ފަހި ދިރިއުޅުން ކޯޕަރޭޝަން (އެފްޑީސީ) އިން، ގެދޮރުވެރިޔާ ސްކީމްގެ ދަށުން ހުޅުމާލެ ދެވަނަ ފިޔަވަހީގައި ތަރައްޤީކުރި "އަމާން އުދަރެސް" 4000 ފްލެޓްގެ ތެރެއިން އިތުރު 5 ޓަވަރެއްގެ ތަޅުދަނޑި ހަވާލުކުރުމުގެ މަސައްކަތް ރަސްމީކޮށް ފަށައިފިއެވެ. މި ފަހަރު ތަޅުދަނޑި ހަވާލުކުރަން ފެށި ޓަވަރުތަކުގެ ތެރޭގައި ހިމެނެނީ އަމާން އުދަރެސް ޓަވަރު 11، 12، 15، އަދި 16 ގެ އިތުރުން މިއަދުން ފެށުމަށް ހަމަޖެހިފައިވާ 13 ވަނަ ޓަވަރުގެ އެޕާޓްމަންޓްތަކުގެ ތަޅުދަނޑިތަކެވެ.
އެފްޑީސީން ހާމަކުރައްވާފައިވާ ގޮތުގައި، ފްލެޓްތައް ހަވާލުކުރުމުގެ މަސައްކަތް ކޮންމެ ދުވަހެއްގެވެސް ހެނދުނު 9:30 އިން މެންދުރު 3:30 އަށް ކުރިއަށްދާނެއެވެ. ޓަވަރުތައް ހަވާލުކުރުމަށް ވަނީ ވަކި ތާވަލުތަކެއް ކަނޑައަޅާފައިވާއިރު، އުދަރެސް ޓަވަރުތައް ޑިސެންބަރު މަހުގެ 2 ވަނަ ހަފްތާގައި އަދި ދޯދި ޓަވަރުތައް ޑިސެންބަރު މަހުގެ 5 ވަނަ ހަފްތާގައި ހަވާލުކުރުމަށް ވަނީ ލަފާކުރެވިފައެވެ.
މި ސްކީމްގެ ދަށުން ފްލެޓް ލިބޭ ފަރާތްތަކަށް ސަރުކާރުން ވަނީ ބޮޑު ލުޔެއް ދިނުމަށް ނިންމާފައެވެ. ޤަވާޢިދުން ކުލި ދައްކާ ފަރާތްތަކަށް ބޮޑު ސަބްސިޑީއެއް ދިނުމަށް ނިންމާފައިވާއިރު، މީގެ ސަބަބުން 3 ކޮޓަރީގެ އެޕާޓްމަންޓްގެ ކުލި 9000ރ އަށް އަދި 2 ކޮޓަރީގެ އެޕާޓްމަންޓްގެ ކުލި 7000ރ އަށް ކުޑަކުރެވޭނެއެވެ. މިއީ ފްލެޓް ލިބޭ އާޢިލާތަކަށް ދިރިއުޅުމުގެ ޚަރަދުތައް ކުޑަކުރުމަށް ލިބޭ ވަރަށް ބޮޑު އެހީއެކެވެ.
ފްލެޓްތަކުގެ އިމާރާތުގެ މަސައްކަތްތައް މިހާރު ވަނީ މުޅިން ނިމިފައެވެ. ނަމަވެސް، ގިނަ ޓަވަރުތަކުގައި މިހާރު ކުރިއަށްދަނީ ޔުޓިލިޓީ ޚިދުމަތްތަކާ ގުޅޭ ޓެސްޓްތައް ކުރުމުގެ މަސައްކަތްތަކެވެ. މި ޓެސްޓްތަކަކީ ރައްކާތެރިކަމާއެކު ދިރިއުޅުން ފެށުމަށްޓަކައި ކޮންމެހެން ކުރަންޖެހޭ މަސައްކަތްތަކެއް ކަމަށް އެފްޑީސީން ބުނެއެވެ. މި މަސައްކަތްތައް ނިމުމާއެކު އިތުރު ޓަވަރުތަކުގެ ތަޅުދަނޑިތައް ހަވާލުކުރުން ކުރިއަށްދާނެއެވެ.
