ޤައުމު ސިއްސުވާލި ޙާދިސާއަކީ، ހުޅުމާލޭ ފޭސް 2 ގައި 31 ޖުލައި ގައި ހިނގި ޙާދިސާއެވެ. ބާރަށް ދުއްލި ސްޕޯޓްސް ކާރުގައި އިނީ، އަޚް އިބްރާހީމް އަކުރަމް އެވެ. އޭނާ ވަނީ ޙާދިސާއަށް ފަހު ޖާނާއިގެން ސަލާމަތްވާން ފިލާފައެވެ. އެހެން ނަމަވެސް ހަމަ އެރޭ ޕޮލިސް އޭނާ ހުރިތަނަކުން އަތުލައިގަނެގެން ބަންދުކުރިއެވެ.
މި ސްޕޯޓު ކާރު ބާރަށް ދުއްވާފައި ގޮސް ސައިކަލެއްގައި މަޑުކޮށްގެން އިން މީހަކެއްގެ ދުވަސް ދުއްވާލީއެވެ.
އަޚު އަކުރަމް، ބަންދުގައި ބަހައްޓާފައި ކޯޓަށް ހާޒިރުކޮށް މުއްދަތު ޖަހާފައި ވަނީ ވަކީލަކު ހޯދުމުގެ ޙައްޤުން މަޙުރޫމް ވާގޮތަށެވެ.
ހައިކޯޓުގައި އޭނާގެ ބަންދު އަމުރު އިސްތިއުނާފު ކުރުމުން ހިންގާފައިވާ ޝަރީޢަތުގެ މަޖިލީހުގެ މަޙުޟަރު ބަޔާނުން ވަނީ ކަން ހިނގައިދިޔަ ގޮތް އާންމު ވެފައެވެ.
ފަނޑިޔާރު އުސްތާޛް މުޙައްމަދު ފައިޞަލް ރިއާސަތު ބެލެހެއްޓެވި ޝަރީޢަތުގެ މަޙުޟަރު ބަޔާނުން އަންނަނިވިކަންކަން ހާމަވެއެވެ.
6:44 ފުލުހުން ކޯޓު އަމުރަކަށް އެދުން
7:23 ވަކީލަކު އައްޔަން ކުރުމަށް ފޯމު ހުށަހެޅުން
8:28 މުވައްކިލު ވަކީލަށް ރުހުން ދިނުން
9:52 ފުލުހުންގެ އިދާރާއިން ވަކީލު އައްޔަން ކުރުން
10:06 ވަކީލު އައްޔަން ކުރިކަން ވަކީލަށް އެންގުން
10:00 ތުހުމަތު ކުރެވޭ ފަރާތް ކޯޓަށް ހާޟިރު ކުރުން
10:04 ވަކީލަކާ ނުލައި ޝަރީޢަތް ފެށުން.
އުސްތާޛް ފައިޞަލް ނިންމެވި ޤާނޫނާއި ޙައްޤު ނެގެހެއްޓުމުގެ މި މުހިންމު ޙުކުމްގައި ވަނީ މުއްތަހަމު ވަކީލަކު އައްޔަންކޮށްފައި ވަނިކޮށް ވަކީލަށް ޙާޟިރު ނުކުރެވޭ ގޮތަށް އޭނާ ކޯޓަށް ހާޒިރުކޮށް ނެރުނު އަމުރު ބާޠިލު ކުރާ ކަމަށެވެ.
