ކެންޔާގެ ޖޯމޯ ކެންޔާޓާ އިންޓަނޭޝަނަލް އެއާޕޯޓް (ޖޭކޭއައިއޭ) ގެ އޮޕަރޭޝަންތަކާ އިންޑިއާގެ އަދާނީ ގްރޫޕުން ހަވާލުވެއްޖެ އެވެ. އެ އެއާޕޯޓަކީ އިންފްރާސްޓްރަކްޗާގެ ގިނަ މައްސަލަތައް ކުރިމަތިވެފައިވާ އެއާޕޯޓެކެވެ. އޭގެ ތެރޭގައި މިދިޔަ ދެތިން އަހަރު އެއާޕޯޓު ޓާމިނަލްއަށް ފެން ލީކުވުމާއި ގިނައިން ކަރަންޓް ކެނޑުން ފަދަ މައްސަލަތައް ދިމާވެފައި ވެއެވެ.
މިއަހަރުގެ މާޗް މަހު އަދާނީ ގްރޫޕުން ވަނީ “ބިލްޑް، އޮޕަރޭޓް އެންޑް ޓްރާންސްފާ” މޮޑެލްގެ ދަށުން ޖޭކޭއައިއޭ ހިންގުމަށް 30 އަހަރުގެ އެއްބަސްވުމެއްގައި ސޮއިކޮށްފައެވެ.
އަދާނީ ހަވާލުވުމުން މުވައްޒަފުންނަށް ކުރިމަތިވެދާނެ ގޮންޖެހުންތަކާ ހެދި މުޒާހަރާތައް ކޮށްފައި ވެއެވެ. ނަމަވެސް އަދާނީ ކުންފުނިން ވަނީ މުވައްޒަފުންނާ މެދު ލުއި ގޮތްތަކެއް ގެންގުޅޭނެ ކަމުގެ އިޝާރާތެއް ދީފައެވެ. އަދާނީން ދިން ޔަގީން ކަމާއެކު، މުވައްޒަފުންގެ ނުތަނަވަސްކަމަށް ލުޔެއް ލިބިފައި ވެއެވެ.
ޖޭކޭއައިއޭއަށް އަދާނީގެ އިންވެސްޓްމަންޓަކީ މުހިންމު އިންފްރާސްޓްރަކްޗަރގެ އިންވެސްޓްމެންޓެއް ކަމަށް ކެންޔާ ޓާއިމްސްއިން ބުނެއެވެ.
ކެންޔާއަކީ އިންޑިއާގެ އިންވެސްޓްމެންޓްތައް ގިނަ ޤައުމެކެވެ. އަދި މިދިޔަ ދިހަ އަހަރުގެ ތެރޭގައި އިންޑިއާއިން ވަނީ އެފްރިކާގައި ޖުމުލަކޮށް އިންވެސްޓްމެންޓްތައް އިތުރުކޮށްފައެވެ.
އެގޮތުން، ރީޓެއިލް އަދި ހޮސްޕިޓަލިޓީ އިންޑަސްޓްރީން ފެށިގެން އިންފްރާސްޓްރަކްޗާ އާއި ޓެލެކޮމިއުނިކޭޝަން ގެ ދާއިރާއިން އިންޑިއާއިން ވަނީ އެފްރިކާގައި އިންވެސްޓް ކޮށްފައެވެ.
އެފްރިކާގައި ފައިތިލަ ސާބިތުކޮށްފައިވާ ކުންފުނިތަކުގެ ތެރޭގައި، ޓާޓާ، ބާރްތީ އެއާޓެލް، އަދި މަހިންދްރާ ފަދަ ކުންފުނިތައް ހިމެނެއެވެ.
ކެންޔާގައި އިންޑިއާގެ ވިޔަފާރިތަކުން ވަނީ ސިއްހީ ފަރުވާއާއި ދަނޑުވެރިކަން ފަދަ ދާއިރާތަކުގައި އިންވެސްޓް ކޮށްފައެވެ. މިސާލަކަށް ސިއްހީ ޚިދުމަތްދޭ އިންޑިއާގެ އެންމެ ބޮޑު އެއް ކުންފުނި އެޕޯލޯ ހޮސްޕިޓަލްސް އިން ވަނީ ކެންޔާގައި ޖޮއިންޓް ވެންޗާތަކެއް އުފައްދާފަ އެވެ.
އިންފްރާސްޓްރަކްޗާ، ބަނދަރު މެނޭޖްމަންޓާއި ހަކަތައިގެ ދާއިރާގެ ތަޖުރިބާ ލިބިފައިވާ ދުނިޔޭގެ ބޮޑު ކުންފުންޏެއް ކަމަށްވާ އަދާނީ ގްރޫޕުން ކެންޔާ އެއާޕޯޓްގައި އިންވެސްޓް ކުރުމަކީ ދެ ފަރާތަށް ލިބިގެންދާ ބޮޑު ކާމިޔާބީއެކެވެ.
އަދާނީއަކީ، އިންޑިއާގެ އެތައް އެއާޕޯޓާއި ބަނދަރުތަކެއް ދުނިޔޭގެ ފެންވަރުގެ ފެސިލިޓީތަކަށް ބަދަލުކޮށްފައިވާ ކުންފުންޏެކެވެ. މުމްބާއީ، މުންޑްރާ، އަދި ލަކްނޯ ފަދަ ތަންތަނުގައި އަދާނީގެ އިންވެސްޓްމަންޓުގެ ސަބަބުން އެންމެ ޒަމާނީ އިންފްރާސްޓްރަކްޗާ އުފެދި، ވަޒީފާ ގެ ފުރުސަތުތައް އިތުރު ވެފައި ވެއެވެ.
އިރުމަތީ އެފްރިކާގެ ވިޔަފާރިއާއި ފަތުރުވެރިކަމުގެ މަރުކަޒެއްގެ ގޮތުގައި ތަރައްޤީވަމުން އަންނަ ކެންޔާއަށް ދުނިޔޭގެ ފެންވަރުގެ އެއާޕޯޓެއް މުހިންމު ވެފައި ވެއެވެ.
ކޮންފެޑެރޭޝަން އޮފް އިންޑިއަން އިންޑަސްޓްރީ (ސީއެމް) އިން ބުނާ ގޮތުގައި އިންޑިއާގެ ވިޔަފާރިތަކުން އެފްރިކާގައި 6 ލައްކައަށް ވުރެން ގިނަ ވަޒީފާ އުފައްދާފައި ވެއެވެ.
