ރާއްޖޭގެ ބޭންކިން ނިޒާމަށް ވަންނަމުންދާ ބޭރު ފައިސާގެ ނިސްބަތް އިތުރުކޮށް، ބޭންކިން ނިޒާމުން ވިޔަފާރިތަކަށާއި އާންމުންގެ ބޭނުންތަކަށް ދޫކުރާ ބޭރު ފައިސާގެ ނިސްބަތް އިތުވާނެ ގޮތަކަށް، ޑޮލަރު މާރުކުރުމާ ބެހޭ ގަވާއިދަށް އަމަލުކުރަން ފެށީ 1 އޮކްޓޫބަރުން ފެށިގެންނެވެ.
ގަވައިދު ބުނާ ގޮތުން، ޓޫރިޒަމް ދާއިރާގެ ޖުމްލަ އާމްދަނީގެ 15 ޕަސެންޓް ބޭންކްތަކުގައި މާރުކުރަން ލާޒިމްވެ އެވެ.
- ބޭރު ފައިސާއާ ބެހޭ ގަވައިދުގެ ދަށުން އެންމެ ރިސޯޓެއް ފިޔަވައި ހުރިހައި ރިސޯޓެއް ވަނީ އެމްއެމްއޭ ޕޯޓަލް ގައި ރަޖިސްޓްރީ ވެފައެވެ. ރާއްޖޭގައި ހިންގަނީ 174 ރިސޯޓެވެ.
- ޓޫރިޒަމް ދާއިރާގެ ހުރިހާ ވިޔަފާރިތަކުން ވެސް ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް ޑޮލަރު މާރުކުރަން ޖެހޭނެ އެވެ.
- ކެޓަގަރީ “އޭ” ގައި ހިމެނެނީ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކެވެ.
- އެ ކެޓަގަރީގައި ހިމެނޭ ފަރާތްތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ބޭރުފައިސާ ޖަމާކުރަން ލާޒިމް ވެގެން ވެއެވެ.
- ކެޓަގަރީ “ބީ” ގައި ހިމެނެނީ ގެސްޓް ހައުސްތަކެވެ.
- ގެސްޓްހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަށް ޖަމާކޮށް މާރުކުރަން ޖެހެ އެވެ.
- ބޭރު ފައިސާއާ ބެހޭ ގަވާއިދުގެ ދަށުން ރަޖިސްޓްރީވާން އެމްއެމްއޭއިން ވަނީ އެކަމަށް ހާއްސަކޮށްފައިވާ ޕޯޓަލެއް ހަދާފައެވެ.
ޓޫރިޒަމް ދާއިރާއިން ރާއްޖޭގެ ބެންކުތަކަށް ވަންނަ ޑޮލަރުގެ ނިސްބަތް މަދުކަމަށް ދައްކައެވެ. މިދިޔަ އަހަރު ޓޫރިޒާމް ދާއިރާއިން ބެންކުތަކުން މާރުކުރީ 68 މިލިއަން ޑޮލަރެވެ. 2019 ވަނަ އަހަރު މާރުކުރީ 153 މިލިއަން ޑޮލަރެވެ.
