އިންޑިއާގެ އަމިއްލަ ޖައްވީ އިސްޓޭޝަން، "ބާރަތިޔާ އަންތަރިކްޝް ސްޓޭޝަން" (ބީ.އޭ.އެސް) ގެ ފުރަތަމަ މޮޑިއުލް ފަރުމާކޮށް، އެއާ ގުޅޭ ޓެކްނޮލޮޖީތައް ތަރައްގީކުރުމުގެ މަސައްކަތް އިންޑިއާގެ ޖައްވީ އިދާރާ (އިސްރޯ) އިން ބާރުމިނުގައި ކުރިއަށްގެންދާކަން ހާމަކޮށްފިއެވެ. މި މަޝްރޫއުގެ ދަށުން ބިމާ 400 އާއި 600 ކިލޯމީޓަރާ ދެމެދުގެ އުސްމިނެއްގައި އިންސާނުންނާ ނުލައި އޮޕަރޭޓްކުރާ ޖައްވީ އިސްޓޭޝަނެއް ގާއިމުކުރުމަށް ވަނީ ރޭވިފައެވެ.
ޕާލަމެންޓުގައި މި މަޝްރޫއާ ގުޅޭ ތަފްސީލު ދެއްވަމުން ޖައްވީ ކަންތައްތަކާ ބެހޭ ވަޒީރު ޖިތެންދްރަ ސިންގް ވިދާޅުވީ، އިސްރޯގެ މައި މަރުކަޒު ކަމަށްވާ ވިކްރަމް ސާރާބާއީ ސްޕޭސް ސެންޓަރުން މިހާރު ވަނީ ފުރަތަމަ މޮޑިއުލްގެ އޮނިގަނޑު ބިނާކުރުމަށް އިންޑިއާގެ ސިނާއީ ކުންފުނިތަކަށް ފުރުސަތު ހުޅުވާލާފައެވެ. މި ވަގުތު ހުއްދަ ދީފައިވަނީ ހަމައެކަނި ފުރަތަމަ މޮޑިއުލްގެ މަސައްކަތަށް ކަމަށާއި، 2025 އިން 2028 އަށް ހިނގާ ހަތަރު އަހަރުގެ މުއްދަތުގައި މި މޮޑިއުލް ތަރައްގީކޮށް ލޯންޗުކުރުމަށް ގާތްގަނޑަކަށް 187 މިލިއަން ޑޮލަރު ޚަރަދުވާނެ ކަމަށް ލަފާކުރެވޭ ކަމަށް އޭނާ ވިދާޅުވިއެވެ.
މި މަޝްރޫއުގެ މައިގަނޑު އަމާޒަކީ ފަސް މޮޑިއުލްގެ މައްޗަށް އެކުލެވޭ، އިންސާނުންނަށް ދިރިއުޅެވޭ ފަދަ ފުރިހަމަ ޖައްވީ އިސްޓޭޝަނެއް ބިނާކުރުމެވެ. މި އިސްޓޭޝަނުގައި ޖައްވީ އުޅަނދުފަހަރު ގާތްކުރުމާއި، ރޮބޮޓިކްސް، ޖައްވުގައި އުޅަނދުތަކަށް ތެޔޮ އެޅުން، އަދި އެސްޓްރޮނޯޓުން ތިބޭނެ ތަންތަނާއި މައިކްރޯގްރެވިޓީ ތަހުލީލުތައް ކުރުމަށް ބޭނުންވާ ވަސީލަތްތައް ގާއިމުކުރެވޭނެއެވެ.
ވަޒީރު ސިންގް އިތުރަށް ވިދާޅުވި ގޮތުގައި، މި އިސްޓޭޝަނުގައި މައިގަނޑު ގޮތެއްގައި ދިރޭތަކެއްޗާ ބެހޭ ސައިންސާއި، ބޭސްވެރިކަމާއި، މެޓީރިއަލް ސައިންސް އަދި އުފެއްދުންތެރިކަމުގެ ޓެކްނޮލޮޖީއާ ގުޅޭ ދިރާސާތައް ކުރިއަށް ގެންދިއުމަށް ވަނީ ހަމަޖެހިފައެވެ. "އަޅުގަނޑުމެންގެ އަމާޒަކީ 2028 ވަނަ އަހަރާ ހަމައަށް ބީ.އޭ.އެސްގެ ފުރަތަމަ މޮޑިއުލް ފޮނުވާލުން، އަދި 2035 ވަނަ އަހަރާ ހަމައަށް ފަސް މޮޑިއުލްއާއެކު ފުރިހަމަ އިސްޓޭޝަނެއް އޮޕަރޭޓްކުރަން ފެށުން،" ވަޒީރު ވިދާޅުވިއެވެ.
މީގެ އިތުރުން، ޖައްވީ އިސްޓޭޝަން ބިނާކުރުމުގައި އެންމެ މުހިންމު ދައުރެއް އަދާކުރާ ސްޕޭސް ޑޮކިންގް އެކްސްޕެރިމެންޓް ގެ ދެވަނަ އަދި ތިންވަނަ މަރުހަލާގެ މަސައްކަތްތައް ވެސް އިސްރޯއިން މިހާރު ކުރިއަށް ގެންދާކަން ސަރުކާރުން ވަނީ ހާމަކޮށްފައެވެ.
&imwidth=800&imheight=600&format=webp&quality=medium)
