ފީފާ ވޯލްޑް ކަޕްގެ ފައިނަލް މެޗުގެ ޓިކެޓްތަކުގެ އަގު އިންތިހާއަށް އުފުލި، މިއީ އާންމު ސަޕޯޓަރުންނަށް ކުރި "ޚިޔާނާތެއް" ކަމަށް ބުނެ ގިނަ ބަޔަކު ފާޑުކިޔަން ފަށައިފިއެވެ. ފީފާއިން އަލަށް ތައާރަފްކުރި "ޑައިނަމިކް ޕްރައިސިންގް" މޮޑެލްގެ ސަބަބުން، ނިއު ޖާޒީގައި ބޭއްވުމަށް ހަމަޖެހިފައިވާ ފައިނަލް މެޗުގެ ޓިކެޓްތަކުގެ އަގު ވަނީ މީގެ ކުރިން ދުވަހަކުވެސް ނުދާހާ މައްޗަށް ގޮސްފައެވެ.
މި ފަހަރުގެ ވޯލްޑް ކަޕް ފައިނަލްގެ އެންމެ މަތީ ފަންތީގެ ސީޓެއްގެ އަގު މިހާރު ހުރީ 32,970 ޑޮލަރުގައެވެ. މިއީ 2022 ވަނަ އަހަރު ގަތަރުގައި ބޭއްވި ވޯލްޑް ކަޕް ފައިނަލްގެ ޓިކެޓްގެ އަގު ކަމަށްވާ 1,600 ޑޮލަރާ އަޅާބަލާއިރު ބޮޑު އިތުރުވުމެކެވެ. މީގެ އިތުރުން، ދެވަނަ ފަހަރަށް ވިއްކާ އެންމެ އަގުހެޔޮ ޓިކެޓްތައް ވެސް މިހާރު އުޅެނީ 9,000 ޑޮލަރުގެ ރޭންޖެއްގައެވެ.
މި ބޮޑު ބަދަލާއެކު ގިނަ ސަޕޯޓަރުން ބުނަމުންދަނީ "އާންމުންގެ ކުޅިވަރު" ގެ ގޮތުގައި މަޝްހޫރުވެފައިވާ ފުޓްބޯޅަ މިހާރު މިވަނީ ހަމައެކަނި މުއްސަނދިންނަށް ބައިވެރިވެވޭނެ ކުޅިވަރަކަށް ބަދަލުވެފައި ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ މިކަމާ ގުޅޭގޮތުން ކަންބޮޑުވުން ފާޅުކުރައްވާފައެވެ. އެމެރިކާ އާއި ޕެރަގުއޭ ބައްދަލުކުރާ ފުރަތަމަ މެޗުގެ ޓިކެޓެއްގެ އަގު 1,200 ޑޮލަރުގައި ހުރުމަކީ އާންމު ރައްޔިތުންނަށް އަތްފޯރާވަރަށް ވުރެ މާ ބޮޑު އަދަދެއް ކަމަށް ރައީސް ވިދާޅުވިއެވެ.
މި އަގުތަކުގެ ސަބަބުން ވޯލްޑް ކަޕް ބަލާލުމަށް ދަނޑަށް ވަނުމުގެ ފުރުސަތު އާންމު ގިނަ ސަޕޯޓަރުންނަށް ގެއްލިގެންދާނެ ކަމުގެ ބިރު ވަނީ ހީވެފައެވެ. ފީފާގެ މި އާ އުސޫލުގެ ސަބަބުން ފުޓްބޯޅައިގެ ފޯރިއަށް ނޭދެވޭ އަސަރުކޮށްފާނެ ކަމަށް ކުޅިވަރު ދިރާސާކުރާ ފަރާތްތަކުން ބުނެއެވެ.
