އިންޑިއާއަކީ ކުނިގިނަ އަދި ސާފުތާހިރުކަން ކުޑަ ގައުމެއްގެ ގޮތުގައި އޮންނަ ތަސައްވުރާ ދެކޮޅަށް، އެމެރިކާގެ ނިއުޔޯކަށް ނިސްބަތްވާ މަޝްހޫރު ޓްރެވަލް އިންފްލުއެންސަރެއް ކަމަށްވާ ކްލޯއީ ޖޭޑް ވާހަކަދައްކައިފިއެވެ. އިންޑިއާގެ ކޮޗީއަށް ކުރި ދަތުރަށްފަހު އޭނާ އާންމުކުރި ވީޑިއޯއެއްގައި ބުނެފައިވަނީ އިންޑިއާއަކީ ކުނިގިނަ ތަނެއް ނޫން ކަމަށެވެ.
މާރިޗު މަހުގެ 21 ވަނަ ދުވަހު އިންސްޓަގްރާމްގައި ހިއްސާކުރި ވީޑިއޯއެއްގައި ކްލޯއީ ބުނެފައިވަނީ، ގިނަ ބަޔަކު އިންޑިއާއާ ބެހޭގޮތުން އެންމެ ފުރަތަމަވެސް ބުނަނީ އެއީ ކުނިގިނަ ތަނެއްގެ ވާހަކަ ކަމަށެވެ. ނަމަވެސް، އަށް އަހަރުގެ މެދުކެނޑުމަކަށްފަހު އޭނާ ކުރި ދެވަނަ ދަތުރުގައި ކެރެލާގެ މަގުތަކާއި އާންމު ތަންތަން ފެނިފައިވަނީ ވަރަށް ސާފުތާހިރުކޮށް ކަމަށް އޭނާ ފާހަގަކުރިއެވެ. "އިންޑިއާގެ ބައެއް ސަރަހައްދުތަކަކީ ކޮންމެވެސް ވަރަކަށް ކުނިގިނަ ތަންތަން ކަމަށް ވެދާނެ، އެކަމަކު މުޅި ގައުމަކީ އެފަދަ ތަނެއް ކަމަށް ބުނެވިގެން ނުވާނެ،" ކްލޯއީ ބުންޏެވެ.
ކޮޗީގެ މަގުތަކާއި ދުވާރުތަކުގައި ކުނި ނެތްކަން ފާހަގަކޮށް، އެ ސިޓީގެ އާންމު ތަންތަނަކީ ސާފު ތަންތަން ކަމަށް އޭނާ ސިފަކުރިއެވެ. މީގެ އިތުރުން، އިންޑިއާއަކީ ވަރަށް ބޮޑު ގައުމަކަށް ވުމުން، މީޑިއާއިން ފެންނަ މަންޒަރުތަކަށް އެކަނި ބަރޯސާނުވެ، އަމިއްލައަށް އެކަން ތަޖުރިބާކޮށްލުމަށް އޭނާ އިލްތިމާސްކުރިއެވެ. އޭނާ ބުނި ގޮތުގައި އިންޑިއާއަކީ ދަތުރުވެރިންނަށް ހުރި ސުވަރުގެއެކެވެ.
ކްލޯއީގެ ވީޑިއޯގައި އޭނާ ކެއުމަށް ބޭނުންކުރި ރެސްޓޯރެންޓެއްގެ ބަދިގެވެސް ދައްކާލާފައިވެއެވެ. އެތަނުގެ ތަޅުންގަނޑު ސާފުކަމާއި، ކާބޯތަކެތި ތައްޔާރުކުރުމުގައި ބަހައްޓާ ފަރުވާތެރިކަމަށް އޭނާ ތައުރީފުކުރިއެވެ. ހާއްސަކޮށް އިންޑިއާގެ މަޝްހޫރު ކެއުމެއް ކަމަށްވާ 'ދޯސާ' ގެ ރަހަ ވަރަށް މީރުކަން އޭނާ ފާހަގަކުރިއެވެ.
ކޮޗީގެ މެޓްރޯ ފެރީގައި ކުރި ދަތުރަކީ ކްލޯއީއަށް ވަރަށް ބޮޑު ހައިރާންކަމެއް ލިބުނު ކަމެކެވެ. އިއާދަކުރަނިވި ހަކަތައިން ދުއްވާ މި ފެރީގެ ސާފުތާހިރުކަމާއި ހިދުމަތުގެ ފެންވަރު ރަނގަޅުކަން އޭނާ ފާހަގަކުރިއެވެ. "މީގެ އެތެރެ ފެނުމުން އަމިއްލަ ނަފްސާ ސުވާލުކުރެވޭނެ، އިންޑިއާއަކީ ކުނިގިނަ ތަނެއް ކަމަށް މީހުން ބުނަނީ ކީއްވެބާއޭ؟" އޭނާ ވީޑިއޯގައި ބުނެފައިވެއެވެ.
ދަތުރުވެރިންގެ އަދަބުވެރިކަމާއި، އެކަކު އަނެކަކަށް ކުރާ އިހުތިރާމާއި، އާންމު ތަންތަން ސާފުކޮށް ބެހެއްޓުމަށް އާންމުން ދޭ ސަމާލުކަމަށްވެސް ކްލޯއީ ވަނީ ބޮޑަށް ތައުރީފުކޮށްފައެވެ.
