ޗައިނާއިން ދުނިޔޭގެ އިގްތިސާދީ އަދި ސްޓްރެޓެޖިކް ނުފޫޒު ފުޅާކުރަމުންދާއިރު، ޔޫރަޕްގެ ގައުމުތަކުން ޗައިނާގެ ޓެކްނޮލޮޖީއާއި، އިންފްރާސްޓްރަކްޗަރ އަދި މާލީ އެހީތެރިކަމަށް ބަރޯސާވާ މިންވަރު އިތުރުވަމުންދާން ފަށައިފިއެވެ. މި ނުރައްކާ އެންމެ ބޮޑަށް ފާހަގަކުރެވެނީ ހަކަތައިގެ ދާއިރާއަށާއި ދުނިޔޭގެ ވިޔަފާރީގެ މަގުތަކަށް އަންނަ ބަދަލުތަކުންނެވެ.
ދުނިޔޭގެ ތިމާވެއްޓާ ރައްޓެހި ހަކަތައަށް ބަދަލުވުމަށް ކުރާ މަސައްކަތުގައި ބޭނުންވާ މުހިންމު ވަސީލަތްތަކުގެ ބޮޑު ބައެއް މިހާރު ކޮންޓްރޯލް ކުރަނީ ޗައިނާއިންނެވެ. އެގޮތުން:
ދުނިޔޭގެ ސޯލާ ޕެނަލް އުފެއްދުމުގެ 80 އިންސައްތަ، ބެޓެރީ އުފެއްދުމުގެ 75 އިންސައްތަ އަދި އިލެކްޓްރިކް ވެހިކަލް އުފެއްދުމުގެ 70 އިންސައްތަ ހިއްސާކުރަނީ ޗައިނާއިންނެވެ. މީގެ ސަބަބުން ކުރިމަގުގެ ހަކަތައާއި ދަތުރުފަތުރުގެ ނިޒާމުތަކުގެ މައްޗަށް ޗައިނާގެ ބޮޑު ނުފޫޒެއް އޮންނާނެއެވެ.
ޔޫރަޕިއަން ޔޫނިއަނުން ތިމާވެށީގެ ސިޔާސަތުތަކުގައި އިސްދައުރެއް އަދާކުރި ނަމަވެސް، އެ ސިޔާސަތުތައް ތަންފީޒުކުރުމަށް ބޭނުންވާ ޓެކްނޮލޮޖީއަށް ޔޫރަޕުން ބަރޯސާވަނީ ޗައިނާއަށެވެ. ރަޝިޔާގެ ގޭހަށް އޮތް ބަރޯސާވުން ޔޫރަޕުން ކުޑަކުރި ނަމަވެސް، މިހާރު އެ މަގާމު މިވަނީ ޗައިނާގެ ސޯލާ އަދި ބެޓެރީ ސަޕްލައި ޗެއިންތަކުން ފުރާލާފައެވެ. މިއީ ޔޫރަޕްގެ ސިނާއީ އަދި ސަލާމަތީ ސިޔާސަތުތައް މިނިވަންކަމާއެކު ކުރިއަށް ގެންދިއުމަށް އޮތް ހުރަހެއް ކަމަށް ދިރާސާކުރާ ފަރާތްތަކުން ބުނެއެވެ.
ދުނިޔޭގެ 90 އަށްވުރެ ގިނަ ގައުމެއްގެ ބަނދަރު ހެދުމުގެ މަޝްރޫއުތަކުގައި ޗައިނާގެ ކުންފުނިތަކުން ދަނީ ބައިވެރިވަމުންނެވެ.
މީގެ ތެރޭގައި ޔޫރަޕްގެ ބަނދަރުތައްވެސް ހިމެނެއެވެ. މީގެ އިތުރުން، ޗައިނާގެ ފައިސާ ކަމަށްވާ ރެންމިންބީ ދުނިޔޭގެ ރިޒާވް ފައިސާއަކަށް ހެދުމަށް ކުރާ މަސައްކަތުގެ ސަބަބުން، ހުޅަނގުގެ ގައުމުތަކަށް މިހާރު ލިބޭ މާލީ މަންފާތަކަށް ބަދަލު އައުމުގެ ފުރުސަތު އެބައޮތެވެ.
މި ހުރިހާ ބަދަލުތަކެއް އަންނަމުންދާއިރު، އެމެރިކާއާއި ހުޅަނގުގެ ބާރުތަކުން މެދުއިރުމަތީގެ ހަމަނުޖެހުންތަކަށް ސަމާލުކަންދޭ މިންވަރު އިތުރުވުމަކީ ޗައިނާއަށް ދުރުރާސްތާގެ އިގްތިސާދީ ކުރިއެރުން ހޯދުމަށް ލިބޭ ފުރުސަތެއް ކަމަށް ގިނަ ބަޔަކު ގަބޫލުކުރެއެވެ.
