އޮންލައިންކޮށް ދީނަށް ފުރައްސާރަވާ ފަދަ ކޮންޓެންޓް ފެތުރި ކަމުގެ ތުހުމަތުގައި ދެ މީހަކަށް ޕާކިސްތާނުގެ ޕަންޖާބު ޕްރޮވިންސްގެ ސާހިވާލްގެ ޑިސްޓްރިކްޓް ކޯޓަކުން، މަރުގެ އަދަބު އިއްވައިފިއެވެ. ޑިސެމްބަރު މަހުގެ 22 ވަނަ ދުވަހު އިއްވި މި ހުކުމަކީ، ދީނަށް ފުރައްސާރަކުރުމާ ދެކޮޅު ގާނޫނުގެ ދަށުން އިއްވި ގިނަ ހުކުމްތަކުގެ ތެރެއިން އެންމެ ފަހުގެ ހުކުމެވެ.
- މިދިޔަ އަހަރު އެކަނިވެސް ސާހިވާލް ޑިސްޓްރިކްޓުން ދީނަށް ފުރައްސާރަކުރުމުގެ 22 މައްސަލައެއް ރިޕޯޓްކޮށްފައި ވެއެވެ.
- 2025 ވަނަ އަހަރުގެ ކުރީކޮޅުވެސް އެ ކޯޓުން ވަނީ މިފަދަ ހަތަރު މަރުގެ ހުކުމެއް އިއްވާފައެވެ.
- މުޅި ޕާކިސްތާނަށް ބަލާއިރު، މިދިޔަ އަހަރު ދީނަށް ފުރައްސާރަކުރި ކަމުގެ ތުހުމަތުގައި އެތައް ބަޔަކަށް މަރުގެ އަދަބު އިއްވާފައިވެއެވެ.
- ރާވަލްޕިންޑީގައި އެއް މައްސަލައެއްގައި ފަސް މީހަކަށް މަރުގެ އަދަބު އިއްވުން ހިމެނެއެވެ.
އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނާ ގޮތުގައި، މި ގާނޫނުގެ ބޭނުން ނަހަމަ ގޮތުގައި ހިފައި، ވަކިވަކި ފަރުދުންނާއި ބައިމަދު ގްރޫޕްތަކަށް އަމާޒުކުރަމުންދެއެވެ. ފަހަކަށް އައިސް ގިނަ ތުހުމަތުތައް މުސްލިމުންގެ މައްޗަށް ކުރެވިފައިވާއިރު، ކަމާބެހޭ ފަރާތްތަކުން ވަނީ "ބްލާސްފެމީ ބިޒްނަސް ގްރޫޕް" ގެ ނަމުގައި ހަރަކާތްތެރިވާ ބްލެކްމެއިލް ކުރާ ނެޓްވޯކެއް ފަޅާއަރުވާލާފައެވެ. މި ގްރޫޕުން ދަނީ ދޮގު މައްސަލަތަކުގައި އެތައް ސަތޭކަ ބަޔަކު ބައްދަމުންނެވެ.
ތަފާސްހިސާބުތަކުން ދައްކާ ގޮތުގައި މިދިޔަ އަހަރު 344 މައްސަލައަކާއެކު، ދީނަށް ފުރައްސާރަކުރުމުގެ މައްސަލަތައް ވަނީ ރެކޯޑް މިންވަރަކަށް އިތުރުވެފައެވެ.
މީގެ މައިގަނޑު ސަބަބަކީ ހަރުކަށި ސައިބަރ ކްރައިމް ގާނޫނުތަކުގެ ދަށުން އިންޓަނެޓް މެދުވެރިކޮށް ކުރާ ފުރައްސާރައިގެ މައްސަލަތައް ގިނަވުމެވެ. ޕާކިސްތާނު ސަރުކާރުން މިހާތަނަށް ދީނަށް ފުރައްސާރަކުރި މީހެއްގެ މަރުގެ ހުކުމް ތަންފީޒުކޮށްފައި ނުވިނަމަވެސް، އެތައް ހާސް ބަޔަކު ޖަލުގައި ތިބިއިރު، އާންމުންގެ ތެރޭގައި ހިންގާ ހަމަނުޖެހުންތަކުގައި ގިނަ ބައެއްގެ ފުރާނަ ދަނީ ގެއްލެމުންނެވެ.
ރިޕޯޓްތައް ބުނާ ގޮތުގައި، ދީނަށް ފުރައްސާރަކުރުމުގެ ކުށަށް ދޭ މަރުގެ އަދަބު އުވާލުމާ މެދު ޕާކިސްތާނު ސަރުކާރުން ދަނީ ސިއްރިއްޔާތުގައި މަޝްވަރާ ކުރަމުންނެވެ. ނަމަވެސް، ތަހްރީކޭ ލައްބައިކް ޕާކިސްތާން (ޓީ.އެލް.ޕީ) ފަދަ ދީނީ ޕާޓީތަކުން ގެންގުޅޭ ހަރުކަށި ފިކުރުގެ ސަބަބުން މިފަދަ އިސްލާހެއް ގެނައުމަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ. މި އިސްލާހުތަކަކީ ހުޅަނގުގެ ގައުމުތަކާ އޮންނަ ގުޅުމާއި ބައިނަލްއަގުވާމީ ޕްރެޝަރުތަކާވެސް ގުޅިފައިވާ ކަމެކެވެ.
އިންސާނީ ހައްގުތަކަށް ވަކާލާތުކުރާ ފަރާތްތަކުން ބާރުއަޅަނީ، ހަމަނުޖެހުންތައް ހުއްޓުވައި އަދުލު އިންސާފު ގާއިމުކުރުމަށްޓަކައި، ދީނަށް ފުރައްސާރަކުރުމުގެ އަދަބަކީ މަރު ކަމަށް އޮންނަ އުސޫލަށް ބަދަލު ގެންނަން ޖެހޭ ކަމަށެވެ. އަދި މާޒީގައި މި ގާނޫނުގެ ސަބަބުން އަނިޔާ ލިބުނު ފަރާތްތަކަށް ބަދަލު ދިނުމަކީ މުހިންމު ކަމެއް ކަމަށް އެ ފަރާތްތަކުން ދެކެއެވެ.
