަޝިޕް އެގްރީމަންޓް (ޓެޕާ) އަށް ރަސްމީކޮށް އަމަލުކުރަން ފަށައިފި އެވެ. މި އެއްބަސްވުމަށް އަމަލުކުރަން ފެށީ އޮކްޓޯބަރު މަހުގެ އެއްވަނަ ދުވަހުއެވެ. މި އެއްބަސްވުމުގެ ސަބަބުން ޔޫރަޕްގެ އިގްތިސާދުތަކަށް އިންޑިއާގައި 100 ބިލިއަން ޑޮލަރުގެ އިންވެސްޓްމަންޓްތަކަށް މަގުފަހިވެގެންދާނެ ކަމަށް ބެލެވެ އެވެ. އީއެފްޓީއޭގައި ހިމެނެނީ ސްވިޒަލޭންޑް، ނޯވޭ، އައިސްލޭންޑް، އަދި ލިޚްތެސްޓައިންއެވެ.
މިއީ ކުރިއަރާފައިވާ ޔޫރަޕްގެ އިގްތިސާދީ ބްލޮކަކާ އެކު އިންޑިއާއިން ހަދާފައިވާ ފުރަތަމަ ފުރިހަމަ މިނިވަން ވިޔަފާރީގެ އެއްބަސްވުމެވެ. މި އެއްބަސްވުމުގެ ދަށުން ކުރިއަށް އޮތް 15 އަހަރު ތެރޭގައި އިންޑިއާގައި ސީދާ އެއް މިލިއަން ވަޒީފާ އުފެދިގެންދާނެ ކަމަށް ލަފާކުރެވެއެވެ.
މި އެއްބަސްވުމުގައި ހިމެނެނީ ޓެރިފް ކުޑަކުރުމުގެ އިތުރުން އިންވެސްޓްމަންޓާއި، ޕްރޮފެޝަނަލް މޮބިލިޓީއާއި، ދެމެހެއްޓެނިވި ގޮތެއްގައި ކަންކަން ކުރިއަށް ގެންދިއުމާއި، ގްރީން އިނޮވޭޝަން އަދި ޑިޖިޓަލް ޓްރޭޑް ފަދަ އީޖާދީ ޓެކްނޮލޮޖީތަކުގެ އެއްބާރުލުން ދިނުމެވެ.
މި އެއްބަސްވުމަށް އަމަލުކުރަން ފެށުނީ ދުނިޔޭގެ އިގްތިސާދަށް މުހިންމު ބަދަލުތަކެއް އަންނަ ދުވަސްވަރެއްގައެވެ. ދުނިޔޭގެ ސަޕްލައި ޗޭންވެސް ބަދަލުވެ، އެއް މާކެޓަކަށް ބަރޯސާވުން ކުޑަކުރުމަށް ގައުމުތަކުން މަސައްކަތް ކުރަމުންދާއިރު، އިންޑިއާ ދަނީ އިތުބާރު ހުރި އަދި ގަވާއިދުތަކަށް ބިނާކޮށް ހިންގާ ބައިވެރިއެއްގެ ގޮތުގައި ފާހަގަވެފައެވެ. ޔޫރަޕިއަން ޔޫނިއަން އާ ގާތް ގުޅުމެއް އޮންނަ ނަމަވެސް މެންބަރެއް ނޫން އީއެފްޓީއޭއަށް އިންޑިއާއިން ހުށަހަޅަނީ ޑިމާންޑާއި އުފެއްދުމުގެ ގާބިލްކަން އިތުރުވަމުންދާ ބޮޑު، ޒުވާން އިގްތިސާދެކެވެ. މިގޮތުން، މި އެއްބަސްވުމުގެ ސަބަބުން ދެފަރާތުގެ ވިޔަފާރިއާއި އިގްތިސާދީ ގުޅުންތައް އިތުރަށް ބަދަހިވެގެންދާނެ ކަމަށް ބެލެވެ އެވެ.
