މޯލްޑިވްސް އިސްލާމިކް ބޭންކުގެ ޚިދުމަތްތައް ފުޅާކޮށް ރާއްޖޭ އިތުރު 19 ރަށެއްގައި އެމްއައިބީގެ އޭޓީއެމް ބެހެއްޓުމުގެ އެއްބަސްވުމުގައި މިއަދު ސޮއިކޮށްފިއެވެ. މި ސޮއިކުރުމުގެ ރަސްމިއްޔާތު ޝަރަފްވެރިކޮށްދެއްވީ ރައީސުލްޖުމްހޫރިއްޔާއެވެ.
މި އެއްބަސްވުމުގެ ދަށުން، 19 ރަށެއްގައި އެމްއައިބީގެ އޭޓީއެމް ބަހައްޓާނެއެވެ. އަދި އެއާއެކު، 16 އަތޮޅަކަށް އެމްއައިބީގެ ޚިދުމަތް ފެތުރިގެން ދާނެއެވެ.
މި ރަސްމީއްޔާތުގައި ވާހަކަފުޅުދައްކަވަމުން އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވަނީ، މިއީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެއް ކަމަށްވާ އިޤްތިޞާދުގައި ރައްޔިތުންގެ މާލީ ބައިވެރިވުން ކަށަވަރުކުރުމަށް، ކުރެވޭ މަސައްކަތެއް ކަމަށެވެ. އަދި މިމަސައްކަތަކީ، އެއް އަހަރު ދުވަހުގެ ތެރޭގައި ނިންމާ މަސައްކަތެކެވެ.
މިވަގުތުވެސް އެމްއައިބީގެ 39 އޭޓީއެމްއެއް ރާއްޖޭގެ އެކި ސަރަހައްދުތަކުގައި ބަހައްޓާފައި ވެއެވެ. އަލަށް ބެހެއްޓިގެން ދާނީ، 23 އޭޓީއެމް އެވެ.
