އދގެ އާންމު މަޖިލީހުގައި ރާއްޖޭގެ ބަޔާން އިއްވަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، ދިވެހި ޤައުމު މިނިވަން 75 ފާހަގަ ކުރާއިރު ރާއްޖެ އޮންނާނެ ގޮތުގެ ތަޞައްވުރެއް ހުށަހަޅުއްވާފައެވެ. އދގެ ޕޯޑިއަމުން އެމަނިކުފާނު ހުށަހެޅުއްވި ތަޞައްވުރުގައި ވަޢުދުވެ ވަޑައިގަތީ، 2040ގައި ރާއްޖެއަކީ، ތަރައްޤީވެފައިވާ، ފުދުންތެރި ވަށާ ޖެހޭ ޤައުމެއްގެ ގޮތުގައި ތަރައްޤީ ކުރެއްވުމުގެ ތަޞައްވުރެކެވެ. ރާއްޖޭގެ މިނިވަން 75ގެ ތަޞައްވުރަށް ރައީސުލްޖުމްހޫރިއްޔާ ހުށަހަޅުއްވާ ތަޞައްވުރު ބިނާވެފައި ވަނީ މުހިންމު 3 ތަނބެއްގެ މައްޗަށެވެ.
ރައީސް ޑރ. މުޢިއްޒުގެ ތަޤްރީރުގައި މައިގަނޑު ގޮތެއްގައި ފާހަގަކުރެއްވި ޙަޤީޤަތްތަކަކީ، ރާއްޖެއަކީ ބައި މިލިއަނެއްހައި މީހުން ދިރިއުޅޭ ހާހާއި އެއްސަތޭކަ ޖަޒީރާގެ މައްޗަށް އެކުލެވޭ މާސިންގާ ކަނޑެއްގައި ފެތުރިފައިވާ ޤައުމެއް ކަމަށާއި 2040 ވަނަ އަހަރު ރާއްޖެ އޮންނާނީ ފުރިހަމައަށް ތަރައްޤީވެފައިވާ ޤައުމެއްގެ ގޮތުގައި ކަމަށެވެ.
“ތަޤްދީރަކީ ހަމައެކަނި ނިޔާއެއް ނޫން، އެއީ، އަޅުގަނޑުމެންގެ އަމިއްލަ އިޚުތިޔާރުން ކުރާ ކިތަންމެ ކަމަކާއި ނިންމާ ކިތަންމެ ނިންމުންތަކަކާއި އަޅުގަނޑުމެން މަސައްކަތަށް ހޭދަކުރާ ކިތަންމެ ގަޑިތަކެއްގެ ނަތީޖާ” ރައީސުލްޖުމްހޫރިއްޔާ ޑރ. މުޢިއްޒު ވިދާޅުވިއެވެ.
އދގެ ޕޯޑިއަމްގައި ރައީސުލްޖުމްހޫރިއްޔާ ދުނިޔެއަށް ދެއްވީ ވަރަށްވެސް ސާފު މެސެޖެކެވެ. ރައީސުލްޖުމްހޫރިއްޔާ ފާހަގަ ކުރެއްވި ގޮތުގައި، މީގެ ކުރިންވެސް ދިވެހިރާއްޖެއިން ކެރިގެން، އުނދަގޫ ޙާލަތްތަކާ ކުރިމަތިލާފައިވާނެއެވެ. އެގޮތުން، 1965ގައި، ނިކަމެތި ފަގީރު ޤައުމެއްގެ ގޮތުގައި އޮތުމަށްފަހު، މިއަދު ރާއްޖެ މިވަނީ މެދުފަންތިން އާމްދަނީ ލިބޭ ޤައުމެއްގެ ދަރަޖައަށް ދަތުރުކޮށްފައެވެ.
