އެމެރިކާއަށް މިވަގުތު ކުރިމަތިވަމުންދަނީ އެއް ހާދިސާއަށްފަހު އަނެއް ހާދިސާ އެވެ. ގައުމީ ފެންވަރުގައި ބޮޑެތި ގެއްލުންތަކެއް ލިބެމުންދާ ސިލްސިލާ ސުންޕާ ކާރިސާތަކެކެވެ.
ޖޯޖިއާގެ ރޯމް ސިޓީގައި ހުންނަ، 1892 ވަނަ އަހަރު ބިނާކުރި 133 އަހަރުވީ ފްލޮއިޑް ކައުންޓީ ކޯޓުހައުސް ވަނީ މިއަދު ބޮޑު އަލިފާނުގެ ހާދިސާއެއް ހިނގައި ފައެވެ. އެ އިމާރާތުގެ ބެލް ޓަވަރު ވަނީ އަނދައިގެން ގޮސްފައެވެ. އެތައް ހަނގުރާމައަކާއި، އިގްތިސާދީ ދަތިކަމެއްގެ ތެރޭގައިވެސް ސަލާމަތުން ހުރި އެ ސަރަހައްދުގެ އެންމެ ތާރީޚީ އެއް ބިނާ، މިއަދު ވަނީ މުޅިން ނެތިގޮސްފައެވެ.
ހަމައެއާއެކު، ނެބްރަސްކާގައި އެ ސްޓޭޓްގެ ތާރީޚުގައިވެސް ހިނގަމުންދާ އެންމެ ބޮޑު ޖަންގަލީގައި ރޯވާ އަލިފާނުގެ ހާދިސާގައި 9 ލައްކަ އޭކަރުގެ ދަނޑުބިމާއި ރަށްފުށުގެ ސަރަހައްދުތައް ވަނީ އަނދާފައެވެ. މީގެ ސަބަބުން ގެރިބަކަރި ފަދަ ޖަނަވާރުތަކާއި، ގޮވާން އިންދާފައިވާ ދަނޑު ބިންތަކާއި، ދަނޑުވެރިކަމުގެ ސާމާނުތައް ދަނީ ނެތެމުންނެވެ.
މިއީ މެދުއިރުމަތީގެ ހަނގުރާމައިގެ ސަބަބުން ދުނިޔޭގެ ކާބޯތަކެތީގެ ބާޒާރަށް މިހާރުވެސް ނުތަނަވަސްކަން ލިބިފައިވާ ދަނޑިވަޅެއްގައި ދިމާވި ބޮޑު ގެއްލުމެކެވެ.
މި ދާޚިލީ ކާރިސާތައް ކުރިމަތިވަމުންދަނީ ދުނިޔޭގެ މަސްރަހު ނުތަނަވަސްވެފައިވާ ދަނޑިވަޅެއްގައެވެ. ހޯމްޒް ކަނޑުއޮޅި ބަންދުވެފައިވާއިރު، އިރާގުން ވަނީ ތެޔޮ އުފެއްދުން ހުއްޓާލާފައިވާކަން އިއުލާންކޮށްފައެވެ. އަދި ގަތަރުގެ ގޭސް އުފައްދާ މަރުކަޒަށް ލިބުނު ގެއްލުންތަކުގެ ސަބަބުން ގޭހުގެ ސަޕްލައި ވަނީ ދަށްވެފައެވެ.
ސާފުނުކުރާ ތެލުގެ އަގު 110 ޑޮލަރަށްވުރެ މައްޗަށް ގޮސްފައިވާއިރު، ބާޒާރަށް އަތުވެދާނެ ލޮޅުމަކުން ސަލާމަތްވުމަށްޓަކައި އީރާނާއި ރަޝިޔާގެ ތެޔޮ ވިއްކުމުގެ ހުއްދަ އެމެރިކާއިން ވަނީ އާދަޔާ ހިލާފު ފިޔަވަޅެއްގެ ގޮތުން ދީފައެވެ.
އެމެރިކާއަށްވެސް ތެޔޮ އަގުބޮޑުވަމުން ދިއުމާއެކު އެގައުމުގެ ޓެކްސަސްގެ ތެޔޮ ސާފުކުރާ މަރުކަޒެއް ވެސް ވަނީ އަދަން ފަށާފައެވެ. މި އަލިފާން ގަނޑު އަދިވެސް ކޮންޓްރޯލެއް ނުކުރެވެއެވެ.
