އިންޑިއާއަކީ އަލަށް ކުރިއަރަމުންދާ 6ޖީ ވައިލެސް ޓެކްނޮލޮޖީގެ ދާއިރާގައި މުހިންމު ދައުރެއް އަދާކުރުމަށް ތައްޔާރުވެފައިވާ ގައުމެއް ކަމަށާއި، 2035 ވަނަ އަހަރުގެ ނިޔަލަށް 6ޖީ ނެޓްވޯކް ޑިޕްލޮއި ކުރުމުގެ ބޮޑެތި ޕްލޭންތަކެއް ރާވާފައިވާ ކަމަށް އިންޑިއާއިން ބުނެއެވެ.
އިންޑިއާއިން އަންނަ ޖީލުގެ ވަޔަރލެސް ޓެކްނޮލޮޖީގެ އިންގިލާބީ ގާބިލްކަމަށް ތައްޔާރު ވަމުންދާއިރު، 6ޖީ އިން ސިކުންތަކަށް އެއް ޓެރަބައިޓްގެ އިންޓަނެޓް ސްޕީޑާއެކު ވަގުތުން ޑައުންލޯޑް ކުރެވި، އެތައް ދާއިރާއެއްގައި ޓެކްނޮލޮޖީ ބޭނުން ކުރުމަށް ބޮޑެތި ބަދަލުތަކެއް ގެނަސްދޭނެއެވެ. އޭގެ ތެރޭގައި، ދުރުގައި ތިބެގެން ހަސްފަތާލުތަކުގައި ރިމޯޓް ސާޖިކަލް ޕްރޮސީޖަރުތަކުން ފެށިގެން މީހަކާ ނުލައި ވެހިކަލްތައް ދުއްވައި، މަޖާޒީ ދުނިޔޭގެ ވާޗުއަލް ރިއަލިޓީއެއްގައި އުޅެވުމާ ހަމައަށް 6ޖީ އިން ކަނެކްޓިވިޓީ އާއި ޓެކްނޮލޮޖީގެ މުއާމަލާތްތަކަށް އައު މާނައެއް ގެނަސްދޭނެއެވެ.
އިންޑިއާ ސަރުކާރުން މިހާރު ވަނީ މިދާއިރާގައި ސަރުކާރު ފެންވަރުގައި ސިޔާސަތުތަކެއް ތައާރަފްކޮށް، ސްޓްރެޓެޖިކް ފިޔަވަޅުތަކެއް އަޅައި، ހާއްސަ 6ޖީ އުފެއްދުމުގެ މަސައްކަތުގައި އުޅޭ ގްރޫޕެއް ގާއިމްކޮށް ފައެވެ.
އަދި އައިއައިޓީ މަދްރާސް ފަދަ އިލްމީ މުއައްސަސާއެއް މެދުވެރިކޮށް، އެފަދަ ރިސާޗް ފެސިލިޓީތަކަށް އެހީތެރިވެދޭން ވެސް ފަށާފައެވެ.
އިންޑިއާގެ 6ޖީގެ ޕްރޮއެކްޓިވް ސިޔާސަތުން އިންޑިއާ ޕޮޒިޝަން ކުރަނީ ހަމައެކަނި ޓެކްނޮލޮޖީ ކޮންސިއުމަރެއްގެ ގޮތުގައެއް ނޫނެވެ. އިންޑިއާއިން ކުރިއަށް ދާން ބޭނުންވަނީ، ވަޔަރލެންސް ކޮމިއުނިކޭޝަންގެ ދާއިރާއިން ދުނިޔޭގެ ފެންވަރުގެ އީޖާދީ ބާރެއްގެ ގޮތުގައި ކަމަށް މިދާއިރާގެ އިސް ފަރާތެއްކަމަށްވާ ރެމޮންޑް ޑެލާން ވިދާޅުވެ އެވެ.
އިންޑިއާއިން ދަނީ، އެމެރިކާ ފަދަ ބައިނަލްއަގްވާމީ ބައިވެރިންގެ ތާއީދާއި ޓެކްނޮލޮޖީގެ ހަރުދަނާ އިކޯސިސްޓަމަކާއެކު ޑިޖިޓަލް ޓްރާންސްފޯމަޝަންގެ މުހިންމު ޕްލެޓްފޯމެއްގެ ގޮތުގައި 6ޖީ ބޭނުން ކުރަން ތައްޔާރުވަމުންނެވެ.
މި ޓެކްނޮލޮޖީ ތަމްސީލުކުރަނީ ހަމައެކަނި ހަލުއި ނެޓްވޯކްތަކެއް ނޫނެވެ. މިއީ މުޅި އިންޑިއާގައި ސިނާއަތްތައް އަލުން ބައްޓަންކޮށް، ދިރިއުޅުން ރަނގަޅު ކުރެވޭނެ ތޫނުފިލި، ގުޅިފައިވާ ނިޒާމުތައް އުފެއްދުމަށް އޮތް މަގެވެ. މި ޓެކްނޮލޮޖީގެ ކުރިއެރުމަށް ދުނިޔެއިން ލަފާކުރާއިރު، އިންޑިއާ އޮތީ 6ޖީ އިންގިލާބުގެ އެންމެ ކުރީގަ އެވެ.
