އިންޑިއާގައި އެޕަލްގެ އައިފޯން 17 އުފެއްދުމުގެ އިބްތިދާއީ ޓެސްޓުތައް ފަށާފައިވާކަމަށް ރިޕޯޓުތައް ބުނެއެވެ. މިއީ ސެޕްޓެމްބަރު މަހު މި މޮޑެލްގެ އުފެއްދުން ފެށުމަށް ތައްޔާރުވުމުގެ ގޮތުން ކުރާ މަސައްކަތެކެވެ. މީގެ އިތުރުން، އޮގަސްޓަކީ އިންޑިއާގައި ޗުއްޓީގެ މައިގަނޑު މޫސުމަށްވުމާއެކު އައިފޯން 14 އަދި އައިފޯން 16 ގެ މޮޑެލްތަކުގެ ވިޔަފާރި ވަރަށް ބޮޑަށް އިތުރުވާނެކަމަށް ލަފާކުރެވެއެވެ.
އެޕަލް އިން އަންނަ މަހު (އޮގަސްޓުގައި) ގިނަ އަދަދަކަށް އައިފޯން 14 އަދި އައިފޯން 16 ގެ މޮޑެލްތައް ވިއްކާނެކަމަށް ލަފާކުރެވޭއިރު، މިއީ އިންޑިއާގެ ޗުއްޓީ މޫސުމާ ދިމާކޮށް އެޕަލްގެ ވިއްކުމުގެ މިންވަރު އިތުރުކުރުމަށް ލިބޭ ރަނގަޅު ފުރުސަތެކެވެ.
އިންޑިއާގައި ހުންނަ ޓައިވާންގެ ފޮކްސްކޮން ކުންފުނީގެ ޕްލާންޓުން އައިފޯން 17 އުފެއްދުމުގެ އިބްތިދާއީ ޓެސްޓުތައް ވަނީ ފަށާފައެވެ. މިއީ އަންނަ ސެޕްޓެމްބަރު މަހު އައިފޯން 17 ސީރީޒްގެ ފޯނުތައް އުފެއްދުމަށް ތައްޔާރުވުމުގެ ގޮތުން ކުރިއަށް ގެންދާ މަސައްކަތެކެވެ. މި ޓެސްޓުތައް ކުރިއަށް ގެންދަނީ ފޮކްސްކޮންގެ އިންޑިއާ ޕްލާންޓްގައެވެ.
އެޕަލް އިން އައިފޯން 17 ގެ ބައިތައް ޗައިނާއިން އިންޑިއާއަށް އެތެރެކުރަން ފެށީ މިދިޔަ ޖޫން މަހުގެ ތެރޭގައެވެ. މިއީ އައިފޯން 17 ގެ ފުރިހަމަ އުފެއްދުމުގެ މަރުޙަލާއަށް ތައްޔާރުވުމުގެ ގޮތުން އަޅާފައިވާ މުހިންމު ފިޔަވަޅެކެވެ. މިހާރު އެތެރެ ކޮށްފައިވާ ބައިތަކުގެ ތެރޭގައި އައިފޯން 17 ގެ ޑިސްޕްލޭ، ބިއްލޫރި ކަވަރު، ފަހަތު ކެމެރާ މޮޑިއުލްތަކާއި އަދި ޑިވައިސްގެ މެކޭނިކަލް އޮނިގަނޑު ވެސް ހިމެނެއެވެ.
ޖޫން މަހު ޗައިނާގެ ފޮކްސްކޮން ޕްލާންޓުން އޯޑަރުކުރި ތަކެތީގެ ގާތްގަނޑަކަށް 10 އިންސައްތަ އަކީ އައިފޯން 17 ގެ ބައިތަކެވެ. ބާކީ 90 އިންސައްތަ ބައިތަކަކީ އައިފޯން 14 އަދި އައިފޯން 16 އަށް ޚާއްޞަ ބައިތަކެއްކަމަށް ރިޕޯޓުތަކުން އެނގެއެވެ.
މީޑިއާއަށް މައުލޫމާތު ދީފައިވާ ގޮތުގައި ފޮކްސްކޮންއަށް ބައިތައް ލިބެން ފެށީ ޖޫން މަހު އެވެ. އެހެންވެ، ޓެސްޓް ބުރު ފަށާފައި ވަނީ ޖުލައި މަހުގައެވެ. އަދި ފުރިހަމައަށް އޮޕަރޭޝަން އަންނަ މަހު ފެށޭނެކަމަށް ބެލެވޭއިރު، އައިފޯން 17 ސީރީޒް ރަސްމީކޮށް ނެރޭނެކަމަށް ބެލެވެނީ ސެޕްޓެމްބަރު މަހުއެވެ. މިހާރު އުންމީދު ކުރެވެނީ ސެޕްޓެމްބަރު މަހުގެ 8 ވަނަ ހަފުތާގެ ތެރޭގައި މި ފޯނު ތަޢާރަފުކުރާނެ ކަމަށެވެ.
މީގެ އިތުރުން، ފޮކްސްކޮން އިން ޓަމިލްނާޑޫގެ އޮރަގަޑަމްގައި ފެކްޓަރީއެއް ހުޅުވުމަށް ވެސް މަސައްކަތްކުރަމުން އަންނަކަމަށް ރިޕޯޓުތަކުން ހާމަވެއެވެ. ނަމަވެސް، ބެންގަލޫރުގައި ހުންނަ ފޮކްސްކޮންގެ 2.6 ބިލިއަން ޑޮލަރުގެ ފެކްޓްރީގައި އުފައްދާނީ އައިފޯން 16 އަދި އައިފޯން 16އީ ކަމަށް މައުލޫމާތު ލިބިފައިވެއެވެ.
