އިންޑިއާ، ބްރެޒިލް އަދި ދެކުނު އެފްރިކާ (އިބްސާ) ގެ ގައުމުތައް ގުޅުވައިދޭ މަޝްވަރާތައް އަލުން ހަލުވިކަމާއެކު ކުރިއަރަމުން އެބަދެއެވެ. 2003 ވަނަ އަހަރު އުފެދުނު އިބްސާ އަކީ އޭޝިއާ، އެފްރިކާ އަދި ދެކުނު އެމެރިކާގެ މަލްޓިކަލްޗަރަލް ޑިމޮކްރަސީތައް ހިމެނޭ މުހިންމު ތިން ގައުމު ހިމެނޭ ގްރޫޕެކެވެ.
ޖޮހެނަސްބާގްގައި ބޭއްވި ޖީ20 ސަމިޓްގެ ތެރެއިން ބޭއްވި އިބްސާގެ ބައްދަލުވުމަކުން އިބްސާއަށް އާ ހަކަތައެއް ލިބި، ދުނިޔޭގެ އިސް މުއައްސަސާތަކަށް އިސްލާހު ގެނައުމަށް މި ގައުމުތަކުގެ ލީޑަރުން ގޮވާލެއްވިއެވެ.
އިބްސާގެ މެންބަރު ގައުމުތަކަށް އެމެރިކާގެ ފަރާތުން ކުރިމަތިވި ޕްރެޝަރުތަކަށް ވެސް މި ބައްދަލުވުމުގައި ވަނީ އަލިއަޅުވާލާފައެވެ.
އެގޮތުން، އެމެރިކާގެ ރައީސް ޑޮނަލްޑް ޓްރަމްޕް އިންޑިއާ އާއި ބްރެޒިލްއާ ދެކޮޅަށް ޓެރިފްތައް ބޮޑު ކުރުމާއި ދެކުނު އެފްރިކާއާ ދެކޮޅަށް ދޮން މީހުންނަށް އަނިޔާކުރާ ކަމަށް ތުހުމަތުކޮށް ޖީ20 ބޮއިކޮޓް ކުރުމުގެ ސަބަބުން، އިބްސާގެ މެންބަރުން ވަނީ އިތުރަށް އަވަސް ފިޔަވަޅުތަކެއް އެޅުމަށް މަޖުބޫރުވެފައިވާ ކަމަށް ބުނެފައެވެ.
ޝިންޓަންގެ މިފަދަ އަމަލުތައް ސިފަކުރެވިފައިވަނީ ބިރު ދެއްކުމުގެ ބުލީ ކުރުމުގެ މަސައްކަތެއްގެ ގޮތުގައެވެ. މިކަމުގެ ސަބަބުން އިބްސާގެ ގައުމުތަކަށް އެމީހުންގެ އަޑު ގަދަކުރުމަށް އިތުރަށް ބާރުއަޅާފައި ވެއެވެ.
އިބްސާގެ ދައުރުވާ ރިޔާސަތު މިހާރު ގެންދަވަނީ ދެކުނު އެފްރިކާގެ ރައީސް ސިރިލް ރަމަފޯސާ އެވެ. އޭނާ ވަނީ ފަގީރުކަން ހައްލުކުރުމަށް ދުނިޔޭގެ މުއައްސަސާތަކަށް ބޮޑެތި އިސްލާހުތަކެއް ގެނައުމަށް ގޮވާލައްވާފައެވެ.
ންޑިއާގެ ބޮޑުވަޒީރު ނަރެންދުރަ މޯދީ ވިދާޅުވީ ދުނިޔޭގެ މުއައްސަސާގެ އިސްލާހަކީ "އިތުރު އިޚްތިޔާރެއް އޮތް ކަމެއް ނޫން، ނަމަވެސް އެއީ މިހާރު ލާޒިމުވެފައިވާ ކަމެއް" ކަމަށެވެ. އަދި އޭނާ ވަނީ ގައުމީ ސަލާމަތާ ބެހޭ އެޑްވައިޒަރުންގެ ބައްދަލުވުންތައް ގަވާއިދުން ބޭއްވުމަށާއި، އޭއައިގެ މިންގަނޑުތައް ކަނޑައެޅުމަށް އިބްސާ ޑިޖިޓަލް އިންނޮވޭޝަން އެލަޔަންސްއެއް އުފެއްދުމަށް ހުށަހަޅުއްވާފައެވެ. މޯދީ ވަނީ މިހާރުވެސް 40 ގައުމެއްގައި 50 އަށް ވުރެ ގިނަ މަޝްރޫޢު ނިންމާފައިވާ އިބްސާ ފަންޑުގެ މައްޗަށް ބިނާކޮށް، ކްލައިމެޓް ރެޒިލިއަންޓް އެގްރިކަލްޗަރަށް ޚާއްޞަ ފަންޑެއް އުފެއްދުމަށް ވެސް ހުށަހަޅުއްވާފައެވެ.
ބްރެޒިލްގެ ރައީސް ލުއިޒް އިނާސިއޯ ލޫލާ ޑާ ސިލްވާ ވިދާޅުވީ އިބްސާގެ އެއްބާރުލުން އ.ދ.، ޖީ20 އަދި ބްރިކްސްގައި ފެނިގެންދާން ޖެހޭ ކަމަށާއި، އެއީ ދުނިޔޭގެ ދެކުނުގެ ގައުމުތަކަށް ބައިނަލްއަގްވާމީ ނިޒާމު ބައްޓަން ކުރުމުގައި އިތުރު ނުފޫޒެއް ދިނުމަށްޓަކައި ކުރަން ޖެހޭ ކަމެއް ކަމަށެވެ. އޭނާ ވަނީ ބްރިކްސް ފުޅާވުމާއި ޖީ20 ވަރުގަދަވުމުގެ ސަބަބުްނ އުފެދޭ މާޙައުލުގައި އިބްސާގެ ދައުރު ޒަމާނީ ކުރުމަށް ވެސް ގޮވާލައްވާފައެވެ.
އިބްސާގެ މި ހަލުވިކަން އިތުރަށް ވަރުގަދަކޮށް، ދުނިޔޭގެ ދެކުނުގެ ގައުމުތަކުން އިސްކަންދޭ ކަންކަން ބައިނަލްއަގްވާމީ ފެންވަރުގައި ފާހަގަކުރުމަށް އިބްސާ ސަމިޓެއް ބޭއްވުމަށް މިހާރު ވަނީ ރާވާފައެވެ. އިބްސާ އަލުން ދިރުވުމަކީ އައިއެމްއެފް އަދި ވޯލްޑް ބޭންކް ފަދަ ހުޅަނގުގެ ނުފޫޒު ގަދަ މުއައްސަސާތަކާ ދެކޮޅު ބާރެއްގެ ގޮތުގައި ދެކުނުގެ ގައުމުތަކަށް ބޭނުންތެރި ކަމެއް ކަމަށް ފާހަގަ ކޮށްފައި ވެއެވެ.
