ދުނިޔޭގެ ސިޔާސީ މަސްރަހަށް އަންނަމުންދާ ބޮޑެތި ބަދަލުތަކާއި ކުރިމަތިވަމުންދާ ޕްރެޝަރުތަކާއެކުވެސް، ރަޝިޔާ އާއި އިންޑިއާގެ ދެމެދުގައި އޮތް ސްޓްރެޓެޖިކް ޕާޓްނަޝިޕްގައި ހަމަޖެހުން ގާއިމުކުރުމަށް ދެ ގައުމުން މަސައްކަތް ފަށައިފިއެވެ. މި ހަފްތާގައި މޮސްކޯގައި ކުރިއަށްދާ ރަޝިޔާ-އިންޑިއާ ބިޒްނަސް ޑައިލޮގް ފޯރަމްގައި ދެ ގައުމުގެ ސަރުކާރުގެ އިސް އޮފިޝަލުންނާއި 1,250 އަށް ވުރެ ގިނަ ވިޔަފާރިވެރިން ބައިވެރިވެފައިވެއެވެ.
މި ބައްދަލުވުމުގެ މައިގަނޑު މަގްސަދަކީ ދެ ގައުމުގެ ދެމެދުގައި އިންވެސްޓްމަންޓްތައް ފުޅާކުރުމާއި، މާލީ ނިޒާމުތައް އިތުރަށް ތަރައްގީކުރުމުގެ އިތުރުން ގުޅިފައިވާ ޕްރޮޖެކްޓްތައް ކުރިއަށް ގެންދިއުމެވެ.
މިއީ މިދިޔަ ޑިސެމްބަރު މަހު ރަޝިޔާގެ ރައީސް ވްލަޑިމިއާ ޕޫޓިން އާއި އިންޑިއާގެ ބޮޑުވަޒީރު ނަރެންދްރަ މޯދީ ބޭއްވި ސަމިޓަށް ފަހު، ދެ ގައުމުގެ އިގްތިސާދީ ގުޅުން ބަދަހިކުރުމަށް އެޅުނު މުހިންމު ފިޔަވަޅެކެވެ.
ޔޫކްރޭން ހަނގުރާމައާ ގުޅިގެން ރަޝިޔާއަށް ހުޅަނގުގެ ގައުމުތަކުން ދަތިކުރުމުގެ ފިޔަވަޅުތައް އަޅާފައިވާ ދަނޑިވަޅެއްގައި، އިންޑިއާއިން ރަޝިޔާގެ ތެޔޮ ޑިސްކައުންޓް އަގުގައި ގަންނަމުންދާތީ އެމެރިކާއިން ވަނީ ކަންބޮޑުވުން ފާޅުކޮށްފައެވެ.
އެމެރިކާއިން ވަނީ އިންޑިއާއިން މިގޮތަށް އަމަލުކުރާނަމަ 500 އިންސައްތައިގެ ޓެރިފް ނަގާފާނެ ކަމުގެ އިންޒާރު ދީފައެވެ.
މީގެ އިތުރުން ޔޫރަޕްގެ ސަރުކާރުތަކުން ވެސް ދަނީ ހަކަތައިގެ ދާއިރާގައި މޮސްކޯއާ އެކު އޮތް ގުޅުންތަކާ ގުޅިގެން އިންޑިއާއަށް ޑިޕްލޮމެޓިކް ޕްރެޝަރު ކުރަމުންނެވެ.
އިންޑިއާއިން ގެންގުޅޭ ސްޓްރެޓެޖިކް މިނިވަންކަން ނުވަތަ މިނިވަންކަމާއެކު ގޮތް ނިންމުމުގެ ސިޔާސަތުގެ ދަށުން، ރަޝިޔާއާއި ހުޅަނގުގެ ގައުމުތަކާ އެކު އެއްފަހަރާ ގުޅުން ބޭއްވުމަށް މަސައްކަތް ކުރެއެވެ. ނަމަވެސް އިންޑިއާގެ އިގްތިސާދީ މުސްތަގުބަލު ބޮޑަށް ގުޅިފައިވަނީ ހުޅަނގުގެ މާކެޓްތަކާއި ޓެކްނޮލޮޖީއާއެވެ. އެމެރިކާއާއި ޔޫރަޕިއަން ޔޫނިއަންއަކީ އިންޑިއާގެ އެންމެ ބޮޑު ވިޔަފާރީގެ ބައިވެރިންނެވެ.
ތަހުލީލު ކުރާ ފަރާތްތަކުން ފާހަގަކުރާ ގޮތުގައި، ރަޝިޔާއާ އެކު އޮންނަ ގުޅުމުގެ ސަބަބުން އިންޑިއާއަށް ދަތިކުރުމުގެ ފިޔަވަޅުތަކެއް ކުރިމަތިވެއްޖެނަމަ، ބޭރުގެ އިންވެސްޓްމަންޓްތައް ހުއްޓި، ޒަމާނީ ޓެކްނޮލޮޖީއަށް އޮތް ފުރުސަތުތައް ހަނިވެގެންދާނެއެވެ. މިއީ ދުނިޔޭގެ ތިންވަނައަށް އެންމެ ބޮޑު އިގްތިސާދަށް ވުމަށް އިންޑިއާއިން ކުރާ ދަތުރަށް އެޅޭނެ ބޮޑު ހުރަހެކެވެ.
މި ހުރިހާ ގޮންޖެހުންތަކަކާއެކުވެސް، ރަޝިޔާއަށް އިންޑިއާއަކީ އެކަހެރިކަން ފޫބައްދަން އޮތް މުހިންމު ބައިވެރިއެކެވެ. މިހާރުވެސް ރަޝިޔާގެ ހަކަތަ ގަންނަ އެންމެ ބޮޑު އެއް ގައުމަކީ އިންޑިއާ ކަމަށްވާއިރު، ގިނަ މުއާމަލާތްތައް ހިންގަނީ ދެ ގައުމުގެ ގައުމީ ފައިސާ ބޭނުންކޮށްގެންނެވެ. މި ފޯރަމްގެ ނަތީޖާއިން ކުރިއަށް އޮތް ތަނުގައި މި ގުޅުން އިތުރަށް ބަދަހިވެގެންދާނެ ގޮތްތައް ސާފުވެގެންދާނެއެވެ.
