ސިފައިންގެ ޚިދުމަތްތައް ހަރުދަނާކުރުމަށާއި އެ މުއައްސަސާގެ ޤާބިލުކަން އިތުރު ކުރުމަށް، މުހިންމު މަސައްކަތްތަކެއް ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޒިންމަވައިފިއެވެ. ނަޞްރު ދުވަހުގެ ޖަލްސާގައި ޤައުމާ މުޚާތަބު ކުރައްވައި ވާހަކަ ދައްކަވަމުން ރައީސް ވިދާޅުވީ، މި އަންނަ އަހަރުގެ ތެރޭގައި، ސިފައިންގެ ޚިދުމަތަށް ބޭނުންވާ ހަތިޔާރާއި އާލާތްތަކުގެ ބޮޑު ޢަދަދެއް ހޯއްދަވައިދެއް ވާނެ ކަމުގައެވެ. ރައީސް ޑރ. މުޢިއްޒު ވަނީ ޤައުމުގެ މިނިވަންކަން ޙިމާޔަތްކުރުމަށްޓަކައި، އަދި ޤައުމުގެ ސަލާމަތާއި އަސްކަރީ ބާރު ވަރުގަދަކުރުމަށްޓަކައި މި ސަރުކާރުން މީހުން ތަމްރީނުކޮށް އަސްކަރީ މަރުކަޒުތައް މަރާމާތުކޮށް، ހަޔިތާރު ހޯދުމުގެ މުހިންމު މަސައްކަތްތައް ކުރައްވާނެ ކަމުގައި ވިދާޅުވެފައެވެ.
ފެސިލިޓީތައް މަރާމާތު ކުރުމުގައި، ގިރިފުށީގެ ކެޕޭސިޓީ ވަރުގަދަކުރުމަށްޓަކާ ބިން އިތުރުކުރުމަށް ނިންމަވާފައިވާކަން ރޭ ރައީސުލްޖުމްހޫރިއްޔާ އިޢުލާން ކުރެއްވިއެވެ. އަދި އެކަމުގެ ތަފްޞީލަށް ވަޑައިގަންނަވަމުން، ގިރިފުށިން ހިއްކެން އޮތް 13 ހެކްޓަރުގެ ސަރަހައްދު ހިއްކުމަށާއި ޝޯ ޕްރޮޓެކްޝަނާއި ވަށާ ހިލަ ޖެހެހުމަށާއި އެރަށަށް ބޭނުންވާ ބަނދަރު ހެދުމުގެ މަސައްކަތް މިއަންނަ އަހަރުތެރޭގައި ފަށްޓަވާނެކަމުގައި ވިދާޅުވިއެވެ.
އަދި ސިފައިންގެ އެއްގަމުގެ ބާރު ހަރުދަނާ ކުރުމަށް، ބޭނުންވާ ހަތިޔާރު ހޯދައި އެކިއެކި އާލާތްތައް ސިފައިންނަށް ހޯދުމަށް މަސައްކަތް ކުރައްވާނެ ކަމުގައިވެސް ވިދާޅުވިއެވެ.
އެކަމަށްޓަކައި، މިހާރުވެސް އެކުވެރި ބައެއް ދައުލަތްތަކާ އެކީ ބައެއް މަސައްކަތްތައް ކުރިއަށްދާ ކަމަށް ވިދާޅުވިއެވެ. އަދި ހަތިޔާރާ ބައެއް އާލާތްތައް ގަތުމަށްޓަކައި މިހާރު ހުށަހަޅާފައިވާ ބަޖެޓުގައިވެސް ވަކި އަދަދެއް ކަނޑައަޅާފައިވާނެކަމުގައި ވިދާޅުވިއެވެ.
ސިފައިންގެ ޤާބިލުކަން އިތުރު ކުރުމަށް ކުރާ މަސައްކަތުގައި، އެއާކޯ ޤާއިމުކުރުމާއި ޒަމާނީ ޓެކްނޮލޮޖީ ހިމެނޭ ޔޫއޭވީތައް ގެންނަވައި، ގައުމުގެ އިކޮނޮމިކް ޒޯން އަބަދުވެސް ބެލެހެއްޓޭނެފަދަ ގޮތަކަށް ސިފައިންގެ މަސައްކަތް ހަރުދަނާ ކުރައްވާ ކަމުގައި ވިދާޅުވިއެވެ.
ކޯސްޓްގާޑުގެ ކެޕޭސިޓީ ވަރުގަދަކުރުމަށްޓަކައި މިއަދު ސްޕެޝަލް ބޯޓް ސްކޮޑްރަން އިފްތިތާޙްކުރެވިގެން ދިޔަކަންވެސް ރައީސް ފާހަގަ ކުރެއްވިއެވެ. އަދި ކޯސްޓްގާޑް ޑަބަލްކުރުމުގެ ޕްރޮގްރާމުގެ ތެރެއިން ފުޅަނދުތައް ދެ ގުނައަށް އިތުރު ކުރުމުގެ މަސައްކަތްވެސް ފެށިފައިވާ ކަމަށް ވިދާޅުވެ، ކަނޑުއޮށްގިރި މިހާރު ކޯސްޓްގާޑާ ހާވާލުކުރެވިފައިކަމުގައި ރައީސް ވިދާޅުވިއެވެ.
