އީރާނުގެ ފޮރިން މިނިސްޓަރު އައްބާސް އަރާގްޗީ، އޮމާނަށް ކުރެއްވި އެއް ދުވަހުގެ ރަސްމީ ދަތުރުފުޅު ނިންމަވާލެއްވުމަށްފަހު އަނެއްކާވެސް ޕާކިސްތާނަށް ވަޑައިގެންފިއެވެ. މަސްދަރުތަކުން މައުލޫމާތުދޭ ގޮތުގައި އޭނާ ރާވަލްޕިންޑީގެ ނޫރު ޚާން އެއާބޭސްއަށް ވަޑައިގެންފައިވަނީ އިރުއޮއްސުނު ވަގުތުގައެވެ.
އިސްލާމްއާބާދުގައި މަޑުކުރައްވާ މި ކުރު ދަތުރުފުޅުގައި އަރާގްޗީ ޕާކިސްތާނުގެ އިސް އޮފިޝަލުންނާ ބައްދަލުކުރެއްވުމަށް ވަނީ ހަމަޖެހިފައެވެ. މި ބައްދަލުވުންތަކަށްފަހު އޭނާ ދެން ފުރާވަޑައިގަންނަވާނީ ރަޝިޔާގެ ވެރިރަށް މޮސްކޯއަށް ކަމަށް ރިޕޯޓްތައް ބުނެއެވެ.
އޮމާނުގައި ބަރަކާ އަލްޢާމިރު ގަނޑުވަރުގައި އަރާގްޗީ ވަނީ އޮމާނުގެ ސުލްޠާނާވެސް ބައްދަލު ކުރައްވާފައެވެ.
މި ދަތުރުފުޅުގެ ތެރެއިން އަރާގްޗީ ވަނީ ސައުދީ އަރަބިއްޔާގެ ފޮރިން މިނިސްޓަރު ފައިސަލް ބިން ފަރްހާންއާ ފޯނުން ގުޅުއްވައި ސަރަހައްދީ މަސްލަހަތާ ގުޅޭގޮތުން މަޝްވަރާ ކުރައްވާފައެވެ. އީރާނުގެ ދައުލަތުގެ މީޑިއާ އިން ރިޕޯޓްކޮށްފައިވާ ގޮތުގައި، ދެ ބޭފުޅުން ވަނީ ސަރަހައްދީ އެންމެ ފަހުގެ ކުރިއެރުންތަކާއި ކުރިއަށްދާ ޑިޕްލޮމެޓިކް މަސައްކަތްތަކާ ބެހޭގޮތުން ވާހަކަދައްކަވާފައެވެ.
އީރާނުގެ ރަސްމީ ނިއުސް އެޖެންސީ އިން ބުނިގޮތުގައި އަރާގްޗީ ޕާކިސްތާނަށް ވަޑައިގަތީ މި ހާރު ހިނގަމުންދާ ނުތަނަވަސްކަމުގައި ސަރަހައްދީ ގައުމުތަކާ އެކު އޮންނަ ގުޅުން ބަދަހިކުރުމުގެ މަސައްކަތުގެ ތެރެއިންނެވެ. މިއީ ސަރަހައްދީ ހަމަޖެހުން ގާއިމުކުރުމަށް އީރާނުން ކުރަމުންދާ މަސައްކަތްތަކުގެ މުހިންމު ބައެއްގެ ގޮތުގައި ބެލެވެއެވެ.
