ބަނގްލަދޭޝްގެ އިންތިޚާބީ ސަރުކާރު ވައްޓާލީ އިންގިލާބަކުން ކަމަށާއި އެކަން ކުރިއަށް ގެންދިޔައީ ފުރިހަމަ ރޭވުންތެރިކަމާއެކުގައި ކަމަށް ވަގުތީ ސަރުކާރު ހިންގަވާ އިސް މުޝީރު މުޙައްމަދު ޔޫނުސް ވިދާޅުވެއެވެ. އެެމެރިކާއަށް ކުރައްވާ ދަތުރުފުޅުގައި ކްލިންޓަން ގްލޯބަލް އިނިޝިއޭޓިވް ލީޑާޒް ސްޓޭޖްގައި ވާހަކަ ދައްކަވަމުން ޔޫނުސް ވިދާޅުވީ ބަނގްލަދޭޝްގެ ސަރުކާރު ބަދަލު ކުރުމަށް ގެނައި އިންގިލާބުގެ ރޭވުންތެރިކަން ފުރިހަމަ ކަމުން، އެކަމުގެ އަޑީގައި ތިބީ ކޮން ބައެއްކަން އޭރު ނޭނގުނު ކަމަށެވެ.
އެ ވާހަކައާއެކު ޔޫނުސް ވަނީ ދެ ޒުވާނަކު، އަންހެން ކުއްޖަކާއި ފިރިހެން ކުއްޖަކު ސްޓޭޖަށް ގެނަސް ތައާރަފް ކޮށްދެއްވާފައެވެ. އަދި ފިރިހެން ކުއްޖާ ތައާރަފް ކޮށްދެއްވަމުން ވިދާޅުވީ އެ ޒުވާނާ ތަކުރާރުކޮށް އޭނާގެ ލީޑަރޝިޕް ރޯލަށް ނޫނެކޭ ބުންޏަސް އިންގިލާބު ރޭވުމުގައި އަޑީގައި ހުރީ އޭނާ ކަމަށެވެ. އަދި އެކަމުގައި ސާބިތުވެ ހުންނާނެ ކަން އޭނާ ތަކުރާރުކޮށް ބުނަމުން ދިޔަ ކަމަށާއި މަރާލިއަސް ސަރުކާރު ވައްޓާލުމުގެ މަސައްކަތް ދޫކޮށްނުލާނެ ކަމަށް އޭނާ ބުނެފައިވާ ކަމަށްވެސް ޔޫނުސް ވިދާޅުވިއެވެ.
ބަނގްލަދޭޝްގެ ސަރުކާރު ވައްޓާލާފައިވަނީ އިންގިލާބަކުން ކަމަށް ޙަސީނާއާއި އަވާމީ ލީގްގެ ލީޑަރޝިޕުން ކުރިންވެސް ބުނެފައި ވެއެވެ. ޔޫނުސްގެ މި ވާހަކައާއެކު އެކަމަށް ބުރަދަނެއް ލިބިގެން ދިޔައީއެވެ.