“އަޅުގަނޑުމެންނަށް 1965 ވަނަ އަހަރު އަލުން މިނިވަންކަން ލިބުނުއިރު ތިބީ ދުނިޔޭގެ އެންމެ ފަގީރު ޤައުމުތަކުގެ ލިސްޓްގައި. އަޅުގަނޑުމެންގެ އާބާދީގެ ތިންބައިކުޅަ އެއްބައި މީހުންނަކީ ލިޔަންކިޔަން ނުދަންނަ ބަޔެއް. ކޮންމެ ދިހަ ތުއްތު ކުދިންގެ ތެރެއިން އެއް ކުއްޖަކީ، އެކުއްޖާގެ އުފަންދުވަސް ނުފުރައި ނިޔައުވާ ކުދިން. އަޅުގަނޑުމެންގެ ސިނާޢަތްތަކެއް ނެތް، ކިރިޔާ ބޭރުކުރެވޭ ވަރުގެ މުދާކޮޅެއް އޮތީ. އަދި ދެން ހުރި ފުރުޞަތުތައްވެސް އެއަށްވުރެންވެސް މާތަދު. އެންމެ ފަންސާސް އަހަރުގެ ތެރޭގައި އަޅުގަނޑުމެން މިވަނީ މަތީ މެދުފަންތީގެ އާމްދަނީ ލިބޭ ޤައުމެއްގެ ދަރަޖަ ހޯދާފައި. މިއީ އަޅުގަނޑުމެން އުފަލާއި ފަޚުރުވެރިކަމާއެކު ފާހަގަ ކުރާ ކާމިޔާބީއެއް.” ރާއްޖޭގެ އެހާރާއި މިހާރަށް އަލިއަޅުވާލައްވަމުން ރައީސުލްޖުމްހޫރިއްޔާ ޑރ މުޢިއްޒު ވިދާޅުވިއެވެ.
ރާއްޖޭގެ މިހާރުގެ ޙާލަތަށް އަލިއަޅުވާލައްވަމުން ރައީސް ވިދާޅުވީ މިހާރު ރާއްޖެ އަމާޒު ހިފާފައި މިވަނީ، ޓެކްނޮލޮޖީގެ އީޖާދީ މަސައްކަތާއި ދެމެހެއްޓެނިވި ތަރައްޤީއާއި ސުމޭކުގެ ދާއިރާގެ ބަދަލުތަކާ ދިމާއަށް ކަމަށެވެ.
“އަމާޒެއް ފެންނަން އެބައޮތް. އަދި ނަތީޖާ ޙާޞިލުކުރާނެ ގޮތްތަކެއް އަތުގައި އެބައޮތް. އެހެންވެ، ތަރައްޤީއަކީ ޔަޤީނުންވެސް ޙާޞިލުކުރެވޭނެ މަސައްކަތެއް،” ރައީސްގެ ތަޤްރީރުގައި ކަށަވަރުކޮށްދެއްވި އެވެ.
ރައީސުލްޖުމްހޫރިއްޔާ ފާހަގަ ކުރެއްވިގޮތުގައި އެމަނިކުފާނުގެ ތަރައްޤީގެ މާރެހުގެ ނާރެހަކީ، ވަށާޖެހޭ ފުރިހަމަ ސުމޭކު އިޤްތިޞާދެއް ރާއްޖޭގައި ބިނާ ކުރެއްވުމެވެ. ރައީސުލްޖުމްހޫރިއްޔާގެ އިޤްތިޞާދީ އަމާޒަކީ، 2030 އަންނަން ވާއިރަށް ރާއްޖޭގެ ޤައުމީ އުފެއްދުންތެރިކަމުގެ 15 އިންސައްތައަކީ، ސުމޭކުގެ ދާއިރާގެ ވިޔަފާރިތަކުން އުފެދޭ އާމްދަނީއެއް ކަމުގައި ހައްދަވާށެވެ.
