ނޭޕާލްގެ އައު ބޮޑުވަޒީރުކަމުގެ ހުވާ ކުރެއްވި ބަލެންދްރަ ޝާހަށް އިންޑިއާގެ ބޮޑުވަޒީރު ނަރެންދްރަ މޯދީ މިއަދު ހުކުރު ދުވަހު މަރުހަބާ ވިދާޅުވެއްޖެއެވެ. ބޮޑުވަޒީރު މޯދީ ވަނީ ދެ ގައުމުގެ ގުޅުން އިތުރު ހަރުފަތަކަށް ގެންދިއުމަށް އެކުގައި މަސައްކަތް ކުރެއްވުމަށް އުންމީދު ކުރައްވާ ކަމަށް ވިދާޅުވެފައެވެ.
ބޮޑުވަޒީރު މޯދީ އެކްސްގައި ކުރެއްވި ޕޯސްޓެއްގައި ވިދާޅުވީ، "މަނިކުފާނުގެ އައްޔަންކުރުމަކީ ނޭޕާލްގެ ރައްޔިތުން މަނިކުފާނުގެ ލީޑަޝިޕަށް ކުރާ އިތުބާރު ރަމްޒުކޮށްދޭ ކަމެއް" ކަމަށެވެ. އަދި އިންޑިއާ އާއި ނޭޕާލްގެ އެކުވެރިކަމާއި އެއްބާރުލުން ދެ ގައުމުގެ ރައްޔިތުންގެ ލާބައަށްޓަކައި އިތުރަށް ވަރުގަދަ ކުރުމަށް މަސައްކަތް ކުރައްވާނެ ކަމަށްވެސް މޯދީ ވިދާޅުވިއެވެ.
އުމުރުން އެންމެ 35 އަހަރުގެ ޝާހަކީ ފާއިތުވި އެތައް އަހަރެއްގެ ތެރޭގައި ނޭޕާލްގެ ބޮޑުވަޒީރުކަމާ ހަވާލުވެވަޑައިގެންނެވި އެންމެ ޒުވާން ލީޑަރެވެ. ރެޕް މިއުޒިކް ކުޅުންތެރިއެއްގެ ގޮތުގައި ކުރިން މަޝްހޫރުވި ޝާހަކީ، ކޭޕީ ޝަރުމާ އޯލީގެ ސަރުކާރު ވައްޓާލުމަށް މިދިޔަ އަހަރު ޒުވާނުން އިސްވެ ތިބެ ކުރި މުޒާހަރާތަކުގައި ފާހަގަކޮށްލެވުނު ޝަހުސިއްޔަތެކެވެ.
ކޮރަޕްޝަނާއި، ސިޔާސީ ހަމަޖެހުން އަދި އިގްތިސާދީ ކުރިއެރުން ނެތުމުގެ ސަބަބުން އުފެދުނު އެ މުޒާހަރާތަކުގައި 76 މީހުން މަރުވެފައިވެއެވެ. ޝާހަކީ ނޭޕާލްގެ މަދޭސީ ދަރިކޮޅުން ބޮޑުވަޒީރުކަމަށް ވަޑައިގެންނެވި ފުރަތަމަ ބޭފުޅާވެސް މެއެވެ. މަދޭސީ ދަރިކޮޅަކީ އިންޑިއާއާ ސަގާފީ އަދި ބަހުގެ ގޮތުން ބޮޑެތި އެއްގޮތްކަންތައްތަކެއް ހުންނަ ދަރިކޮޅުގެ ބައެކެވެ.
އިންޑިއާ އާއި ޗައިނާއާ ދެމެދު އޮންނަ ކުޑަ ގައުމެއް ކަމަށްވާ ނޭޕާލަށް އައި މި ސިޔާސީ ބަދަލު، ނިއުދިއްލީ އާއި ބީޖިންގް އިން ދަނީ ވަރަށް ގާތުން ބަލަމުންނެވެ.
