މެކްސިކޯގެ ޚާއްސަ ރޮށި، ޓޮޓިއާ ފިހެ ވިއްކައި ހަދާ މީހުންނަކީ އެމީހުން ދިރިއުޅޭ ހިސާބުތަކުގައި ބޮޑު އިޤްތިޞާދެއް ކޮންޓްރޯލު ކުރާ ބަޔެކެވެ. ރާއްޖޭގައި ނަމަ ހެދިކާ ހަދައި ވިއްކާ މީހުން ފަދައެވެ. ޓޮޓިޔާ ފިހެގެން ވިއްކާ މީހުންނަކީ އަމިއްލަ ގޭގައި ވިޔަފާރިކުރާ މީހުނަށް ވުމުން މިއަދާހަމައަށް ބޭންކިންގެ ދާއިރާއިން އެމީހުންނަށް ސަމާލުކަމެއް ދީފައެއް ނުވެއެވެ.
ރާއްޖޭގައި ބީއެމްއެލްގެ އެޕުން ފައިސާ ފޮނުވާފައި ވައިބާއިން ސްލިޕް ފޮނުވާ ގޮތަށް ވުރެން މާ ފަސޭހަ ގޮތެއް އެމީހުނަށް ވަނީ އީޖާދުކޮށް ދީފައެވެ. ދެކުނު އޭޝިއާގައި ރާއްޖެ ފިޔަވައި އެހެން ހުރިހައި ޤައުމެއްގައިވެސް މިފަދަ މާލީ ޓެކްނޮލޮޖީ ބޭނުން ކުރެއެވެ.
މެކްސިކޯގެ ޓޮޓިއާ ފިހައި ވިއްކާ މީހުންގެ ޖަމުއިއްޔާ، ނޭޝަނަލް ޓޯޓިއާ ކައުންސިލާއި ޓެކްނޮލޮޖީ ކުންފުނި ފިންސަސް އިން ވަނީ ޓޮޓިއާ ވިއްކާ މީހުން ވިޔަފާރި ކުރަން ޚާއްސަ މާލީ އެޕެއް ތަޢާރަފް ކޮށްފައެވެ. ޓޮޓިއާ ވިއްކާ މީހާ ގެންގުޅޭ ކިއުއާރު ކޯޑްގެ ފޮޓޯއެއް ނެގުމަށް ފަހު ވަގުތުން އެމީހާއަށް ފައިސާ ފޮނުވޭނެއެވެ.
މި އެޕް ތައްޔާރުކޮށްފައި ވަނީ މީހުންނަށް އިތުރު އާމްދަނީ ހޯދޭ ގޮތަށް ޕްރިޕެއިޑް ފޯނު ގެންގުޅޭ މީހުންނަށް ރިޗާޗުކޮށްދީ، މޮބައިލުން ފައިސާވެސް ފޮނުވައި ދެވޭ ގޮތަށެވެ.
މިއީ މެކްސިކޯގައި ރަސްމީ ބެންކިންގެ ނިޒާމަށް ނުވަދެ ތިބި އެތައް ބަޔަކު ރަސްމީ މާލީ ނިޒާމަށް ގެނަސްދިނުމަށް މުހިންމު އިންޤިލާބީ ބަދަލެއް ކަމަށް މި އެޕް އުފެއްދި ފަރާތުން ދެކެއެވެ. ޓޮޓިއާ ވިއްކާ މީހުންގެ ޖަމުއިއްޔާގެ އަމާޒަކީ ޓޯޓިއާ އުފައްދާ މީހުންގެ 90 އިންސައްތަ މީހުން 3 އަހަރު ތެރޭގައި މި އެޕް ބޭނުން ކުރާ ބަޔަކަށް ހެދުމެވެ. މި އެޕް ބޭނުން ކުރާ މީހުން ބުނަނީ އެޕް ބޭނުން ކުރުމުން އެމީހުންގެ އާމްދަނީ އިތުރުވެފައި އާމްދަނީ ބެލެހެއްޓުން ފަސޭހަވެފައިވާ ކަމަށެވެ.
މެކްސިކޯގެ 129 މިލިއަން މީހުންގެ އާބާދީގެ ތެރެއިން ގާތްގަނޑަކަށް ދެބައިކުޅަ އެއްބައި މީހުންނަކީ ބެންކު އެކައުންޓު ގެންގުޅޭ ބަޔެއް ނޫނެވެ. މެކްސިކޯގައި 68 ޕަސެންޓު މީހުންނަކީ ކޭޝްކާޑު ގެންގުޅޭ ބަޔެއް ނޫނެވެ.
ޓޮޓިއާއަކީ، މެކްސިކޯގައި ކޮންމެ ދުވަހަކު އެތައް މިލިއަން މީހުން ބޭނުންކުރާ ބާވަތުގެ ރޮއްޓެކެވެ. އަދި ޓޮޓިއާ އުފެއްދުމުގައި ގާތްގަނޑަކަށް 110،000-135،000 ވިޔަފާރި ހިމެނޭ ކަމަށް ސިނާއަތުގެ ތަފާސްހިސާބުތަކުން ދައްކަ އެވެ. އޭގެ ތެރެއިން ގިނަ މީހުން ހަރަކާތްތެރިވަނީ ނުރަސްމީ އިޤްތިޞާދުގައެވެ.
އިންޓަރ އެމެރިކަން ޑިވެލޮޕްމަންޓް ބޭންކާއި ވެންޗަރ ކެޕިޓަލް ކުންފުނި ފިނޮވިސްޓާ އިން ކުރި ދިރާސާއަކުން ދައްކާ ގޮތުގައި ދެކުނު އެމެރިކާގައި މެކްސިކޯއަކީ ފައިނޭންޝަލް ޓެކްނޮލޮޖީގެ 20 އިންސައްތަ ޙިއްސާވާ ޤައުމެވެ.
ލެޓިން އެމެރިކާ އާއި ކެރިބިއަން ސަރަހައްދުގައި ފިންޓެކް ސްޓާޓްއަޕްތަކުގެ ޢަދަދު 2017 އާއި 2023 އާ ދެމެދު ހަތަރު ގުނައަށް ވުރެ އިތުރުވެފައި ވެއެވެ.
