އެމެރިކާގެ ރައީސް ޑޮނަލްޑް ޓްރަމްޕާއި ޗައިނާގެ ރައީސް ޝީ ޖިންޕިންގެ މި މަހަށް ތާވަލުކޮށްފައިވާ ބައްދަލުވުމުގެ ސަބަބުން ތައިވާނުގެ ސަލާމަތަށާއި އިންޑޯ-ޕެސިފިކް ސަރަހައްދުގެ މަސްލަހަތަށް ބޮޑެތި ބަދަލުތަކެއް އަތުވެދާނެ ކަމުގެ އިންޒާރު ޔޫރަޕިއަން ޓައިމްސްގެ އާ ދިރާސާ ރިޕޯޓަކުން ދީފިއެވެ. މި ރިޕޯޓުގައި ބުނެފައިވަނީ ތައިވާނާ މެދު އެމެރިކާއިން ޒަމާނުއްސުރެ ގެންގުޅޭ ސިޔާސަތުތަކަށް ލުޔެއް ދީފާނެ ކަމުގެ ބިރު އެބައޮތް ކަމަށެވެ.
އެ ރިޕޯޓުގައި ފާހަގަކޮށްފައިވާ ގޮތުގައި އޭޝިއާ ސަރަހައްދުގައި އެމެރިކާގެ އިތުބާރު ދެމެހެއްޓުމަށް ތައިވާނަކީ މުހިންމު ދައުރެއް އަދާކުރާ ގައުމެކެވެ. ތައިވާނުގެ މިނިވަންކަމާ މެދު އެމެރިކާއިން ދޫދޭނެ ކަމުގެ އެއްވެސް އިޝާރާތެއް ލިބިއްޖެ ނަމަ، ޖަޕާނާއި، ދެކުނު ކޮރެއާ އަދި ފިލިޕީންސް ފަދަ ގައުމުތަކުން އެމެރިކާގެ ސަލާމަތީ ރައްކާތެރިކަމާ މެދު ސުވާލު އުފައްދާނެ ކަމަށް ވަނީ ބުނެފައެވެ.
ދުނިޔޭގެ ސެމީކޮންޑަކްޓަރު އުފެއްދުމުގެ މައި ހަބަކީ ތައިވާން ކަމަށްވާއިރު، އެމެރިކާގެ ސިޔާސަތަށް އަންނަ ބަދަލެއްގެ ސަބަބުން އެމެރިކާގެ ދިފާއީ އަދި ޓެކްނޮލޮޖީ ދާއިރާއަށް ޗައިނާގެ ނުފޫޒު ފޯރުމުގެ ފުރުސަތު ބޮޑުވާނެ ކަމަށް ރިޕޯޓުގައިވެއެވެ. މިއީ ޓެކްނޮލޮޖީގެ ރޭހުގައި ކުރިހޯދުމަށް ޓްރަމްޕް ގެންގުޅުއްވާ ސިޔާސަތުތަކާ ފުށުއަރާ ކަމެއްގެ ގޮތުގައި ވަނީ ފާހަގަކޮށްފައެވެ.
އެމެރިކާގެ ކޮންގްރެސްގެ ދެ ޕާޓީގެ މެދުގައި ވެސް ތައިވާނަށް ބޮޑު ތާއީދެއް އޮންނައިރު، ޗައިނާއަށް ދޫދޭ ކަމުގެ އިހުސާސެއް ކުރެވިއްޖެ ނަމަ ޓްރަމްޕްގެ ސަރުކާރަށް ބޮޑެތި ފާޑުކިޔުންތަކެއް އަމާޒުވާނެއެވެ. މިއީ ޗައިނާއާ މެދު ހަރުކަށި ސިޔާސަތެއް ގެންގުޅުއްވާ ކަމަށް ޓްރަމްޕް ވިދާޅުވާ ވިދާޅުވުމާ މެދު ސުވާލު އުފެދޭނެ ކަމެކެވެ.
ތައިވާނަކީ ޗައިނާގެ ވެރިކަމުގެ ނިޒާމާ ދެކޮޅަށް އޮތް ޑިމޮކްރަސީގެ ނަމޫނާއެއް ކަމަށް ރިޕޯޓުގައި ބުނެފައިވެއެވެ. ތައިވާނަށް އެމެރިކާގެ އެހީތެރިކަން ކުޑަވެއްޖެ ނަމަ، ޓިބެޓާއި ހޮންކޮންގް ފަދަ ސަރަހައްދުތަކުގެ އިންސާނީ ހައްގުތަކަށް ވަކާލާތު ކުރުމުގެ ބާރު އެމެރިކާއަށް ގެއްލި، ޗައިނާއިން ތައިވާނަށާއި އަވަށްޓެރި ގައުމުތަކަށް ދޭ ފިއްތުންތައް އިތުރުވާނެ ކަމަށް ބެލެވެއެވެ.
ރިޕޯޓު ނިންމާލަމުން ބުނެފައިވަނީ ޝީ ޖިންޕިންގެ މައިގަނޑު އަމާޒަކީ ތައިވާން އެކަހެރިކޮށް، އޭޝިއާގައި އޮތް އެމެރިކާގެ އިއްތިހާދުތައް ބަލިކަށިކުރުން ކަމަށެވެ. އެހެންކަމުން އެމެރިކާއިން ދޫދޭ ކޮންމެ ދޫދިނުމަކީ ކުރިމަގުގައި ޗައިނާގެ ބާރު ގަދަވެ، ސަރަހައްދީ ސަލާމަތަށް ނުރައްކާވާނެ ކަމެއް ކަމަށް ވަނީ އިންޒާރު ދީފައެވެ.
