ޗައިނާގެ ސިޗުއާން ޕްރޮވިންސްގައި އަލަށް ހުޅުވި ހޮންގްކީ ބްރިޖްގެ ބައެއް، ބްރިޖް ހުޅުވިތާ މަސްތަކެއް ފަހުން ކަނޑައިގެންގޮސް، ހައިވޭ 317 އަށް ވެއްޓި ދަތުރުފަތުރަށް ހުރަސްތަކެއް ކުރިމަތިވެއްޖެއެވެ. ނަމަވެސް، ރައްކާތެރިކަމުގެ ފިޔަވަޅުތަކުގެ ސަބަބުން މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ.
އޮންލައިންކޮށް ދައުރުވަމުންދާ ވީޑިއޯ ފުޓޭޖްތަކުން ދައްކާ ގޮތުގައި، ބްރިޖްގެ ބައިތައް ވެއްޓުނީ އޭގެ ސްލެބެއް ވެއްޓުމާއި ބިންގަނޑު ކަނޑައިގެން ދިއުމުންނެވެ. އަދި ބިމުގެ ލޮޅުމަކާއެކު ބްރިޖްގެ ބައިތައް ވެއްޓި، ހިރަފުސް އަރާފައިވެއެވެ. މި ހާދިސާ ހިނގާފައިވަނީ އެ ސަރަހައްދުގެ ބިން ހެލުމުގެ ހާލަތު ގޯސްވެ، ބިން ކަނޑައިގެން ދިއުމާ ގުޅިގެންނެވެ.
ބްރިޖް ވެއްޓުމުގެ ކުރިން، ހޯމަ ދުވަހު 17:25 ގައި ފަސްގަނޑަށް ބަދަލުތަކެއް އައިސްފައިވާކަން ފާހަގަކުރެވުމާއެކު، ކަމާބެހޭ ފަރާތްތަކުން ވަނީ ރައްކާތެރިކަމުގެ ގޮތުން އެ ސަރަހައްދަށް ވަނުން މަނާކޮށްފައެވެ.
މި ޓީމުތަކުގެ މަސައްކަތުގެ ނަތީޖާއެއްގެ ގޮތުން، 23:00 ގެ ކުރިން އިންޒާރުގެ ބޯޑުތައް ހަރުކޮށް، ރައްޔިތުންނާއި ޑްރައިވަރުންގެ ސަލާމަތަށްޓަކައި ޓްރެފިކް ކޮންޓްރޯލްގެ ފިޔަވަޅުތައް ވަނީ އަޅާފައެވެ. މި ފިޔަވަޅުތަކުގެ ސަބަބުން އެއްވެސް މީހަކަށް ގެއްލުމެއް ނުލިބި ސަލާމަތްވިއެވެ.
ނަމަވެސް، ބްރިޖް ކަނޑައިގެން ދިއުމުގެ ސަބަބުން ސަރަހައްދުގެ ދަތުރުފަތުރަށް ވަނީ ބޮޑެތި ހުރަސްތަކާއި ލަސްވުންތަކާ ކުރިމަތިވެފައެވެ.
