އިންޓަނޭޝަނަލް ކޯޓު އޮފް ޖަސްޓިސްއިން 2019 ވަނަ އަހަރު ޙުކުމް ކުރީ މޮރިޝިއަސްއަށް ފޯޅަވަހި ދިނުމަށެވެ. އެއިރު އެ ޙުކުމް ބޮލާލައި ޖަހައި އިނގިރޭސިން އެކަން ތަންފީޒު ކޮށްފައެއް ނުވެއެވެ. ނަމަވެސް މިހާރު އިނގިރޭސި ސަރުކާރުން ވަނީ ފޯޅަވަހީގެ ސިޔާދަތު މޮރިޝިއަސްއަށް ދިނުމަށް ނިންމާފައެވެ. އަދި ފޯޅަވަހި އަތޮޅުގެ ޖަޒީރާތަކުގައި އިނގިރޭސިން ލުއްސައި ވިއްސިވިހާލިކޮށްލި މީހުން އާބާދު ކޮށްދޭނެ ކަމަށް ބުނެފައެވެ.
އެއާއެކު އިނގިރޭސިން މޮރެޝިއަސްއާއެކު އެއްބަސްވެފައި ވަނީ، އެމެރިކާގެ އަސްކަރީ މަރުކަޒު ހިންގާ ރަށް އިނގިރޭސިންގެ ދަށުގައި ބާއްވާށެވެ.
ދެ ފަރާތުން ގުޅިފައިވާ ބަޔާނެއްގައި ބުނެފައި ވަނީ އިންޑިއާއާއި އެމެރިކާއިން މެދުވެރިވެގެން ހިންގި މަޝްވަރާތަކަށް ޝުކުރުވެރިވާ ކަމަށެވެ. އަދި މި ކަމާ ގުޅޭ ގޮތުން ދެ ފަރާތުން ސޮއިކުރާ އެއްބަސްވުމުން ދެ ޤައުމުގެ ގުޅުމުގެ އައު ބާބެއް ފެށިގެން ދާނެ ކަމަށެވެ.
