ކީރިތި ޤުރުއާން ރޮހިންޔާ ބަހަށް ކީރިތި ޤުރުއާން ތަރުޖަމާ ކޮށްފިއެވެ. ރޮހިންޔާ ބަހުން ކީރިތި ޤުރުއާން ތަރުޖަމާ ކޮށްދެއްވީ، މެލޭޝިއާގެ އިސްލާމިކް ޔުނިވާސިޓީގައި ޕިއެޗްޑީ ހާސިލު ކުރައްވަމުން ގެންދަވާ ރޮހިންޔާ ދަރިކޮޅުގެ މުޙައްމަދު ޤުޠުބު ޝާހް އެވެ. އޭނާ ލިޔުއްވަމުން ގެންދަވަނީ، ކޮމްޕެރެޓިވް ރިލީޖަން އިން ރޮހިންޔާ މައުޟޫއުގެ މައްޗަށެވެ.
ކުއަލަލަމްޕޫރުގެ ޕެޓަލިންގ ޖަޔާގައި ހުންނަ ދީނީ ފޮތް ޝާއިއުކުރާ އިދާރާއެއް ކަމަށްވާ ދައުވާ ކޯނަރ ބުކްސްޓޯރުން ވަނީ މި ތަރުޖަމާ ޝާއިއުކޮށްދޭން އެހީވެދޭން ނިންމާފައެވެ.
ލިޔުމުގައި ރޮހިންޔާ ބަސް މަދުން ބޭނުން ކުރުމުގެ ސަބަބުން މުޙައްމަދު ޤުޠުބު ޝާހް ވަނީ ފުރަތަމައަށް މަލްޓިމީޑިއާގެ ވަސީލަތްތަކުން މި ތަރުޖަމާ ލިބޭ ގޮތަށް ތައްޔާރުކޮށްފައެވެ.
މި ތަރުޖަމާ ގައި ކީރިތި ޤުރުއާންގެ އޯޑިއޯއަށް ބޭނުން ކޮށްފައި ވަނީ މުޙއްމަދު އައްޔޫބުގެ ޤިރާއަތެވެ. އޭނާއަކީ ރޮހިންޔާ ދެމަފިރިއަކަށް ސައޫދީއަށް އުފަން ބޭކަލެކެވެ. ފަހުން އޭނާ ވަނީ މަސްޖިދުއްނަބަވީގެ އިމާމުކަންވެސް ކުރައްވާފައެވެ.
ތަރުޖަމާގައި ބޭނުން ކޮށްފައި ވަނީ މުޙައްމަދު ޤުޠުބު ޝާހްގެ އަޑެވެ. އޭނާ ތަރުޖަމާ ކުރުމުގެ މަސައްކަތް ފެށްތެވީ، 2021 ވަނަ އަހަރުގެ ކުރީކޮޅު އެވެ. އަދި، 2023 ވަނަ އަހަރުގެ އޮގަސްޓް މަހު މަސައްކަތް ނިންމަވާ ލެއްވިއެވެ.
ރޮހިންޔާ އަކީ ހުޅަނގު މިޔަންމާގެ ރާޚައިން ސްޓޭޓްގައި ދިރިއުޅޭ އިންޑޯ-އާރިއަން ނަސްލުގެ ދަރިކޮޅުގެ ބައެކެވެ. މިމީހުންގެ ތެރޭގައި ގިނައީ މުސްލިމުންނެވެ. މިޔަންމާގައި 2017 ވަނަ އަހަރު ހިންގަން ފެށި ނަސްލު ނައްތާލުމުގެ ހަމަލަތަކާ ގުޅިގެން 8 ލައްކައެއްހައި ރޮހިންޔާ މީހުން ބަންގްލަދޭޝްއަށް ފިލައިގެން ދިޔަ އެވެ. އެއިރު މިޔަންމާގައި ގާތްގަނޑަކަށް 1.4 މިލިއަން ރޮހިންޔާ މީހުން ދިރިއުޅެމުން ދިޔަ އެވެ.
