ރައްޔިތުންގެ މަޖިލީހަށް އިންތިޚާބު ކުރާ މެމްބަރުން ސިޔާސީ ޕާޓީ ބަދަލުކޮށްފިނަމަ، ގޮނޑި ގެއްލޭ ގޮތަށް ރައްޔިތުންގެ މަޖިލީހުން ފާސްކުރި ބިލު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ތަސްދީޤު ކުރައްވައިފިއެވެ.
ރައީސް ތަސްދީޤު ކުރެއްވުމާއެކު މި ބިލް ގެޒެޓުކޮށް މިއަދުންފެށިގެން އަމަލު ކުރަން ފަށާފައި ވެއެވެ. މި ބިލު މަޖިލީހަށް ހުށަހެޅުނީ މިއަދެވެ. އަދި މުޅި މަޖިލީހުގެ ކޮމިޓީއަކުން ބިލު ދިރާސާކޮށް ފާސްކޮށްފައި ވެއެވެ. އެއަށް ފަހު މިއަދު ހަވީރު އޮތް ޖަލްސާއިން ބިލް ފާސްކޮށް އިރާކޮޅު ރައީސް ބިލް ތަސްދީޤުކޮށް ގެޒެޓު ކުރެއްވީއެވެ.
ޕީއެންސީގެ މެމްބަރު، ހުޅުދޫ ދާއިރާގެ އެމްޕީ މުހައްމަދު ޝާހިދު ހުށަހެޅުއްވި މި ބިލްގައި ވަނީ 3 ކަމެކެވެ.
- ޕާޓީ ބަދަލުކޮށްފިނަމަ ނޫނީ ޕާޓީން ވަކިކޮށްފިނަމަ، ނުވަތަ އެހެން ޕާޓީއަކާ ގުޅިއްޖެނަމަ، ވަގުތުން ގޮނޑި ގެއްލޭނެ އެވެ.
- ރާއްޖޭގެ ސަރަހައްދުން ބައެއް ދޫކޮށްލެވޭނީ، ރައްޔިތުންގެ މަޖިލީހުން ފާސްކޮށްގެންނެވެ.
- ބޭރު ގައުމެއްގެ ސިފައިންނަށް ރާއްޖޭގެ ސަރަހައްދުގައި ތިބެވޭނީ ރައްޔިތުންގެ މަޖިލީހުން ފާސްކޮށްގެންނެވެ.
- ގާނޫނުއަސާސީއަށް އިސްލާހު ގެނެވޭނީ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުން ފާސްކޮށްގެންނެވެ. އެއީ، 70 މެންބަރުންނެވެ.
މި ބިލް މިއަދު ފާސްކޮށްފައި ވަނީވެސް މުޅި މަޖިލީހުގެ ކޮމިޓީގައި 75 މެމްބަރުން ތިބެގެންނެވެ. އަދި ބިލަށް ތާއީދުކޮށްފައި ވަނީ 78 މެމްބަރުންނެވެ.
މި ބިލަށް އިދިކޮޅު އެމްޑީޕީން ދެކޮޅު ހެއްޖެވެ، އަދި އެމްޑީޕީއަށް ސަޕޯޓު ކުރާ މީހުން މަޖިލިސް ދޮށަށް އެއްވެ އަޑު ގަދަ ކުރިއެވެ.
