ދުނިޔޭގައި އެންމެ ދަރަނި ބޮޑު ރިއަލް އެސްޓޭޓް ކުންފުނި ކަމަށްވާ ޗައިނާގެ އެވަގްރޭންޑް ގްރޫޕްގެ ބާނީ ހުއީ ކާ ޔަން، މަކަރާއި ހީލަތުން ފައިސާ ހޯދުމާއި އަމާނާތަށް ޚިޔާނާތްތެރިވުމުގެ ދައުވާތަކަށް ޝެންޒެންގެ ކޯޓެއްގައި އިއުތިރާފުވެއްޖެއެވެ.
އުމުރުން 67 އަހަރުގެ ހުއީ ކާ ޔަންގެ މައްޗަށް އުފުލާފައިވާ ދައުވާތަކުގެ ތެރޭގައި ލޯނު ހޯދުމުގައި އޮޅުވާލުމާއި، ކުންފުނީގެ ފައިސާ ނަހަމަ ގޮތުގައި ބޭނުންކުރުމާއި، ގަވާއިދާ ޚިލާފަށް އާންމުންގެ އަތުން ފައިސާ ނެގުމުގެ އިތުރުން ރިޝްވަތު ދިނުން ހިމެނެއެވެ. 2021 ވަނަ އަހަރު އެވަގްރޭންޑް ދަރަނިވެރިވި ފަހުން 3 އަހަރު ވަންދެން ބަންދުގައި ހުރި ހުއީ، ޝަރީއަތުގެ މަޖިލީހުގައި ވަނީ އޭނާ ކުރި ކަންތައްތަކަށް މައާފަށް އެދި ހިތާމަކުރާ ކަމަށް ބުނެފައެވެ.
އެއްދުވަސްވަރެއްގައި އަހަރަކު 103 ބިލިއަން ޑޮލަރުގެ ވިޔަފާރިކުރި އެވަގްރޭންޑް ބަނގުރޫޓުވީ 300 ބިލިއަން ޑޮލަރަށްވުރެ ގިނަ ދަރަންޏާ އެކުގައެވެ. މިއީ ގާތްގަނޑަކަށް މެދުމިނުގެ މުއްސަނދި ގައުމެއްގެ މުޅި އުފެއްދުންތެރިކަމާ އެއްވަރުގެ އަދަދެކެވެ. މި ކަމުގެ ސަބަބުން ޗައިނާގެ ރިއަލް އެސްޓޭޓް ދާއިރާއަށް ބޮޑު ލޮޅުމެއް އަރައި، އެތައް މިލިއަން ބަޔަކު ފައިސާ ދައްކާފައިވާ ގެދޮރު ނުނިމި ވަނީ ހުއްޓިފައެވެ.
ހުއީ ކާ ޔަން އަކީ 2017 ވަނަ އަހަރު 45 ބިލިއަން ޑޮލަރުގެ މިލްކިއްޔާތަކާއެކު އޭޝިއާގެ އެންމެ މުއްސަނދި މީހާގެ މަގާމު ފުރި މީހެކެވެ. އާދައިގެ އާއިލާއަކުން އައިސް ބޮޑު ކުންފުންޏެއް ބިނާކުރި ހުއީގެ މި ވެއްޓުމަކީ ޗައިނާގެ ރިއަލް އެސްޓޭޓް ދާއިރާގައި އޮތް ބޮޑެތި ލޯނުތައް ނަގައިގެން ވިޔަފާރި ފުޅާކުރުމުގެ ސަގާފަތަށް އައި ނިމުމެއްގެ ގޮތުގައި ސިފަކުރެއެވެ.
މި މައްސަލައިގައި ހުއީގެ ފަރާތުން ނުވަތަ އެވަގްރޭންޑްގެ ލިކުއިޑޭޓަރުންގެ ފަރާތުން އަދި ރަސްމީ ބަހެއް ލިބިފައެއް ނުވެއެވެ. ކޯޓުން އަދި ހުކުމް ކުރާނެ ތާރީހެއް އިއުލާނެއް ނުކުރެއެވެ. މި މައްސަލައަކީ ޗައިނާ ސަރުކާރުން ކުންފުނިތަކުގެ ކޮރަޕްޝަނާއި ނަހަމަ އަމަލުތައް ހުއްޓުވުމަށް ފަށާފައިވާ މަސައްކަތުގެ ތެރެއިން ކުރިއަށްދާ މުހިންމު މައްސަލައެކެވެ.
