ދެކުނު ޗައިނާ ކަނޑުގެ މައްސަލަ ބޮޑުވެފައިވާ ސަރަހައްދެއް ކަމަށްވާ ސްޕާޓްލީ އައިލެންޑްސް ކައިރީގައި ޗައިނާގެ މަސްވެރިން ސައިނައިޑް ބޭނުންކުރަމުންދާ ކަމަށް ފިލިޕީންސުން ތުހުމަތުކޮށްފިއެވެ. ފިލިޕީންސްގެ އޮފިޝަލުން ވިދާޅުވާ ގޮތުގައި މިއީ އެ ސަރަހައްދުގެ މަސްވެރިކަން ނައްތާލުމަށާއި، އެ ސަރަހައްދުގައި ތިބި ފިލިޕީންސްގެ ސިފައިންގެ ކާނާގެ ސަޕްލައިއަށް ހުރަސް އެޅުމަށް ގަސްތުގައި ހިންގާ ޖަރީމާ އެކެވެ.
ފިލިޕީންސްގެ ނޭޝަނަލް ސެކިއުރިޓީ ކައުންސިލް (އެން.އެސް.ސީ) އިން ބުނި ގޮތުގައި މި ވިހަ ބޭނުންކުރަމުންދަނީ ފިލިޕީންސްގެ އަސްކަރީ މަރުކަޒެއްގެ ގޮތުގައި ބޭނުންކުރާ ބީ.އާރު.ޕީ "ސިއެރާ މާޑްރޭ" ބަނދަރުކޮށްފައިވާ ސަރަހައްދުގައެވެ. އެން.އެސް.ސީގެ އެސިސްޓަންޓް ޑައިރެކްޓަރ ޖެނެރަލް ކޯނޭލިއޯ ވެލެންސިއާ ވިދާޅުވީ، ސައިނައިޑްގެ ސަބަބުން ކަނޑުގެ ފެނާއި މަސްތައް ތަޣައްޔަރުވެ، އެ ސަރަހައްދުގެ ފަރުތަކަށް ބޮޑެތި ގެއްލުންތަކެއް ލިބެމުންދާ ކަމަށެވެ.
ފިލިޕީންސްގެ ކަނޑުގެ ސިފައިންނާއި ކޯސްޓްގާޑުން މިހާރު ވަނީ އެ ސަރަހައްދުގެ ފޯރިމެރުން ވަރުގަދަކޮށްފައެވެ. ފިލިޕީންސްގެ ނޭވީގެ ތަރުޖަމާނު ރިއަރ އެޑްމިރަލް ރޯއީ ވިންސެންޓް ޓްރިނިޑާޑް ވިދާޅުވީ، ވޭތުވެދިޔަ އަހަރު ތެރޭގައި ހިންގި ތިން އޮޕަރޭޝަނެއްގައި ޗައިނާގެ މަސްބޯޓުތަކާ ގުޅުންހުރި ކުދި ދޯނިފަހަރުން 10 ފުޅި ސައިނައިޑް އަތުލައިގަނެފައިވާ ކަމަށެވެ. އަދި މިއަހަރުގެ މާރިޗު މަހު ނެގި ފެނުގެ ސާމްޕަލްތަކުން ވެސް ސައިނައިޑް ފެނިފައިވާ ކަމަށް އޭނާ ވިދާޅުވިއެވެ.
ޗައިނާގެ ފޮރިން މިނިސްޓްރީގެ ތަރުޖަމާނު ގުއޯ ޖިއަކިން މި ތުހުމަތުތައް ދޮގުކުރައްވަމުން ވިދާޅުވީ މިއީ "ގަބޫލުކުރަން ދަތުރު" ވާހަކަތަކެއް ކަމަށެވެ. އަދި ފިލިޕީންސުން މަސައްކަތް ކުރަނީ އާންމު މަސްވެރިކަމުގައި އުޅޭ ޗައިނާގެ އުޅަނދުތަކަށް އުނދަގޫ ކުރަން ކަމަށް އޭނާ ތުހުމަތު ކުރެއްވިއެވެ. 2016 ވަނަ އަހަރުގެ ބައިނަލްއަގުވާމީ ޓްރައިބިއުނަލްގެ ނިންމުމާ ޚިލާފަށް، ޗައިނާއިން އަދިވެސް ދަނީ ދެކުނު ޗައިނާ ކަނޑުގެ ބޮޑު ބައެއްގެ މިލްކުވެރިކަމަށް ދައުވާ ކުރަމުންނެވެ.
ދެކުނު ޗައިނާ ކަނޑަކީ ދުނިޔޭގެ ޝިޕިންގް ރޫޓުތަކުގެ މުހިންމު ހިސާބަކަށް ވާއިރު، މިއީ މަސްވެރިކަމާއި ގުދުރަތީ ވަސީލަތްތަކުން މުއްސަނދި ސަރަހައްދެކެވެ. މި ސަރަހައްދުގެ މިލްކުވެރިކަމަށް ޗައިނާގެ އިތުރުން ފިލިޕީންސް، ވިއެޓްނާމް، ޓައިވާން، މެލޭޝިއާ އަދި ބުރުނާއީ އިން ދައުވާ ކުރެއެވެ. ފަހަކަށް އައިސް މި ސަރަހައްދުގައި ޗައިނާގެ ކޯސްޓްގާޑާއި ފިލިޕީންސްގެ ސިފައިންގެ މެދުގައި ކުރިމަތިލުންތައް ހިނގައި، ބައެއް ސިފައިންނަށް އަނިޔާވެފައިވާކަން ފާހަގަކުރެވެއެވެ.
