ސޮފްޓް ޑްރިންކްސް ޖަޔަންޓް ކޮކާކޯލާ އިން އޮސްޓްރިއާގައި ބައި ލީޓަރުގެ ޕްލާސްޓިކް ފުޅީގެ 28 މިލިއަން ފުޅި އަނބުރާ ގެންދަނީ އެވެ. ފެކްޓްރީގައި ދިމާވި ހާދިސާއަކަށް ފަހު ފުޅިތަކުގައި ކުދިކުދި މެޓަލް ކޮޅުތަކެއް ހުރެދާނެ ކަމުގެ ނުރައްކަލެއް ފާހަގަކޮށްފައިވެ އެވެ.
މިއީ ކޮކާކޯލާއިން 25 އަހަރު ތެރޭގައި އެންމެ ގިނައިން ރިކޯލް ކުރި ފަހަރެވެ. “ރައްކާތެރިކަމުގެ ފިޔަވަޅެއްގެ ގޮތުގައި” ކުރި ކަމެއް ކަމަށް ބުނެފައި ވެއެވެ.
ކޮކާކޯލާ އުފައްދާ ކުންފުނިން ބުނީ ރިކޯލް ކޮށްފައިވަނީ 2025 ވަނަ އަހަރުގެ ފެބްރުއަރީ 4 އާއި 2025 ވަނަ އަހަރުގެ އޭޕްރީލް 12 އާ ދެމެދު ބެސްޓް ބިފޯ ޑޭޓު ޖަހާފައިވާ ކޯކް، ފެންޓާ، ސްޕްރައިޓް އަދި މެޒޯމިކްސް ބުއިންތައް ކަމަށެވެ.
އެ ކުންފުނިން ބުނީ ބައި ލީޓަރުގެ ފުޅިތަކުގައި “އުފެއްދުމުގައި ފަންނީ ގޯހެއްގެ ސަބަބުން ކުދިކުދި މެޓަލް ކޮތަޅުތައް” ހުރެދާނެ ކަމުގެ ފުރުސަތު އޮވެދާނެ ކަމަށެވެ.
“ސިއްހީ ނުރައްކަލެއް ކުރިމަތިވެދާނެތީ އެކަމުގެ އަސަރު ފޯރާފާނެ ތީ އުފެއްދުންތައް ބޭނުން ނުކުރުމަށް އަޅުގަނޑުމެން ލަފާދެނީ،” އެ ކުންފުނިން ނެރުނު ބަޔާނުގައިވެ އެވެ.
ކޮކާކޯލާއިން ބުނީ އެ ފިޔަވަޅު އެޅީ “އޮސްޓްރިއާގެ ކަމާބެހޭ ފަރާތްތަކާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން” ކަމަށާއި މިއީ ހަމައެކަނި ބައި ލީޓަރުގެ ފުޅިތަކަށް ދިމާވި މައސަލައެއް ކަމަށެވެ.
