ބަލޮޗް ނަސްލުގެ މީހަކު މަޖުބޫރުން ގެއްލުވާފައިވާ ކަމަށް ބުނެ ކަރާޗީ ޕްރެސް ކްލަބް ކުރިމަތީގައި މުޒާހަރާ ކުރަނިކޮށް ހައްޔަރުކުރި 5 އަންހެނުން ދޫކޮށްލުމަށް ކަރާޗީގެ މެޖިސްޓްރޭޓް ކޯޓުން އާދީއްތަ ދުވަހު އަމުރުކޮށްފިއެވެ. މި އަންހެނުން ދޫކޮށްލާފައިވަނީ ޕާސަނަލް ބޮންޑެއްގެ ދަށުންނެވެ.
ފުލުހުން ހައްޔަރުކޮށްފައިވަނީ ބަލޮޗް ޔަކްޖެހްތީ ކޮމިޓީ (ބީވައިސީ) ގެ އެކްޓިވިސްޓް ފައުޒިއާ ބަލޮޗް އާއި އޭނާގެ މަންމަގެ އިތުރުން އެމީހުންނާއެކު ތިބި ތިން މީހެކެވެ. ފުލުހުން ތުހުމަތުކުރާ ގޮތުގައި މި ގްރޫޕުން ވަނީ ކަރާޗީގެ ރެޑް ޒޯންގައި އެއްވުން މަނާކޮށްފައިވާ ސަރަހައްދެއްގައި މުޒާހަރާކޮށް، ދައުލަތާއި ދައުލަތުގެ މުއައްސަސާތަކާ ދެކޮޅަށް އަޑުއުފުލާފައެވެ. މި މައްސަލަ ރަޖިސްޓްރީކޮށްފައިވަނީ ބަޣާވާތް ކުރުމާއި، އަމުރަށް ނުކިޔަމަންތެރިވުމާއި، ދައުލަތުގެ މަސައްކަތަށް ހުރަސްއެޅުމުގެ ދައުވާގެ ދަށުންނެވެ.
އާދީއްތަ ދުވަހު އޮތް ކޯޓު އަޑުއެހުމުގައި ފުލުހުން ވަނީ އެ އަންހެނުން އިތުރަށް ބަންދުގައި ބައިތިއްބައިގެން ތަހުގީގު ކުރުމަށް އެދިފައެވެ. ނަމަވެސް، ދިފާއީ ވަކީލު ޖިބްރާން ނާސިރު ވަނީ އެކަށީގެންވާ ހެކި ނެތް ކަމަށް ބުނެ އެމީހުން ދޫކޮށްލުމަށް އެދިފައެވެ. މެޖިސްޓްރޭޓް ވަނީ ވަކީލުގެ އެދުމަށް ރިއާޔަތްކޮށް، އެމީހުން ދޫކޮށްލުމަށް އަމުރުކޮށް، ގާނޫނީ މުއްދަތުގެ ތެރޭގައި ތަހުގީގު ރިޕޯޓު ހުށަހެޅުމަށް ފުލުހުންނަށް އަންގާފައެވެ.
ވަކީލު ނާސިރު ހާމަކުރެއްވި ގޮތުގައި، ގެއްލިގެން ހޯދަމުންދާ ދާދު ޝާހް ނަމަކަށް ކިޔާ މީހާ ވަނީ މިދިޔަ އޭޕްރިލް މަހުގެ 21 ވަނަ ދުވަހު ވަގަށް ނަގާފައެވެ. އަދި އެ މައްސަލަ ފުލުހުންނަށް ހުށަހެޅުމުން މައްސަލަ ބަލައިގަތުމަށް ފުލުހުން އިންކާރުކޮށްފައިވާ ކަމަށްވެސް އޭނާ ބުންޏެވެ. ނަމަވެސް މިކަމާ ގުޅޭގޮތުން ފުލުހުން ރަސްމީކޮށް އެއްޗެއް ބުނެފައެއް ނުވެއެވެ.
މިފަހަކަށް އައިސް ކަރާޗީ ފުލުހުންނާއި ބީވައިސީގެ އެކްޓިވިސްޓުންނާ ދެމެދު މިފަދަ ކުރިމަތިލުންތައް ވަނީ އިތުރުވެފައެވެ. އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ވަނީ ސުލްހަވެރިކަމާއެކު މުޒާހަރާކުރާ މީހުންނާ ދެކޮޅަށް ބަޣާވާތުގެ ދައުވާ އުފުލުން ކުށްވެރިކޮށް، ގާނޫނީ އިޖުރާއަތްތަކަށް އިހުތިރާމް ކުރުމަށް ގޮވާލާފައެވެ.
