ސޮލިބީ ސަހުޔޫނީ ހަނގުރާމައާ ގުޅިގެން އުފެދިފައިވާ ނުތަނަވަސްކަމުގެ ތެރޭގައި، އީރާނުގެ ބަނދަރުތައް އެމެރިކާއިން ބަންދުކޮށްފައިވާ ކަމަށް ބުނާ ބުނުމަށް ގޮންޖަހައި، އީރާނުގެ ދެ އުޅަނދެއް ހުރުމުޒު ކަނޑުއޮޅި ހުރަސްކޮށް އީރާންގެ ކަނޑުގެ ސަރަހައްދަށް ވަދެފައިވާ ކަމަށް އީރާނުގެ ދައުލަތުގެ މީޑިއާއިން ރިޕޯޓްކޮށްފިއެވެ.
އީރާނުގެ ނިއުސް އެޖެންސީން ބުނި ގޮތުގައި، ކާބޯތަކެތި ހިފައިގެން ދަތުރުކުރާ ބަލްކް ކެރިއަރެއް ކަމަށްވާ ދެވަނަ އާގު ބޯޓު މިހާރު ވަނީ ފާރިސީ ކަނޑުއޮޅިއަށް ވަދެ ބަންދަރު އިމާމް ޚުމައިނީއަށް މިސްރާބު ޖަހާފައެވެ. މިއީ އެމެރިކާގެ އޮފީސް އޮފް ފޮރިން އެސެޓްސް ކޮންޓްރޯލް އިން ދަތިކުރުމުގެ ފިޔަވަޅު އަޅާފައިވާ ވީ.އެލް.ސީ.ސީ ސުޕަރޓޭންކަރެއް އެ ސަރަހައްދަށް ވަންތާ މާގިނަ އިރުތަކެއް ނުވަނީސް ވަން އުޅަނދެކެވެ.
ރިޕޯޓްތައް ބުނާ ގޮތުގައި މި ސުޕަރޓޭންކަރު ބައިނަލްއަގުވާމީ ކަނޑުގެ ސަރަހައްދާއި ހުރުމުޒު ކަނޑުއޮޅި ހުރަސްކޮށްފައިވަނީ އެއްވެސް ދަތިކަމެއް ދިމާވުމެއް ނެތި، އޭގެ ޓްރެކިންގ ޑިވައިސް ޖައްސައިގެން ހާމަކަން ބޮޑު ގޮތެއްގައެވެ. މިއީ އެމެރިކާގެ ސެންޓްރަލް ކޮމާންޑް އިން އީރާނުގެ ބަނދަރުތައް އޮތީ މުޅިން ބަންދުކޮށް ހިސާރަކޮށްފައި ކަމަށް ބުނާ ވާހަކައާ ޚިލާފު ކަމެކެވެ.
ފާރްސް ނިއުސް އެޖެންސީން މިކަން ސިފަކޮށްފައިވަނީ "ހިސާރުކުރުން ނާކާމިޔާބުވުމެއް" ކަމުގައެވެ. އެ އެޖެންސީން ބުނި ގޮތުގައި، އެއްވެސް އުޅަނދަކަށް މި ބްލޮކޭޑް ފޫއަޅުވާލައި ނުދެވޭނެ ކަމަށް ސެންޓްކޮމް އިން ބުނަމުންދިޔަ ނަމަވެސް، ޓްރެކިންގ ޑޭޓާތަކުން ދައްކާ ގޮތުގައި މި އުޅަނދުތައް އެއްވެސް ހުރަހެއް ނެތި އީރާނުގެ ސަރަހައްދަށް ދަނީ ދަތުރު ކުރަމުންނެވެ.
