ފުރަތަމަ ފަހަރަށް ނަޞްރުގެ ދުވަހަށް ޚާއްސަކޮށްގެން ބާއްވާފައިވާ މައުރަޒު، ރައީސުލްޖުމްހޫރިއްޔާ، އަދި ދިވެހި ސިފައިންގެ ވެރިޔާ، ޑރ. މުޙައްމަދު މުޢިއްޒު މިއަދު ހުޅުއްވައި ދެއްވައިފިއެވެ. މި މައުރަޒު ބާއްވާފައި ވަނީ ދިވެހި ސިފައިންނެވެ.
އާޓް ގެލަރީގައި އެމްއެންޑީއެފުން ކުރިއަށް ގެންދާ މައުރަޒު އޮންނާނީ މިއަދުން ފެށިގެން އަންނަ ހޮނިހިރު ދުވަހާ ހަމައަށެވެ. މި މައުރަޒުގައި 200 އަށް ވުރެ ގިނަ ޑިސްޕްލޭ އާންމުނަށް ދައްކާލާފައި ވެއެވެ. އަދި ނޮވެމްބަރު 3 ގައި ކުލީ ތަމަޅަ ސިފައިންނާއެކު ބާޣީން ދިން އުދުވާނުގައި ދިފާއީ ހަމަލައަށް ދިވެހި ސިފައިން ބޭންކުރި އަސްލު ހަތިޔާރާއި ތަކެތި މިމައުރަޒުގައި ބަހައްޓާފައި ވެއެވެ.
ނަޞްރު ދުވަހަށް ޚާއްސަކޮށްގެން ޖަލްސާއެއް ބޭއްވުމަށްވެސް ހަމަޖެހިފައި ވެއެވެ. އެ ޖަލްސާ އޮންނާނީ މިރޭ އެވެ.
މި އަހަރުގެ ނަސްރުގެ ދުވަހުގެ ހަރަކާތްތައް ފެށުނީ، އިސްލާމީ މަރުކަޒުގައި ޖަމާޢަތުގައި ފަތިސް ނަމާދު ކުރުމުންނެވެ. އެ ޖަމާޢަތުގައި ރައީސް މުއިއްޒާއި ނައިބު ރައީސް ހުސައިން މުހައްމަދު ލަޠީފާއި ސިފައިން ބައިވެރިވެރިވެ ވަޑައިގަތެވެ.
ކޮންމެ އަހަރަކުވެސް ނޮވެމްބަރު 3 ގައި ނަސްރުގެ ދުވަސް ރާއްޖެއިން ފާހަގަ ކުރެއެވެ.
3 ނޮވެމްބަރަކީ ސްރީލަންކާގެ ޕީޕަލްސް ލިބަރޭޝަން އޯގަނައިޒޭޝަން އޮފް ޓެމިލް އީލާމް (ޕްލޮޓް) ގެ 80 ކުލީ ސިފައިންނާއެކު، ދިވެހިންގެ ބަޔަކުކަމަށްވާ އަބްދުﷲ ލުތުފީ އާއި އަހުމަދު ނާސިރު ރައްޖެއަށް ޓެރަރިސްޓް ހަމަލައެއް ދިން ހާދިސާއެވެ. އެ ދެމީހުންގެ އިތުރުން ކަރޯ އައްބާހާއި އަބްދުﷲ ޝާހިދުވެސް އޭގައި ހިމެނުނެވެ.
