ދައުލަތުގެ އެއްވެސް ބާރެއް، ނުވަތަ މިނިވަން މުއައްސަސާއެއް، ނުވަތަ އިންތިޚާބު ކުރެވޭ އެއްވެސް ބައެއްގެ ބާރުތަކުގެ ތެރެއަށް ނުފޫޒު ފޯރުއްވައި ނަހައްދަވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. ރައީސް މިއަދު ކުރެއްވި ޓުއީޓެއްގައި ވިދާޅުވެފައި ވަނީ، ނުފޫޒު ފޯރުވުމަކީ، “އަޅުގަނޑު މިއަދާ ހަމަޔަށްވެސް ކުރިކަމެއްނޫން އަދި ކުރިޔަށް އޮތް ތާނގައިވެސް ކުރާނޭ ކަމެއް ނޫން!” ކަމަށެވެ.
ނަމެވެސް ބާރުތަކާއި މުއައްސަސާތަކުން ހަމައިގައި ތިބެގެން ވާޖިބުތައް އަދާކުރާނެތޯ ކަށަވަރު ކުރައްވާނެކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.
“ޢަދުލުވެރިކަމާއި، އިންސާފާއި، ހަމަހަމަކަމާއެކު، ވަކި މީހަކަށް ބެލުމެއްނެތި، ހަލުއި ދުވެލީގައި މަސައްކަތްކުރަމުން ދޭތޯ ކަށަވަރުކުރުމާއި އެ މަގަށް ކަންކަން ބައްޓަން ކުރުމަށް ކުރަންޖެހޭ އެންމެހާ ކަންކަން ކުރުމަށް، ޤާނޫނާއި ޤަވާޢިދަށް ގެންނަންޖެހޭ އިސްލާހެއްވާނަމަ އެ އިސްލާޙެއް ގެންނަން ސަރުކާރުން ހުށަހަޅަމުން ގެންދާނެ ވާހަކަ ދަންނަވަން” ރައީސުލްޖުމްހޫރިއްޔާގެ ޓުއީޓުގައި ވިދާޅުވެފައި ވެއެވެ.
ސަރުކާރުން ވަނީ އިލެކްޝަންސް ކޮމިޝަންއާއި އެންޓި ކަރަޕްޝަން ކޮމިޝަންގެ ރައީސާއި ނާއިބް ރައީސް މެމްބަރުން އަމިއްލައަށް އިންތިޚާބު ކުރުމުގެ ބަދަލުގައި، އެ މެމްބަރުންގެ ތެރޭން މަޖިލިހުން އިޚުތިޔާރު ކުރާ ފަރާތްތައް އެ މަޤާމުތަކަށް ރައީސުލްޖުމްހޫރިއްޔާ އައްޔަން ކުރައްވާ ގޮތަށް ދެ މުއައްސަސާގެ ޤާނޫނަށް އިސްލާޙެއް ހުށަހަޅާފައެވެ.
އިދިކޮޅު ފަރާތްތަކުން އެކަމާ ނުރުހުން ފާޅުކޮށް ވާހަކަ ދައްކަން ފަށާފައެވެ.
