ޔުނައިޓެޑް އަރަބް އެމިރޭޓްސް (ޔޫއޭއީ) ގެ މަޝްހޫރު ކޮންޓެންޓް ކްރިއޭޓަރު ޚާލިދު އަލް އާމިރީ، ކަޝްމީރުގެ ފިނި މޫސުމުގެ ރީތިކަން ދައްކުވައިދޭ ވީޑިއޯތަކެއް އާންމުކުރުމާ ގުޅިގެން، އެ ސަރަހައްދަށް ދުނިޔޭގެ ސަމާލުކަން އަނެއްކާވެސް ހުއްޓިއްޖެއެވެ. ކަޝްމީރުގެ އެންމެ ފިނި ދުވަސްވަރުގައި އެ ސަރަހައްދަށް ކުރި ޒިޔާރަތަށްފަހު ޚާލިދު ވަނީ އެއީ "ދުބާއީއާ އެންމެ ހަތަރު ގަޑިއިރު ދުރުގައި އޮތް ސުވަރުގެއެއް ފަދަ ތަނެއް" ކަމަށް ސިފަކޮށްފައެވެ.
ޚާލިދު އާންމުކުރި ވީޑިއޯތަކުގައި ކަޝްމީރުގެ ގުލްމާގް، ޕަހަލްގާމް އަދި ދާލް ލޭކްގެ ހިތްގައިމު މަންޒަރުތައް ދައްކާލާފައިވެއެވެ. އޭނާ ވަނީ ކަޝްމީރުގެ ގުދުރަތީ ރީތިކަން ސުވިޒަލޭންޑާ އަޅާކިޔައި، އެ ސަރަހައްދުގެ ރީތިކަމަކީ ފޮޓޯތަކުން ފެންނަ ވަރަށް ވުރެ މާ ފުރިހަމަ ރީތިކަމެއް ކަމަށް ބުނެފައެވެ.
އުމުރުން 42 އަހަރުގެ ޚާލިދު މި ދަތުރުގައި ކަޝްމީރުގެ ސަގާފީ ހެދުމެއް ކަމަށްވާ 'ފޭރާން' ލައިގެން ހުރެ، ޝިކާރާ ދަތުރުތަކާއި، ސުނޯއިން ފޮރުވިފައިވާ މައިދާންތަކުގެ މަންޒަރުތައް ވަނީ ރެކޯޑުކޮށްފައެވެ. އޭނާ ފާހަގަކުރި ގޮތުގައި ކަޝްމީރުގެ ސަގާފަތާއި އާދަކާދަތައް ދެމެހެއްޓިފައިވަނީ އެތަނުގެ ރައްޔިތުންގެ ކެތްތެރިކަމާއި އަމިއްލަ ވަންތަކަށް ފަޚުރުވެރި ވުމުގެ ސަބަބުންނެވެ.
ސޯޝަލް މީޑިއާގެ އެކި މަންސަތަކުގައި 18 މިލިއަނަށް ވުރެ ގިނަ ފޮލޯވަރުން ތިބި ޚާލިދު ބުނި ގޮތުގައި، ކަޝްމީރުގެ ހަމަހިމޭން މާހައުލުން ނަފްސަށް ބޮޑު ހިތްހަމަޖެހުމެއް ލިބިގެންދެއެވެ. މި ވީޑިއޯތައް އިންޑިއާ އާއި ގަލްފު ގައުމުތަކުގައި ވަރަށް ބޮޑަށް ވައިރަލްވެފައިވާއިރު، ގިނަ ބަޔަކު ދަނީ މި ކޮންޓެންޓަށް ތައުރީފު ކުރަމުންނެވެ.
