ޗައިނާގެ މަޝްހޫރު ޓެކްނޮލޮޖީ ކުންފުނި ޝައޯމީން އެ ކުންފުނީގެ އިލެކްޓްރިކް ކާރު އުފައްދާ ފެކްޓްރީތަކުގައި އިންސާނުންނާ އެއްގޮތް ރޮބޮޓްތަކެއް ބޭނުންކޮށްގެން ތަޖުރިބާތަކެއް ކުރަން ފަށައިފިއެވެ. މި މަސައްކަތަކީ ފެކްޓްރީތަކުގެ އުފެއްދުންތެރިކަން އިތުރުކުރުމަށް އެ ކުންފުނިން ކުރަމުންދާ މަސައްކަތުގެ ބައެކެވެ.
ސްޕެއިންގެ ބާސެލޯނާގައި ކުރިއަށްދާ ވޯލްޑް މޮބައިލް ކޮންގްރެސްގެ ހަވާސާގައި ސީއެންބީސީއަށް ދެއްވި ބަސްދީގަތުމެއްގައި ޝައޯމީގެ ރައީސް ލޫ ވޭބިންގް ވިދާޅުވީ، ދެ ރޮބޮޓަކަށް ތިން ގަޑިއިރުގެ ތެރޭގައި މަސައްކަތުގެ 90 އިންސައްތަ ނިންމާލެވޭ ކަމަށެވެ. މި ރޮބޮޓްތަކަކީ ކާރުގެ އެކި ބައިތަކުގައި އިސްކުރު ޖެހުމާއި ތަކެތި އެއްތަނުން އަނެއްތަނަށް އުފުލުން ފަދަ މުހިންމު މަސައްކަތްތައް ކުރާ ރޮބޮޓްތަކެކެވެ.
ލޫ ވޭބިންގް ފާހަގަކުރެއްވި ގޮތުގައި އެންމެ ބޮޑު ގޮންޖެހުމަކީ ފެކްޓްރީގެ މަސައްކަތް ހިނގާ ހަލުވިމިނާ އެއްވަރަށް ރޮބޮޓްތަކަށް މަސައްކަތް ކުރެވުމެވެ. "ޝައޯމީގެ ކާރު ފެކްޓްރީގައި ކޮންމެ 76 ސިކުންތަކުން އައު ކާރެއް އުފައްދައި ނިންމާލާއިރު، މި ރޮބޮޓްތަކަށް އެ ހަލުވިމިނުގައި މަސައްކަތް ކުރެވޭ،" އޭނާ ވިދާޅުވިއެވެ. ކުރިމަގުގައި މި ރޮބޮޓްތަކުގެ ސަބަބުން އިންސާނުންނަށް ނުކުރެވޭ ފަދަ އުނދަގޫ މަސައްކަތްތައް ކުރެވިގެންދާނެ ކަމަށްވެސް އޭނާ ވިދާޅުވިއެވެ.
ޝައޯމީން އެންމެ ފުރަތަމަ ހިއުމަނޮއިޑް ރޮބޮޓެއް ކަމަށްވާ "ސައިބަރ ވަން" ދައްކާލާފައިވަނީ 2022 ވަނަ އަހަރުގައެވެ. ނަމަވެސް މިހާތަނަށް މި ރޮބޮޓް އާންމުންނަށް ވިއްކަން ފަށާފައެއް ނުވެއެވެ. ލޫ ވިދާޅުވި ގޮތުގައި މިހާރު ފެކްޓްރީގައި ބޭނުންކުރާ ރޮބޮޓްތަކަކީ އަދި ތަރުބިއްޔަތު ކުރެވިފައިނުވާ މަރުހަލާގައިވާ ރޮބޮޓްތަކެކެވެ. މިއީ ޗައިނާގެ ކުންފުނިތަކުން ރޮބޮޓިކްސް ދާއިރާއަށް ކުރަމުންދާ ބޮޑު އިންވެސްޓްމަންޓްތަކުގެ ހެއްކެކެވެ.
އާރްބީސީ ކެޕިޓަލް މާކެޓްސްގެ ތަޖުރިބާކާރުން ލަފާކުރާ ގޮތުގައި 2050 ވަނަ އަހަރާ ހަމައަށްދާއިރު އިންސާނުންނާ އެއްގޮތް ހިއުމަނޮއިޑް ރޮބޮޓްތަކުގެ ބާޒާރު 9 ޓްރިލިއަން ޑޮލަރަށް އަރާނެއެވެ. މީގެ ތެރެއިން 60 އިންސައްތަ ހިއްސާ ކުރާނީ ޗައިނާއިންނެވެ. ޝައޯމީގެ އިތުރުން އެކްސްޕެންގް އަދި އޮނާ ފަދަ ޗައިނާގެ އެހެން ކުންފުނިތަކުންވެސް ދަނީ މި ދާއިރާއިން ކުރިއެރުންތައް ހޯދަމުންނެވެ.
އެމެރިކާގެ ޓެސްލާ ކުންފުނީގެ ސީއީއޯ އީލޮން މަސްކްވެސް ވަނީ އެ ކުންފުނީގެ ބައެއް ކާރުތައް އުފެއްދުން ހުއްޓާލައި، ފެކްޓްރީތައް "އޮޕްޓިމަސް" ރޮބޮޓްތައް އުފެއްދުމަށް ބަދަލުކުރާނެކަން އިއުލާން ކޮށްފައެވެ. މަސްކް ބުނިގޮތުގައި އޮޕްޓިމަސްގެ އައު ޖީލުގެ ރޮބޮޓްތަކަކީ އިންސާނުންގެ އަމަލުތަކަށް ބަލައިގެން ކަންކަން ދަސްކުރުމުގެ ގާބިލުކަން ލިބިގެންވާނެ ރޮބޮޓްތަކެކެވެ.
