އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އުފައްދާފައިވާ ޓްރަމްޕަށް މަލާމާތް ކުރާ ޚާއްސަ ވީޑިއޯއެއް ރަޝިޔާގައި ހުންނަ އީރާންގެ އެމްބަސީން އާންމުކޮށްފިއެވެ. މި ވީޑިއޯގައި އެމެރިކާގެ ރައީސް ޑޮނަލްޑް ޓްރަމްޕް ސިފަކޮށްފައިވަނީ މަޝްހޫރު ކާޓޫން "ޑެސްޕިކަބަލް މީ" ގައި އުޅޭ "މިނިއަން" އެއްގެ ގޮތަށެވެ.
މި ވީޑިއޯއަކީ އެމެރިކާ އާއި އީރާނާ ދެމެދު އުފެދިފައިވާ ސިޔާސީ ނުތަނަވަސްކަމުގެ ތެރެއިން، އީރާނުން ކުރިއަށްގެންދާ ޓްރަމްޕާ ދެކޮޅަށް މައުލޫމާތު ފެތުރުމުގެ ކެމްޕޭނެއްގެ ދަށުން ތައްޔާރުކޮށްފައިވާ އެނިމޭޝަނެކެވެ. ވީޑިއޯއިން ފެންނަނީ ޓްރަމްޕްގެ ކާޓޫން ސިފައެއް ހުރުމުޒު ކަނޑުއޮޅި ހުޅުވުމަށް ތަކުރާރުކޮށް މަސައްކަތްކުރާ މަންޒަރެވެ. ނަމަވެސް، ކޮންމެ ފަހަރަކުވެސް އީރާނުން އެ ސަރަހައްދުގައި އިންޒާރުގެ ޓޭޕްތައް ދަމާލައި އެތަން ބަންދުކޮށްލައެވެ. އަދި އެކަމުން ޓްރަމްޕް ނާކާމިޔާބުވެ، މާޔޫސްވެ ރުޅިގަދަވާތަން ދައްކުވައިދެއެވެ.
މިއީ ހުރުމުޒުގެ މައްޗަށް އީރާނުގެ ފުރިހަމަ ބާރު އޮތްކަން ރަމްޒުކޮށްދިނުމަށް ބޭނުންކޮށްފައިވާ އުކުޅެކެވެ.
މަޖާޒީ އަދި މަލާމާތުގެ ރޫހެއްގައި އުފައްދާފައިވާ މި ވީޑިއޯ ބޭނުންކޮށްފައި ވަނީ ޓްރަމްޕްގެ ނާކާމިޔާބީތައް ދުނިޔެއަށް ދައްކައިދިނުމަށެވެ. މިއީ އޭއައި ބޭނުންކޮށްގެން އީރާނުން ދުނިޔެއަށް މެސެޖުތައް ފޯރުކޮށްދިނުމަށް ކުރާ ފުޅާ މަސައްކަތުގެ ބައެކެވެ.
މީގެ ކުރިންވެސް އީރާނުން ވަނީ އެމެރިކާގެ ސިޔާސަތުތަކަށް ފާޑުކިޔައި، އެމެރިކާގެ ފިއްތުންތަކަށް އީރާނުން ދީލާނުލާނެކަން ހާމަކޮށްދޭ މިފަދަ ތަފާތު އުފެއްދުންތައް އާންމުކޮށްފައެވެ. މި ވީޑިއޯއާއެކު، ދައުލަތްތަކުގެ މެދުގައި ހިނގާ މުވާސަލާތީ ކުރިމަތިލުންތަކުގައި އޭއައި ވަސީލަތްތައް ބޭނުންކުރުމުގެ މުހިންމު ކަން ވަނީ ފާހަގަކުރެވިފައެވެ.
