އިންޑިއާގެ ބޮޑުވަޒީރު ނަރެންދުރަ މޮދީ، އޭޝިއާ ސަރަހައްދުގެ މަސްލަހަތާއި ހަކަތައިގެ ރައްކާތެރިކަމާ ގުޅޭގޮތުން ސްްރީލަންކާގެ އާ ރައީސް އަނޫރާ ކުމާރާ ދިސާނާޔަކައާ ފޯނުން ގުޅުއްވައި މުހިންމު މަޝްވަރާތަކެއް ކުރައްވައިފިއެވެ.
މި މަޝްވަރާތަކާ ގުޅޭގޮތުން ބޮޑުވަޒީރު މޮދީ އެކްސްގައި ކުރެއްވި ޕޯސްޓެއްގައި ވިދާޅުވީ، މެދުއިރުމަތީގެ މިހާރުގެ ހާލަތާއި، އޭގެ ސަބަބުން ދުނިޔޭގެ ހަކަތައިގެ ރައްކާތެރިކަމަށް ކުރިމަތިވެދާނެ ގޮންޖެހުންތަކާ ބެހޭގޮތުން ދެ ބޭފުޅުން ވާހަކަފުޅު ދެއްކެވި ކަމަށެވެ. ވަކިން ޚާއްސަކޮށް، މެދުއިރުމަތީގެ ހަމަނުޖެހުންތަކުގެ ސަބަބުން ހަކަތަ ފޯރުކޮށްދިނުމަށް އެޅިދާނެ ހުރަސްތަކާ މެދު ދެ ގައުމުން ކަންބޮޑުވުން ފާޅުކުރެއްވިއެވެ.
މީގެ އިތުރުން، އިންޑިއާ އާއި ސްްރީލަންކާއާ ދެމެދު ހަކަތައިގެ ދާއިރާއިން އޮތް ގުޅުން އިތުރަށް ބަދަހިކުރުމަށް ކުރިއަށްގެންދާ މުހިންމު މަޝްރޫއުތަކުގެ ކުރިއެރުންތައް ދެ ބޭފުޅުން މުރާޖައާ ކުރެއްވިއެވެ. އަދި ސަރަހައްދީ ސަލާމަތާއި ރައްކާތެރިކަން ކަށަވަރުކުރުމަށް ކުރެވިދާނެ ކަންކަމާ ގުޅޭގޮތުން ވެސް މި ބައްދަލުވުމުގައި ވާހަކަފުޅު ދެއްކެވިއެވެ.
ބޮޑުވަޒީރު މޮދީ ވިދާޅުވީ، އިންޑިއާ އާއި ސްްރީލަންކާއަކީ ގާތް އަދި އިތުބާރު ހުރި ދެ ބައިވެރިން ކަމަށެވެ. އަދި ދެ ގައުމަށް ކުރިމަތިވާ ގޮންޖެހުންތަކުން އަރައިގަތުމަށްޓަކައި އެކުގައި ގާތުން މަސައްކަތް ކުރުމުގެ އަޒުމް ދެ ގައުމުގެ ވެރިން ވަނީ އާކުރައްވާފައެވެ.
