ރާއްޖޭގެ މަތީ ތަޢުލީމުގައި މިންގަނޑުތައް ކަނޑައެޅުމުގައި އިސް ހަރަކާތްތެރިޔަކީ، ވިލާ ކޮލެޖުކަމަށް ވިދާޅުވެ، ސެޓްފިކެޓް ޙަވާލު ކުރުމުގެ ރައްމިއްޔާތުގައި، ރައްޔިތުންގެ މަޖިލީހުގެ ނާއިބް ރައީސް އަޙުމަދު ނާޘިމް ވިލާ ކޮލެޖަށް ތަޢުރީފު ކުރައްވައިފިއެވެ.
ނާޘިމް ވަނީ ވިލާ ކޮލެޖުން ބޭރުގެ ޔުނިވާސިޓީތަކުގެ ކޯސްތައް ރާއްޖެއަށް ތައާރަފް ކުރަމުން ގެންދާތީ، އެކަމަށްވެސް ތަޢުރީފް ކުރައްވާފައެވެ. ނާޘިމް ވިދާޅުވީ އެފަދަ މުއައްސަސާތަކުގެ ޕްރޮގްރާމުތައް ރާއްޖޭގައި ހިންގުމުން ބޭރު ފައިސާ ރާއްޖޭގައި ރައްކާ ކުރެވި ދަރިވަރުންނަށް ރާއްޖޭގައި ތިބެގެން މަތީ ފެންވަރުގެ ތަޢުލީމެއް ޙާޞިލު ކުރެވޭ ކަމަށެވެ.
ނާޘިމްގެ ވާހަކަފުޅުގައި ވިލާ ކޮލެޖު ޔުނިވަރސިޓީއެއްގެ ދަރަޖަ ހޯދުމަށް ކުރާ މަސައްކަތަށް އަލިއަޅުވާލައްވަމުން ވިދާޅުވީ، ކޮލެޖުތައް ޔުނިވާސިޓީއަށް ބަދަލުކުރުމާ ބެހޭ ބިލް މަޖިލީހުގެ ކޮމިޓީ މަރުހަލާއިން ފާސްކޮށްފައިވާ ކަމަށާއި އަންނަ އަހަރުގެ މިފަދަ ހަފްލާއެއް އަންނަންވާއިރަށް، ވިލާ ކޮލެޖަށް ޔުނިވާސިޓީއެއްގެ ދަރަޖަ ލިބިފައިވާނެ ކަމަށް އުންމީދު ކުރައްވާ ކަމަށެވެ.
ގްރެޖުއޭޓް ދަރިވަރުންނާ މުޚާޠަބު ކުރައްވައި ވާހަކަފުޅު ދައްކަވަމުން ނާޘިމް ވިދާޅުވީ، ރާއްޖޭގައި ވަޒީފާގެ ބާޒާރުގައި ފަހި ފުރުޞަތުތައް ދަސްވެނިންނަށް އެބައޮތް ކަމަށެވެ. އެގޮތުން އޭނާ ފާހަގަ ކުރެއްވީ، ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް އިފްތިތާޙު ކުރެވުމުން، ގާތްގަނޑަކަށް 1،600 ހައި މަތީ ފެންވަރުގެ ވަޒީފާތައް އުފެދިގެން ދާނެ ކަމަށާއި، އެކަމުގެ ސަބަބުން ހުނަރުވެރި ދަސްވެނިންނަށް ވަޒީފާގެ ފުރުޞަތު ފަހިވެގެން ދާނެ ކަމަށެވެ. އޭގެ އިތުރުން ރާއްޖޭގައި ހުރި ފުރުޞަތުތަކުގެ މައްޗަށްވެސް އޭނާގެ ވާހަކަފުޅުގައި އަލިއަޅުވައި ލެއްވިއެވެ. ނާޘިމް ވިދާޅުވީ، އޮޑިޓިން އާއި ޤާނޫނީ ދާއިރާއިން ރާއްޖޭގައި ފުރުޞަތުތައް ފަހިވަމުންދާ ކަމަށާއި ދަސްވެނިން އެފުރުޞަތުތަކުގެ ބޭނުން އެންމެ ފުރިހަމައަށް ހިތްޕެވުމަށް އެދިވަޑައިގަންނަވާ ކަމަށެވެ.
ރާއްޖޭގެ ތަޢުލީމީ ދާއިރާއަށް ވިލާ ކޮލެޖުގެ ބާނީ ޤާސިމް އިބްރާހީމް ކުރައްވަމުން ގެންދަވާ ޚިދުމަތަށްވެސް ނާޘިމް ތަޢުރީފް ކުރެއްވިއެވެ.
