އިންޑިއާ އޮތީ ދުނިޔޭގައި އިގްތިސާދީ ބާރަކަށް ވުމުގެ މަގުމަތީގަ އެވެ. ދަނޑުވެރިކަމުގެ އިގްތިސާދުން އިންޑިއާ ވަނީ ސިނާއަތާއި ސްޓާޓްއަޕްތަކާއި ކުރިއަރަމުން އަންނަ މެދުފަންތީގެ ސިނާއީ ހަބަކަށް ބަދަލުވެފަ އެވެ.
އައިއެމްއެފް އިން ލަފާކުރާ ގޮތުގައި 2024 ވަނަ އަހަރު އިންޑިއާގެ ޖީޑީޕީ 3.95 ޓްރިލިއަން ޑޮލަރަށް އަރާނެ އެވެ. އަދި %7 ގައި އިންޑިއާގެ ޖީޑީޕީ ކުރިއަރާނެ އެވެ. މިއީ އެމެރިކާ، އީޔޫ، އަދި ޗައިނާއަށް ވުރެ ވެސް ބާރަށް އިގްތިސާދު ކުރިއަރާނެ ކަމަށް ލަފާކޮށްފައިވާ މިންވަރެކެވެ.
އިންޑިއާއިން އިގްތިސާދީ ބޮޑު ބާރަކަށް ވާން ދާއިރު އިންޑިއާއަށް ގޮންޖެހުންތަކެއްވެސް އެބަ ހުއްޓެވެ. އެ ގޮންޖެހުންތަކަކީ އިންޑިއާގެ އިންފްރާސްޓްރަކްޗަރއާއި ކަންކަން ކުރުމުގެ ވައްޓަފާޅިއާއި މަސައްކަތުގެ ސުލޫކާ ގުޅިފައިވާ ކަންކަމެވެ. އަދި ހަމައެފަދައިން ސަރުކާރުގެ ބިއުރޯކްރެސީއާއި ބޭރުގެ ފަރާތްތަކުން އިންޑިއާއަށް ދަތި ކުރުމާއި ދޮގު މައުލޫމާތު ފެތުރުން ހިމެނެއެވެ.
އިންޑިއާގެ އިންފްރާސްޓްރަކްޗާ އާއި ތަރައްގީއަށް ހުރަސް އެޅޭ ގިނަ ވާހަކަތައް އަމާޒުކޮށްފައި ވަނީ އިންވެސްޓަރުންގެ އިތުބާރު ގެއްލުވާލުމަށެވެ.
2023 ވަނަ އަހަރު އަދާނީ ގްރޫޕާ ބެހޭ ގޮތުން ހިންޑެންބާގް ރިސާޗް ރިޕޯޓުން އަދާނީއަށާއި އިންޑިއާއަށް ދުނިޔޭގެ ސަމާލުކަން ލިބުނެވެ. ފާޑުކިޔާ ފަރާތްތަކުން ތުހުމަތުކުރާ ގޮތުގައި މިފަދަ ވާހަކަތަކުގެ މަގުސަދަކީ އިންޑިއާގެ އިގްތިސާދީ ދުވެލި ހީނަރު ކުރުމެވެ.
މިހެން ކަންތައް ހުރި ނަމަވެސް އިންޑިއާގެ ކުރިއެރުމުގެ ވާހަކައިން ދުނިޔޭގެ ޝައުގުވެރިކަން ހޯދައެވެ. އެއީ ބިލިއަން މީހުންގެ ބާޒާރެކެވެ. އަދި އެއާއެކު މުސްތަގުބަލުގައި ދުނިޔޭގެ އިގްތިސާދު ބައްޓަންކުރުމުގައި އިންޑިއާ މުހިންމު ދައުރެއް އަދާކުރާނެ ގައުމެއް ކަމަށް ބެލެވެއެވެ.
