ކަނޑުގެ ވެށި ކިލަނބުވުމަށް މެދުވެރިވާ ކަންތައްތަކުން ކަނޑުގެ ވެށި ސަލާމަތް ކުރުމަށް، ބައިނަލްއަޤްވާމީ ފެންވަރުގައި ގުޅިގެން މަސައްކަތް ކުރުމަށް ރައްޔިތުންގެ މަޖިލީހުގެ ނާއިބް ރައީސް އޮނަރަބަލް އަޙުމަދު ނާޡިމް ގޮވާލައްވައިފައެވެ.
ގްލޯބަލް އޯޝަން ޑިވެލޮޕްމަންޓް ފޯރަމްގައި ބައިވެރިވެ ވަޑައިގަންނަވާ މަންދޫބުންނަށް ޝާންޑޮންގްގެ ގަވަރުނަރު އިންތިޒާމު ކުރެއްވި ރިސެޕްޝަންގައި ވާހަކަފުޅު ދައްކަވަމުން، އޮނަރަބަލް ނާޡިން ވަނީ، ދުނިޔޭގެ ފެންވަރުގައި ކަނޑުގެ ވެށި ޙިމާޔަތް ކުރުމަށާއި 2025ގައި ބާއްވާ އދގެ އޯޝަން ކޮންފަރެންސްގެ ކުރިން ޤައުމުތަކުން ކަނޑުތައް ޙިމާޔަތް ކުރުމަށް އަތުގުޅާލުމުގެ މުހިންމު ކަމާ ބެހޭ ގޮތުން ވާހަކަ ދައްކަވާފައެވެ.
އޮނަރަބަލް ނާޡިމް ވިދާޅުވީ، ރާއްޖެއާއި ޗައިނާއަކީ، ކަނޑުގެ ވެށި ހިމާޔަތް ކުރުމަށް މުހިންމު މަސައްކަތްތަކެއް ކުރާ ދެ ޤައުމު ކަމަށެވެ.
ޝާންޑޮންގްގެ ގަވަރުނަރު ބޭއްވެވި ރިސެޕްޝަންގައި ޗީފް ގެސްޓުގެ ހައިސިއްޔަތުން ވާހަކަދައްކަމުން، އޮނަރަބަލް ނާޡިމް ވަނީ، ކަނޑު ކިލަނބުކުރުމާއި، މަސްމަހާމެހި ނެތިގެންދާ މިންވަރަށް އިތުރަށް މަސްވެރިކަން ކުރުމާއި، ކަނޑުގެ ލޮނޑުގަނޑު ތަޣައްޔަރު ކުރާ ފަދަ ކަންތައްތަކުން ކަނޑުގެ ވެށި ސަލާމަތްކުރުމަށް، ދުނިޔޭގެ ފެންވަރުގައި އެންމެ ގުޅިގެން މަސައްކަތް ކުރުމުގެ މުހިންމު ކަމުގެ މައްޗަށް ވެސް ވާހަކަ ދައްކަވާފައެވެ.
“ކަނޑަކީ، އަޅުގަނޑުމެން ޙިއްސާކުރާ ކުރިމަގުގެ އެންމެ އަސާސީ ބައި” އޮނަރަބަލް ނާޡިމް ވިދާޅުވިއެވެ.
އޮނަރަބަލް ނާޡިމްގެ ވާހަކަފުޅުގައި ޝާންޑޮންގް ޕްރޮވިންސްގައި ވެށި ހިމާޔަތް ކުރުމަށް ކުރިއަށްގެންދާ އިސްނެގުންތަކަށް ތަޢުރީފް ކުރެއްވިއެވެ. އެގޮތުން ޝާންޑޮންގްގެ މެރިން އިކޮލޮޖިކަލް ޕްރެޒަވޭޝަންގެ 31 މަޝްރޫޢާއި ސާފު ހަކަތަ އުފެއްދުމަށް ކުރިއަށް ގެންދާ މަޝްރޫޢުތަކަށް ތަޢުރީފު ކުރައްވަމުން އެއީ، “ރާއްޖެފަދަ ޤައުމުތަކަށް ނަމޫނާއެއް” ކަމަށް ވިދާޅުވިއެވެ.
އޮނަރަބަލް އަޙުމަދު ނާޡިމް ޗައިނާއަށް ކުރައްވާ ދަތުރުފުޅަކީ، ގްލޯބަލް އޯޝަން ޑިވެލޮޕްމަންޓް ފޯރަމްގައި ބައިވެރިވެ ވަޑައިގަތުމަށް ކުރައްވާ ދަތުރުފުޅެކެވެ.