“ކުރިމަގުގައި ކަންކަމަށް މަގު ދައްކާނީ، މަބްގެ ދާއިރާއިން” މަޞްނޫޢީ ސިކުނޑިން ކުރިމަގުގައި ކަންކަން ބައްޓަން ކުރަމުން ދާނެކަމަށް އިޝާރާތް ކުރައްވަމުން ރައީސުލްޖުމްހޫރިއްޔާ ވިދާޅުވިއެވެ. އެގޮތުން މަބް ބޭނުންކޮށްގެން ތމާވެށި މޮނީޓާ ކުރުމާއި 5ޖީ ޓެކްނޮލޮޖީ ބޭނުންކުރުމާއި ސިއްޙީ ފަރުވާގެ ސާމާނުތައް ރާއްޖޭގެ ކަންކޮޅުތަކަށް ޑްރޯން ޓެކްނޮލޮޖީ ބޭނުންކޮށްގެން ފޯރުވައި ދިނުމަކީ ރާއްޖޭގެ އިޤްތިޞާދީ މައިދާނުގައި ކުރިމަގުގައި ބޭނުންކުރާނެ ވަސީލަތްތައް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ޒަމާނުއްސުރެން ރާއްޖެއަކީ، ސަގާފީ ގޮތުން ފަތުރުވެރިކަމަށް ބަރޯސާވެފައިވާ ޤައުމެކެވެ. އެހެންވެ، ޓެކްނޮލޮޖީއަށް ބަރޯސާވާ އިޤްތިޞާދަކަށް ރާއްޖެ ފިރާލުމަކީ ރާއްޖޭގެ އިޤްތިޞާދަށް ގެނެވޭނެ ބޮޑު ބަދަލެކެވެ. އެގޮތުން، ރައީސުލްޖުމްހޫރިއްޔާގެ ވާހަކަފުޅުގައި ލަގްޒަރީ ރިސޯޓްތައް ފިޔަވައި އިޤްތިޞާދީ ތަރައްޤީއަށްޓަކައި އެހެން ދިމާއަކަށް ވެސް ބައްލަވާލެއްވިއެވެ.
“އުފެއްދުންތެރިކަން އިތުރުކުރުމަކީ އިޤްތިޞާދީ ބަދަލުތަކުގެ ތަޅުދަނޑިއަކަށް ވާނެ،” ރައީސުލްޖުމްހޫރިއްޔާ ޑރ. މުޢިއްޒު ވިދާޅުވިއެވެ. އަދި ޑިޖިޓަލައިޒޭޝަން އާއި ސްމާޓް ސިސްޓަމްތަކުގެ ސަބަބުން އިޤްތިޞާދު ޒަމާނީ ކުރުމުގެ އިތުރުން ބޭރުން ދިމާވާ ލޮޅުންތަކާ ކުރިމަތި ލުމަށް ޤައުމުގެ އިޤްތިޞާދު ސާބިތުކޮށް އޮތުމަށް ބާރަކަށް ވާނެ ކަމުގައިވެސް ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޢިއްޒު ފާހަގަކުރެއްވި ގޮތުގައި ފާގަތި، ތިޔާގި ތަނަވަސް ރާއްޖެއެއް ބިނާ ކުރެވޭނީ، ހުރިހައި ރައްޔިތުން ބައިވެރިކޮށްގެންނެވެ. އަންހެނުންނާއި ޒުވާނުންނާއި ޚާއްޞަ ގޮތަށް ކުޅެދިފައިވާ މީހުން ބާރުވެރިކުރުވުމަށް ފަރުމާކޮށްފައިވާ ޕްރޮގްރާމްތަކަކީ ޤައުމުގެ މުސްތަޤުބަލު އެމައްޗަށް ބިނާވެފައިވާ އަސާސްކަމުގައި ރައީސް ވިދާޅުވިއެވެ.
ރައީސް މުޢިއްޒުގެ ސަރުކާރުން ދާދިފަހުން ވަނީ އަންހެން ވިޔަފާރިވެރިންނަށް ޚާއްޞަކޮށްގެން 6.5 މިލިއަން ޑޮލަރުގެ ލޯނު ފެސިލިޓީއެއް ތަޢާރަފް ކޮށްފައެވެ. އެ ލޯނުތަކުގެ 25 އިންސައްތައަކީ، ޚާއްޞަ ގޮތަށް ކުޅެދިފައިޥާ ފަރާތްތަކަށް ކަނޑައަޅާފައިވާ ލޯނުތަކެވެ.
“އަޅުގަނޑުމެންގެ ތަރައްޤީގެ މަސައްކަތުގައި އަންހެނުންނާއި ޒުވާނުން ވާނީ މުހިންމު ބައިވެރިންނަށް. އެމީހުންނަކީ ހަމައެކަނި ކުޅިބަލަން ތިބޭނެ ބަޔެއް ނޫން.” ޑރ. މުޢިއްޒު ވިދާޅުވިއެވެ.
