އެމެރިކާގެ ގައުމީ ސަލާމަތާ ގުޅުންހުރި އުސޫލުތަކުގެ ދަށުން އާންމުކޮށް ހިފަހައްޓާފައިވާ ވިޔަފާރީގެ ބައެއް މުދާތަކުން އިންޑިއާއަށް ބޮޑެތި ލުއިތަކެއް ދިނުމަށް އެމެރިކާއިން ނިންމައިފިއެވެ. މިއީ ދެ ގައުމުގެ ދެމެދުގައި ކުރެވުނު އިގްތިސާދީ މަޝްވަރާތަކުގެ ތެރެއިން ލިބުނު ކުރިއެރުމެކެވެ. މި އެއްބަސްވުމުގެ ދަށުން ހަކަތައާއި، ޓެކްނޮލޮޖީ އަދި ސަޕްލައި ޗެއިން ތަރައްގީކުރުމުގެ ދާއިރާއިން ވެސް ގުޅުން ބަދަހިކުރުމަށް ވަނީ ހަމަޖެހިފައެވެ.
މި މަޝްވަރާތަކުގެ މައުލޫމާތު އެނގޭ އޮފިޝަލުން ވިދާޅުވި ގޮތުގައި، އެމެރިކާގެ 'ސެކްޝަން 232′ ގެ ދަށުން ގައުމީ ސަލާމަތަށް ނުރައްކާވެދާނެ ކަމަށް ބަލައި ނަގާ ޑިއުޓީތަކުން އިންޑިއާގެ ބައެއް އުފެއްދުންތައް މިހާރު ވަނީ އިސްތިސްނާކޮށްފައެވެ. އޭގެ ތެރޭގައި މަތިންދާބޯޓާއި އޭގެ ބައިތަކާއި، އޮޓޯމޯޓިވް ޕާޓްސްގެ އިތުރުން ބައެއް ބާވަތްތަކުގެ ބޭސްތައް ހިމެނެއެވެ. މިފަދަ ލުއިތަކަކީ އެމެރިކާއިން ވަރަށް މަދުން ނޫނީ އެހެން ގައުމުތަކަށް ދޭ ލުއިތަކެއް ނޫނެވެ.
މި ލުއިތަކުގެ ބަދަލުގައި އިންޑިއާއިން ވެސް ވަނީ އެމެރިކާގެ ގިނަ ބާވަތްތަކަކުން ޓެރިފް ކުޑަކުރުމަށް ނުވަތަ އެއްކޮށް އުނިކުރުމަށް އެއްބަސްވެފައެވެ. މީގެ ތެރޭގައި އެމެރިކާގެ ސިނާއީ އުފެއްދުންތަކާއި، ދަނޑުވެރިކަމުގެ ބާވަތްތައް ކަމަށްވާ ސޯޔާބީން ތެލާއި، މޭވާއާއި، އެކި ބާވަތްތަކުގެ ބުއިންތައް ހިމެނެއެވެ.
ދެ ގައުމުގެ ސަރުކާރުން ނެރުނު ގުޅިފައިވާ ބަޔާނުގައި ޓެރިފްތަކުގެ ތަފްސީލީ ތާވަލެއް ހާމަކޮށްފައި ނުވި ނަމަވެސް، މިއީ ދެ ގައުމުގެ ދެމެދުގައި އޮތް ވިޔަފާރީގެ ގުޅުން 500 ބިލިއަން ޑޮލަރަށް ފުޅާކުރުމަށް ކުރެވޭ މަސައްކަތުގެ ބައެއް ކަމަށް އޮފިޝަލުން ފާހަގަކުރެއެވެ.
މި އެއްބަސްވުމަކީ އިންޑިއާއާއި އެމެރިކާއާ ދެމެދު އޮތް ސްޓްރެޓީޖިކް ގުޅުން އިތުރަށް ވަރުގަދަވަމުންދާ ކަމުގެ ހެއްކެކެވެ. ހާއްސަކޮށް ސާފު ހަކަތައާއި، މުހިންމު މިނަރަލްތަކާއި، އެޑްވާންސް މެނުފެކްޗަރިންގެ ދާއިރާއިން ދެ ގައުމުން ގުޅިގެން މަސައްކަތް ކުރުމަކީ މުސްތަގުބަލުގައި ދެ ގައުމުގެ އިގްތިސާދީ ރައްކާތެރިކަމަށް މުހިންމު ކަމެއް ކަމަށް ދެ ފަރާތުން ވެސް ގަބޫލުކުރެއެވެ.
