މިއަދުން ފެށިގެން ރާއްޖެ އަށް ވޭޕް އެތެރެކުރުން މަނާކޮށް، އަންނަ ޑިސެމްބަރު 15 ވަނަ ދުވަހުން ފެށިގެން ރާއްޖޭގައި ވޭޕް ވިއްކުމާއި ބޭނުންކުރުން މަނާ ކުރާ ބިލް ރައީސް ޑރ. މުހައްމަދު މުއިއްޒު ރޭ ތަސްދީގު ކުރައްވައިފި އެވެ. މިބިލް ފާސްކޮށްފައި ވަނީ އަންގާރަ ދުވަހުއެވެ.
ރައީސުލްޖުމްހޫރިއްޔާ ބިލް ތަސްދީގު ކުރެއްވުމާ އެކު، ރާއްޖެއަށް ވޭޕް އެތެރެކުރުން މިއަދުން ފެށިގެން މަނާވާނެ އެވެ. އަދި، ޑިސެމްބަރު 15 ވަނަ ދުވަހުން ފެށިގެން، އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އާލާތްތައް ވިއްކުމާއި ހިލޭ ބެހުން އަދި ބޭނުންކުރުން މަނާވާނެއެވެ.
ދުންފަތް ކޮންޓްރޯލުކުރުމާބެހޭ ގާނޫނުގެ އެއްވަނަ އިސްލާޙުގައި ބަޔާން ކޮށްފައި ވަނީ، ވޭޕް ކުރަން ބޭނުންކުރާ އާލާތްތަކާއި އެކަމަށް އުފައްދާފައިވާ އުފެއްދުންތައް އެތެރެކޮށްފި ނަމަ 50،000ރ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް އާލާތަކަށް 10،000ރ އިން ޖުރިމާނާ ކުރެވޭނެ ކަމަށެވެ.
ދުންފަތް ބޭނުންކުރަން ބޭނުން ކުރާ އެފަދަ އާލާތެއް ނުވަތަ އުފެއްދުމެއް ވިއްކައިފި ނަމަ 20 ހާސް ރުފިޔާއިން ޖުރިމާނާ ކުރެވޭނެއެވެ.
ވިއްކި ކޮންމެ އެއްޗަކަށް 10 ހާސް ރުފިޔާގެ ޖުރިމަނާއެކެވެ. އަދި ހިލޭ ބަހައިފި ނަމަވެސް 10 ހާސް ރުފިޔާގެ ޖުރިމާނާއެކެވެ.
އެފަދަ އެއްޗެއް ކުޑަކުއްޖަކަށް ވިއްކައިފިނަމަ ބައިލައްކަ ރުފިޔާގެ ޖުރިމާނާއެކެވެ.
މިއިސްލާޙު ތަސްދީގު ވުމާ ގުޅިގެން ދުންފަތް ގަނެ ވިއްކޭނެ އެންމެ ދަށް އުމުރަކީ 21 އަހަރެވެ.
ދުންފަތް ކޮންޓްރޯލުކުރުމާބެހޭ ގާނޫނަށް 1 ވަނަ އިސްލާހު ހުށަހެޅުއްވީ ހެންވޭރު އުތުރު ދާއިރާގެ ޕީއެންސީގެ މެންބަރު އަހުމަދު އައިފާނެވެ.
