ސްޕޭސްއެކްސްގެ ސީއީއޯ އެލޮން މާސްކް ވަނީ އިންޑިއާގެ ވިޔަފާރިވެރިންގެ އިސް ފަރާތްތަކުގެ ވަފުދަކާއެކު ޓެކްސަސްގައި ހުންނަ ސްޕޭސްއެކްސްގެ ސްޓާބޭސް ފެސިލިޓީގައި ޚާއްސަ ބައްދަލުވުމެއް ބާއްވައިފައެވެ. މިއީ މި ބާވަތުގެ ފުރަތަމަ އިވެންޓެވެ.
ހުކުރު ދުވަހު ބޭއްވުނު މި ބައްދަލުވުމުގައި އިންޑިއާގެ ވަފުދަށް ސްޓާބޭސް ފެސިލިޓީއަށް ޒިޔާރަތްކުރުމުގެ ފުރުސަތު ލިބުނެވެ. އަދި ސްޕޭސްއެކްސްގެ ސްޓާޝިޕް ފްލައިޓް 7 ކާމިޔާބުކަމާއެކު ލޯންޗުކުރުމުގެ މަންޒަރު ބެލުމުގެ ފުރުސަތު ވެސް ލިބުނެވެ.
“ކަންކަން ޓްރެންޑް ވަމުންދަނީ ޕޮޒިޓިވް ގޮތަކަށް. އެމެރިކާ އާއި އިންޑިއާއާ ދެމެދު ވިޔަފާރި އިތުރު ކުރުމަށް ވިޔަފާރީގެ ހުރަސްތައް މަދުކުރުމަށް އަޅުގަނޑު ޔަގީނުންވެސް ތާއީދު ކުރަން،” މާސްކް ބުންޏެވެ. އަދި އިންޑިއާއަކީ “ގަދީމީ ޙަޟާރަތްތަކުގެ ތެރެއިން އެއް ޙަޟާރަތެއް ކަމަށާއި ވަރަށް ބޮޑު ޙަޟާރަތެއް” ކަމަށް ވެސް ފާހަގަކުރިއެވެ.
މި ބައްދަލުވުމުގައި ޓެކްނޮލޮޖީއާއި އުފެއްދުންތެރިކަމާއި އިއާދަކުރަނިވި ހަކަތައިގެ ދާއިރާތައް ތަމްސީލުކުރާ އިންޑިއާގެ ވަފުދުން ވަނީ ދުނިޔޭގެ ގޮންޖެހުންތަކުގައި އެއްބާރުލުން ދިނުމާ މެދު މަޝްވަރާކޮށްފައެވެ. މީގެ ތެރޭގައި ފައިނޭންޝަލް ޓެކްނޮލޮޖީ، ޖައްވީ އަދި އާޓިފިޝަލް އިންޓެލިޖެންސްގެ އިނޮވޭޝަންގެ ދާއިރާތަކުން އެއްބާރުލުން އިތުރުކުރުމުގެ މަޝްވަރާތައް ހިމެނެއެވެ.
މަސްކް ވަނީ އޭނާގެ ކުންފުނިތަކުގެ ތެރެއިން ސްޕޭސްއެކްސް، ޓެސްލާ އަދި ނިއުރަލިންކް ފަދަ ކުންފުނިތަކުގެ މަސައްކަތްތަކާ ބެހޭ މައުލޫމާތު ހިއްސާކޮށް، ޓެކްނޮލޮޖީގެ ސަބަބުން އަންނަ ބަދަލުތަކުގެ މުހިންމުކަން ފާހަގަކޮށްފައެވެ. މި ބައްދަލުވުމަކީ އެމެރިކާއާއި އިންޑިއާއާ ދެމެދު އޮތް ވިޔަފާރީގެ ގުޅުން އިތުރަށް ހަރުދަނާކުރުމަށް އެޅުނު މުހިންމު ފިޔަވަޅެއް ކަމުގައި ބެލެވެއެވެ.