ކަންކަން ނިންމުމުގައި ޒުވާނުންގެ ޙިއްސާ އިތުރު ކުރުމަށް އެމަނިކުފާނުގެ ސަރުކާރުން އަޅާ ފިޔަވަޅެއްގެ ގޮތުގައި ރައީސް މުޢިއްޒު ވަނީ، ޒުވާނުންގެ ބޭނުންތަކާއި ވިސްނުން ސީދާ އެމަނިކުފާނާ ޙިއްޞާކުރުމަށްޓަކައި ޒުވާނުންގެ ލަފާދޭ ރިޔާސީ ބޯޑު އެކުލަވާލައްވާފައެވެ.
“އަޅުގަނޑުމެން އެދޭ ނަތީޖާއަކީ ވަށާޖެހޭ ޝާމިލު ތަރައްޤީއެއް. އެއީ ހަމަހަމަ ކަމާއެކު ފުރުޞަތުތައް ކަށަވަރުކޮށްދޭނެ މަސައްކަތެއް.” ރައީސުލްޖުމްހޫރިއްޔާ ޑރ. މުޢިއްޒު ފާހަގަކުރެއްވި އެވެ.
ރައީސުލްޖުމްހޫރިއްޔާ ޑރ. މުޢިއްޒުގެ ތަޤްރީރުގައި ފާހަގަ ވެގެން ދިޔައީ ރާއްޖޭގެ ޤައުމީ ތަރައްޤީގެ ވިސްނުމަށް ބޮޑު ބަދަލެއް އައިސްފައިވާ ކަމެވެ.
“ނާމާން، ގޮތް ނޭނގޭ ޙާލަތްތަކާ ކުރިމަތި ލުމަކީ ދިވެހިންނަށް އައު ކަމެއް ނޫން.” ދިވެހިންގެ ސާބިތު، ޤައުމިއްޔަތަށް ފަޚުރުވެރިކަމާއެކު އިޝާރާތް ކުރައްވަމުން ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ތަޞައްވުރުގައި ރާއްޖެއަކީ، ނާޒުކު ޖަޒީރާ ގައުމެއް ނޫނެވެ. ނަމަވެސް އެއީ، ކުރިއަށް ވިސްނާ، ދުނިޔޭގެ މައިދާނުގައި ސާބިތުކަމާއެކު، ވަރުގަދަ ޢަޒުމެއްގައި ކުރިމަތިލާ ވަރުގަދަ ކުޅުންތެރިއެކެވެ.
ކޮންމެ ދިވެހި ދަރިއެއްގެ ހިތުގައިވެސް ޤައުމީ ފަޚުރުވެރިކަން އާލާވާފަދަ ޤައުމިއްޔަތުގެ ރޫހާއެކު، އދގެ އާންމު މަޖިލީހުގައި ރައީސް މުޢިއްޒު ދެއްކެވި ވާހަކަފުޅުގައި، ޓެކްނޮލޮޖީއާއި އިޖުތިމާޢީ ގޮތުންވެސް ރާއްޖޭގެ ފުރިހަމަ ޤާބިލުކަން ބޭނުންކުރުމަށް ގޮވާލެއްވިއެވެ.
“2040 ވަނަ އަހަރުގެ ނިޔަލަށް އަޅުގަނޑު ބޭނުންވަނީ ރާއްޖެއަކީ ފުރިހަމައަށް ތަރައްޤީވެފައިވާ ޤައުމެއްގެ ގޮތުގައި ދެކެން- އިޙުތިރާމް ލިބިގަންނަ ބަސްވިކޭ، ސާބިތު ޤައުމެއްގެ ގޮތުގައި އޮތުން.” ރައީސުލްޖުމްހޫރިއްޔާ ޑރ. މުޢިއްޒު ވިދާޅުވިއެވެ.
އދގައި ރައީސުލްޖުމްހޫރިއްޔާ ކުރެއްވި ތަޤްރީރަކީ، ބަދަލަކާއެކު ރާއްޖެ އައު ފަތިހަކަށް އަލިވިލުމުގެ ޒަމާނެއް ފެށުމުގެ އިޝާރާތެކެވެ. އެއީ ރައްޔިތުންނަށް ފާގަތި ކުރިމަގަކަށް އޮތް ވަޢުދެކެވެ.
