މުޅި ރާއްޖެއަށް ބޭންކު އޮފް މޯލްޑިވްސްގެ އޭޓީއެމް ޚިދުމަތް ފޯރުކޮށްދިނުމުގެ މަސައްކަތް ރައީސުލްޖުމްހޫރިއްޔާ އޮފީހުގައި އޮތް ރަސްމިއްޔާތެއްގައި މިއަދު ރައީސުލްޖުމްހުރިއްޔާ އިފްތިތާޙު ކޮށްދެއްވައިފިއެވެ.
އަންނަ އަހަރު ނިމެންވާއިރަށް ރާއްޖޭގައި މީހުން ދިރިއުޅޭ ހުރިހާ ރަށެއްގައި ބީއެމްއެލްގެ ޚިދުމަތް ދިނުމުގެ ލަނޑުދަނޑި ހާސިލްކުރެވިގެންދާނެ ކަމުގައި ބެންކް އޮފް މޯލްޑިވްސްގެ ސީއީއޯ މުޙައްމަދު ޝަރީފް ވިދާޅުވެއެވެ.
މި ރަސްމިއްޔާތުގައި އިޤްތިސާދީ ތަރައްޤީ އާއި ވިޔަފާރިއާ ބެހޭ ވުޒާރާއާއި ބީއެމްއެލްއާ ދެމެދު އެއްބަސްވުމުގައި ސޮއިކުރުން އޮތެވެ.
“ޖުމްލަ 103 އޭޓީއެމް ބެހެއްޓިގެންދާނެ، މާލީ ބައިވެރިވުން އިތުރުކުރުމަށް ގިނަ މަސައްކަތްތަކެއް ކުރެވިގެންވާނެ،” އިޤްތިސާދީ ތަރައްޤީ އާއި ވިޔަފާރިއާ ބެހޭ ވުޒާރާގެ ފަރާތުން ބީއެމްއެލްއާއެކު ސޮއިކުރެއްވުމަށްފަހު ވާހަކަފުޅު ދައްކަވަމުން، ވަޒީރު މުހައްމަދު ސައީދު ވިދާޅުވިއެވެ.
“މިހާރު ޖުމްލަ 90 ރަށުގައި ޖުމްލަ 150 އޭޓީއެމްގެ ޚިދުމަތްދަނީ ދެމުން، އަންނަ އަހަރު 100 އަށްވުރެ ގިނަ ރަށުގައި އޭޓީއެމް ބަހައްޓާ ނިންމުމަކީ އަމާޒެއް، މި ޚިދުމަތް ކުރިއަށްދާނީ ފިޔަވަހިތަކަކަށް ބަހާލައިގެން،” ޝަރީފްގެ ވާހަކަފުޅުގައި ވިދާޅުވިއެވެ.
މިއަދުގެ ރަސްމިއްޔާތުގައި، މި މަޝްރޫޢުގެ ދަށުން ގާއިމް ކުރި ފުރަތަމަ އޭޓީއެމް، އދ. އޮމަދޫގައި އިފްތިތާހުކޮށް ދެއްވުން އޮތެވެ. އެއީ ބީއެމްއެލްއިން ރާއްޖޭގައި ބެހެއްޓި 150 ވަނަ އޭޓީއެމްއެވެ.
ބީއެމްއެލްއިން އޭޓީއެމް ބެހެއްޓުމުގެ މަސައްކަތް ކުރިއަށް ގެންދަނީ ފިޔަވަހި ތަކަކަށް ބަހާލައިގެންނެވެ.
ޝަރީފް ވިދާޅުވީ، ފުރަތަމަ ފިޔަވަހީގައި އަންނަ އަހަރުގެ މާޗްގެ ނިޔަލަށް 17 ރަށުގައި އޭޓީއެމް ބެހެއްޓޭނެ ކަމަށެވެ. އަދި އަހަރު ނިމޭއިރު، ރާއްޖޭގެ ރަށްރަށުގައި ބަހައްޓާފައިވާ އޭޓީއެމްތަކުގެ އަދަދު 250 އަށްވުރެ ގިނަ ވެގެންދާނެ ކަމަށް ޝަރީފް ވިދާޅުވިއެވެ.
