ގާނޫނުއަސާސީއަށް ގެންނަ އިސްލާހުތަކުގެ ތެރޭގައި ރިޔާސީ ދައުރު ފަށާ ދުވަސް ގާނޫނުގައި ލިޔަން ނިންމައިފިއެވެ. ރިޔާސީ ދައުރު ފަށާ ދުވަހަކީ ނޮވެމްބަރު 11 ކަމަށް ކަނޑައަޅާ އެގޮތަށް ގާނޫނު އަސާސީ އިސްލާހު ކުރާނެކަން ބަންޑާރަ ނައިބު އިއްޔެ ބެއްވެވި ޕްރެސްގައި ފާހަގަކުރެއްވިއެވެ.
މިފަދަ އިސްލާހުތަކަށް ރައްޔިތުންގެ ޚިޔާލު ހޯއްދަވާނެ ކަމަށް ބަންޑާރަ ނާއިބް އަހުމަދު އުޝާމް ވިދާޅުވިއެވެ.
“މި ދެންނެވި އިސްލާހަކީ އެ އިސްލާހު ގެނައުމަށްޓަކައި ޕަބްލިކް ރިޕެރެންޑަމަކަށް ދާންޖެހޭ ކަހަލަ އިސްލާހެއް ކަމަށްވާތީ މި ކަހަލަ އިސްލާހުތައް އަޅުގަނޑުމެންނަށް ކުޑަކުޑަ ވަގުތުކޮޅެއް ނަގައިގެން އެކަން ކޮށްލެވޭނީ.” ބަންޑާރަ ނައިބު އަހްމަދު އުޝާމް
ނޮވެމްބަރު މަހުގެ 11 ވަނަ ދުވަހު ފަށަމުން އައި ރިޔާސީ ދައުރު ފަށާ ދުވަސް ބަދަލުވީ 2013 ވަނަ އަހަރު ރިޔާސީ އިންތިހާބުގެ ފުރަތަމަ ބުރު ސުޕްރީމް ކޯޓުން ބަދަލުކުރުމުން ދެވަނަ ފަހަރަށް ވޯޓްލާން ޖެހުމުން އެ އަހަރުގެ ރިޔާސީ އިންތިހާބުގެ ވޯޓް ނިންމާ ނޮވެމްބަރު 11 އަށް ރައީސަކު އިންތިހާބު ނުކުރެވުމުގެ ސަބަބުންނެވެ.
އޭގެ ފަހުން ރައީސުން ހުވައި ކުރައްވަމުން ގެންދެވީ ނޮވެމްބަރު 17ން ފެށިގެންނެވެ.
