ކެޕިޓަލް އޭޝިއާ އިންވެސްޓްމަންޓާއެކު ފްރޭމްވޯކް އެގްރިމެންޓުގައި ސޮއިކުރުމާއެކު ކެޕިޓަލް އޭޝިއާ އިންވެސްޓްމަންޓު ކުންފުނީގެ ފަރާތުން މަސައްކަތްކުރިއަށް ގެންދާނެގޮތުގެ ތާވަލެއް އެކުލަވާލާނެ އެވެ. އަދި ތަފްސީލީ އެގްރިމެންޓެއްގައިވެސް ކުރިއަށް އޮތް 6 މަސް ދުވަހުގެތެރޭގައި ސޮއިކުރެވޭނެ ކަމަށެވެ.
“6 މަސްދުވަސްތެރޭގައި ކުރިއަށްދާނެ ކަންތައްތަކަކީ، … އަމަލީ މަސައްކަތްތައް ފެށުމަށް އެކުންފުނީގެ ޓެކްނިކަލް ބޭފުޅުން އެތަނަށް އައުމާއި، އެކި ކަހަލަ ދިރާސާތައް ކުރުމާއި، މަސައްކަތްތައް ކުރިއަށް ގެންދިޔުމުގައި ގެންދަން ޖެހޭ ހުރިހާ އިންތިޒާމުތަކެއް ކުރިއަށްގެންދިއުން،” ވަޒީރު ސައީދު ވިދާޅުވިއެވެ.
ކެޕިޓަލް އޭޝިއާ އިންވެސްޓްމަންޓާއެކު ފްރޭމްވޯކް އެގްރިމެންޓުގައި މޯލްޑިވްސް އިންޑަސްޓްރިއަލް ޑިވެލޮޕްމަންޓު ފްރީ ޒޯންގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ޝިމާދު އިބްރާހީމެވެ. އަދި އޭޝިއާ އިންވެސްޓުމަންޓުގެ ފަރާތުން ސޮއިކޮށްކުރެއްވީ ޗީފް ކޮމަރޝަލް އޮފިސަރ ޓަން ކުން ޗިއާއޯ ޖޯޖްއެވެ.
މި މަޝްރޫޢުގެ ފުރަތަމަ ފިޔަވަހީގައި 100 މިލިޔަން ޑޮލަރުގެ އިންވެސްޓްމަންޓެއް ކެޕިޓަލް އޭޝިއާ ކުންފުނީގެ ފަރާތުން ކުރާނެއެވެ.
“މޯލްޑިވްސް އިކޮނޮމިކް ގޭޓުވޭ ޕްރޮޖެކްޓު”ގައި ކެޕިޓަލް އޭޝިއާ އިންވެސްޓުމަންޓު ކުންފުންޏާއެކުވެފައިވާ އެއްބަސްވުމުގެ ދަށުން ބައިނަލްއަޤްވާމީ ޕޯޓު ފެސިލިޓީތަކާއި، ބޯޓު މަރާމާތުކުރުމުގެ ޚިދުމަތާއި، ބަންކަރިންގ ޚިދުމަތާއި، ކުރޫޒު ޓޫރިޒަމެއް ތަރައްޤީކުރުމާއި ފަތުރުވެރިކަމާއި ގުޅުންހުރި އިތުރު މަސައްކަތްތަކާއި، ރިއަލް އެސްޓޭޓުގެ ވިޔަފާރިއާއި، އެކްސްޕޯޓު ޕްރޮސެސިންގ ޒޯނެއް ތަރައްޤީކުރުން ހިމެނެއެވެ.
މިއީ ހޯރަފުށީ ފަޅުގައި 2،500 ހެކްޓަރުގެ ބިން ހިއްކައިގެން ކުރިއަށް ގެންދިއުމަށް ހަމަޖެހފައިވާ ޕްރޮޖެކްޓެކެވެ.
