2026 ވަނަ އަހަރުގެ ފުރަތަމަ ތިން މަސް ދުވަހުގެ ތެރޭގައި އިންޑިއާއިން 15.3 ގިގަވޮޓްގެ ސޯލާ ހަކަތަ ގާއިމުކޮށް، އެ ގައުމުގެ ތާރީޚުގައި އައު ރެކޯޑެއް ގާއިމުކޮށްފިއެވެ. މިއީ މިދިޔަ އަހަރުގެ މި މުއްދަތުގައި ގާއިމުކުރި 6.3 ގިގަވޮޓާ އަޅާބަލާއިރު 143 އިންސައްތައިގެ ބޮޑު ކުރިއެރުމެކެވެ.
"މާކޯމް އިންޑިއާ" އިން ނެރުނު އެންމެ ފަހުގެ ރިޕޯޓުގައިވާ ގޮތުން، މި މުއްދަތުގައި ގާއިމުކުރި ވަސީލަތްތަކުގެ ތެރެއިން 82 އިންސައްތަ ނުވަތަ 12.6 ގިގަވޮޓަކީ ބޮޑެތި މަޝްރޫއުތަކެވެ. އަދި އޯޕަން އެކްސެސް މަޝްރޫއުތަކުން 21 އިންސައްތަ ހިއްސާކުރާކަމަށް އެ ރިޕޯޓުގައި ބަޔާންކޮށްފައިވެއެވެ.
މި ކުރިއެރުން ލިބުނު މައިގަނޑު ސަބަބުތަކުގެ ތެރޭގައި 2026 ވަނަ އަހަރުގެ ޖޫން މަހު އަމަލުކުރަން ފަށާ އައު ގަވާއިދުތަކުގެ ކުރިން މަޝްރޫއުތައް ނިންމުމަށް ޑިވެލޮޕަރުން ކުރި މަސައްކަތް ހިމެނެއެވެ. މީގެ އިތުރުން "ޕީއެމް-ކުސުމް" ޕްރޮގްރާމްގެ ދަށުން މަސައްކަތްތައް އަވަސްކުރުމާއި، ބައެއް ސްޓޭޓްތަކުގައި ކަރަންޓު ފޮނުވައިދޭ ނިޒާމުތައް ހަރުދަނާވުންވެސް މި ކުރިއެރުމުގައި ބޮޑު ދައުރެއް އަދާކުރިއެވެ.
މާކޯމްގެ ސީއީއޯ ރާޖް ޕްރަބޫ ވިދާޅުވި ގޮތުގައި، މިފަދަ ބޮޑު ކުރިއެރުމެއް ލިބުނު ނަމަވެސް، ކަރަންޓު ވިއުގައަށް ހަކަތަ ފޮނުވުމުގައި ހުރި ދަތިތަކަކީ މި ދާއިރާއަށް އޮތް ގޮންޖެހުމެކެވެ. އެހެންކަމުން ހަކަތަ ރައްކާކުރާނެ ނިޒާމުތައް ނުވަތަ ސްޓޯރޭޖް އިތުރުކުރުމަކީ އިއާދަކުރަނިވި ހަކަތަ ބޭނުންކުރާ މިންވަރު އިތުރުވަމުންދާއިރު ކޮންމެހެން ބޭނުންތެރި ކަމެއްކަން އޭނާ ފާހަގަކުރެއްވިއެވެ.
2026 ވަނަ އަހަރުގެ މާރިޗު މަހުގެ ނިޔަލަށް އިންޑިއާގެ ޖުމްލަ ސޯލާ ހަކަތައިގެ ކެޕޭސިޓީ ވަނީ 152 ގިގަވޮޓަށް އަރާފައެވެ. މިއީ އެ ގައުމުގައި އުފައްދާ ޖުމްލަ ކަރަންޓުގެ 28 އިންސައްތައެވެ. އަދި މިއީ އިއާދަކުރަނިވި ހަކަތައިގެ ޖުމްލަ ވަސީލަތްތަކުގެ 55 އިންސައްތައެވެ.
ތަފާސްހިސާބުތަކުން ދައްކާގޮތުގައި ސޯލާ ހަކަތަ އުފެއްދުމުގައި އެންމެ ކުރީގައި އުޅެނީ ރާޖަސްތާން (32 އިންސައްތަ) އެވެ. ދެވަނައިގައި ގުޖުރާތު (21 އިންސައްތަ) އޮތްއިރު، ތިންވަނައިގައި އޮތީ ކަރްނާޓަކާ (11 އިންސައްތަ) އެވެ. ނަމަވެސް، މިއަހަރުގެ ފުރަތަމަ ތިން މަސް ދުވަހުގެ ތެރޭގައި އެންމެ ގިނަ މަޝްރޫއުތައް ކުރިއަށް ގެންގޮސްފައިވަނީ ގުޖުރާތު (40 އިންސައްތަ) އަދި ރާޖަސްތާން (39 އިންސައްތަ) ގައެވެ.
